Mąątɛ̨nɛ̨ 22 - Bible

Lii-too pôlu da laa-maa tɛ̂ wule

Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni mai

¹ Ŋáɣâlai, Ŋáɣâlai, ya íyee kulâi ḿû lé mɛni ma? Ímaa kôyaai ḿâ lé mɛni ma? Ífe ŋ́wɔlɔ-wooi mɛnîi lé mɛni ma?

² Óo Ŋáɣâlai, ŋa wɔ̂lɔi yâ a ɣele kélee, kɛ́lɛ ífe ŋ́oo su-toôi. Ŋa ítôlii a kpíni kélee, kɛ́lɛ fii tɔ̂ɔ fé ńyêei.

³ Yá ƃa Ǹúu Maa Waai. Íkɛ ƃò seêni íkâloŋ see-sɛŋ ŋá. Yá ƃe Eezuɛ-ƃelai da laa-ma-tɛ̂ tɛ̀ɛ ípɔ.

⁴ Yá ƃé kúnâŋ-ni dí dílàa a yá. Dí làa a yá, ǹyaŋ í díŋuŋ mâ ƃò.

⁵ Dí wɔ̀lɔ yâ, ǹyaŋ í díŋuŋ ma ƃò. Dí dílàa a yá, ǹyaŋ ífe íyee kula ní dímu.

⁶ Fé ŋɔ́nɔ núu kɔ̀lɔi. Ŋ́gaa nɔ́ yɛ̂ɛ kpeli. Ǹûai da díyee kúla ḿû, díkɛ ɣɛ́lɛ-maa kùla ŋ́gonôi.

⁷ Nûa da ŋ́gàa nɔ́ díkɛ ɣɛ́lɛ-maa kùla ŋ́gbonôi. Da kɛ̂ ɣɛ̂lɛi ḿâ, díkɛ díŋuŋ kpɛ̂mɛŋ a ńyãa.

⁸ Da kɛ̂ m̀ôi dîyɛɛi, “Gíli tɔɔ̂i Yâwɛɛ ma, tɔɔ ŋaŋ é ŋ̀uŋ ma ƃó. Tɔɔ Yâwɛɛ é ŋ̀uŋ ma ƃó, kpɛ́ni fêi, ǹíi lâai ǹyêei.”

⁹ Yá ƃé gɛ̀ ńee kɛ́ ḿaa sɔlɔ ƃô. Yá ƃé ḿɛi kâa tãi ŋá kɛ̀ la a kwâtarai.

¹⁰ É síɣe ḿaa sɔlɔ ƃó tãi ma, ŋ́gili tɔɔ̂i yá. Yá nɔ́ ƃa Ŋáɣâlai é síɣe ḿaa sɔlɔ ƃó tãi ma.

¹¹ Ífe ímaa kôya ḿâ, kpɛ́ni fêi, ŋ́gaa mɛni kpɔ̂lu su, ǹyaŋ núu da fé naa é kpɔŋ mâa tɛɛ ḿbɔ.

¹² Ŋ́gbɔara-ƃelai tínaŋɔɔ̂i ḿâ yɛ̂ɛ niŋa sîrɛ sɔŋ nyɔ́mɔɔ-ŋa. Dí tínaŋɔɔ̂i kpɔ́ ḿâ ńyee gwaa kélee mɛi. Dísɔŋ nyɔ̂mɔɔi yɛ̂ɛ Basãŋ niŋa sirɛ-ŋai.

¹³ Da kɛ̀ pâi ḿâ, da díla tàa yɛ̂ɛ yala-sulu.

¹⁴ Ŋáwala-walai kélee a kùla ńyêei yɛ̂ɛ yá a ƃɔ̀ a sɛŋ-folo. Ŋ́gao kélee a kula gbulɔ̂ŋ ŋá. Ńii a kérenîi ŋ́goi yɛ̂ɛ ŋɔŋ.

¹⁵ Ŋ́gɔ̂ŋ lá kpâlai yɛ̂ɛ ŋɔŋ ŋá leɣi folo. Ńɛŋ kánaŋɔɔ ŋ́gâno mu. Ya gɛ́ saa a lɛɣɛ a ńyãa.

