Mąątɛ̨nɛ̨ 21 - Bible

Ɣâla láa maa tɛ́ɛ núu ŋɔkpɔara-ƃela yée mɛi ɣále mɛni ma

Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni mai

¹ Óo Yâwɛɛ, gâloŋ líi-nɛ̃ɛi kpɛ́ni fêi, ya wála-wala tɛɛ bɔ́, ǹyée a tɛɛ ŋɔkpɔara-ƃelai dîa.

² Zãai kélee a ŋ̀wɛ̂lii lai yâa dɛɛ bɔ́, a ŋɔfɛli-wooi su-toɔɔ.

³ Yâa íyee sée gâloŋ mu ya sãa lɛ́lɛɛ támaa tɛ́ɛ bɔ́, ya gôo kaloŋ-ƃɔrɔ see ŋ̀ûa.

⁴ È ímarê kɛ̀ fúlu-laa mɛni ma, í dɛɛ bɔ́, ǹyaŋ maa fûlu-laai káa ǹyêei wɔ́lɔ-wɔlɔ da wɔ́lɔ-wɔlɔ.

⁵ Gâloŋ ŋɔfólo-laai kɛ́tɛi ŋɔkpɔŋ-maai sârai. Yâ gɛ́ m̀u a wuyɛ ƃaa kɛ́-maa támaa kɛ́ ƃò nûa yêei m̀ɛni ma.

⁶ Ya lûwa láa ma wɔ́lɔ-wɔlɔ da wɔ́lɔ-wɔlɔ mɛni ma. Íkɛ-naai a ǹáa fɛ́ɛ a lii-nɛ̃ɛ.

⁷ Gâloŋ kíli tɔɔ̂i Yâwɛɛ ŋɔwála-wala-laai ma nyii gáa a Ŋ̀âla Kɛ́tɛi. Ǹyaŋ ŋ̀uŋ ma a pâi kɛ̂i a m̀oɔɔ, Yâwɛɛ ŋɔwɔ́lɔ-wɔlɔ wɛli kɛ-maai sârai.

⁸ Gâloŋ a pâi ŋɔkpɔara-ƃelai kélee sonîi. Diai kélee m̀ɛlɛ fé díkoi, a pâi dísônii.

⁹ Tãi a pâ lai, a pâi ŋɔkpɔara-ƃelai su karâi a ŋɔŋ. Yâwɛɛ a pâi ǹíi ŋwânai dîa, é dísu-kara a ŋɔŋ sôŋ.

¹⁰ Gâloŋ a pâi dísu karâi da dísuui kélee. Dítɔnɔ kpîŋ da fé pâi lɛɛ̂i ɣele ma a vúlu.

¹¹ Da pâi mɛni nyɔ́mɔɔ kpɛtɛ̂i é pîlaŋ ma dí gbã tée berêi, kɛ́lɛ dímɛni kpɛtɛɛi ŋ̀aa-see fé pâi kɛ̂i.

¹² A pâi ŋɔkerâŋ ŋáa tɛ̂i dîa, é gɛ́ dí pú.

¹³ Yâwɛɛ, kwa ílaa maa tɛ̂i íkɛ-mɛni kpaya-kpayai mɛ̂ni ma. Kwa pâi laa maa-tɛ wule-ŋa toôi, kú ílaa maa tɛ́ íwala-wala-laai mɛ̂ni ma.