¹⁶ Núu nyɔ́mɔɔ-ŋa tínaŋɔɔ̂i ḿâ, díkɛ ḿvàla-fala ŋ́gɔɔ da ńyee ma yɛ̂ɛ gbólo ɣila-ŋa.

¹⁷ Ŋ́gao kélee toɔɔ̂i banaŋ ma nyíi nûa da pɔ̂ri ǹônoi. Ŋ́gbɔara-ƃelai da ŋ́gàa nɔ́ díkɛ dísĩa mìi a ńyãa.

¹⁸ Dí kpɛɛŋ tôo ŋáseɣei mɛi, a gɛɛ dí gɔ́lɔŋ gbɛ̂ɛ ƃé a pâi lɛɛ̂i ǹyêei.

¹⁹ Kɛ́lɛ yá, óo Yâwɛɛ, ífe ímaa kôya ḿâ. Óo ŋákpɔŋ mâa-nuui, pá a maa félaa í ŋ́gula yêei kɛ́.

²⁰ Ŋ́gula yêei kɛ́ m̀óa-sɔkpɔ kɔ kɔ́-ƃelai yêei. Ŋáfulu-laai maa kɔ̃ɔ ŋ̀îla-ŋai ŋí yêei.

²¹ Ŋ́gula ǹyala-sulu-ŋai lá. Ŋ́gula ǹiŋa-sirɛ sɔŋ nyɔ́mɔɔ-ŋai mĩla ŋá.

²² M̀ɛnii yâ gɛ́i, ŋa pâi maa mɛni ƃôi ŋánûai dîa. Ŋa pâi ílaa ma tɛ̂i díkpɔŋ gîe ma kwaai ma.

²³ “Káai a Yâwɛɛ ŋɔtíi kɛ́-ƃelai ka ǹáa ma tɛ́. Káai a Zeeka ŋɔsuui su-ƃelai ka ƃaa kɛ́-maa tɛ́ɛ bɔ́. Eezuɛ-ƃela, ka Yâwɛɛ fɛli.

²⁴ Va ǹyée kùla gôlo-ƃelai mu da diai da mɔ̃lɛ̂i. Va bôlu fé dîɛ. Dà dòli kpɔŋ mâa mɛni ma, a díwoo su tòo.”

²⁵ Ŋa pâi ílaa ma tɛ̂i kpɔŋ kɛ́tɛ su mɛni-ŋai yâ gɛ́ ḿîi m̀ɛni ma. Ŋa pâi ŋákono teei ŋ̀aa-see kɛ̂i yɛ̂ɛ diai da ƃaa kɛ́-maa tɛɛ ípɔi díŋɛi-tuɛ.

²⁶ Diai pɔ̂ri mâa fé dîɛi, da pâi dílaa miî dí píla. Diai da Yâwɛɛ fɛlii, da pâi sɛɣɛ fêi tɛɛ̂i bɔ́. Tɔɔ dí mɛni kpɛtɛɛ-ŋai ŋ̀aa-see é kɛ́ díyêei wɔ́lɔ-wɔlɔ da wɔlɔ-wɔlɔ.

²⁷ Yâwɛɛ maa mɛ̂ni kíli a pâi lɛɛ̂i ŋ̀éniɛi su-ƃelai kélee kíli ŋá. Díkelee da pâi tînanii bɔ́ naa pêre. Sîi kélee a pâi kɛ̂i vɛlîi,

²⁸ kpɛ́ni fêi, gáa a kâloŋ ǹɔii ŋuŋ-ŋai kélee mɛi.

²⁹ Dɔɔ-ƃelai kélee da pâi pîlanii díŋume ŋá gɔ́ɔ mu. Diai kpîŋ saa wolo lai, da pâi pâi dí pɛ́lɛ gɔ́ɔ mu.

³⁰ Núu-kpune kélee a pâi Nuu-namui fɛlîi. Da pâi m̀aa mɛni ƃôi dílônii dîa.

³¹ Diai kpîŋ dífe niî dímaa sɔlɔ ƃó níi, da pâi m̀aa tûŋ mɛnîi a gɛɛ Yâwɛɛ a ŋɔnûai ŋuŋ ma ƃó.