Mąątɛ̨nɛ̨ 20 - Bible

Ɣâla fɛ̀liɛɛ a gɛɛ núu é ŋɔkpɔara-ƃela yée mɛi ɣále

Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni mai

¹ Tɔɔ Yâwɛɛ é íwoo su too tãi ya kɛ̂ la mɛni kpɔ̂lu sui. Tɔɔ Zeeka Ŋɔɣâlai é ímaa kɔ̃ɔ.

² Tɔɔ é kpɔŋ mâa tɛɛ ípɔ nyii kulâi Ŋɔkwaa Maa-waai ma, Zãiyɔŋ Yeei ma.

³ Tɔɔ é ǹyée sée ísama-sãai mu, da ísâla-sãai.

⁴ Tɔɔ é zãai kélee tɛ́ɛ ípɔ ya ŋ̀wɛ̂lii, é ímɛni kpɛtɛɛ-ŋai kélee ŋàa sèe kɛ́.

⁵ Tɔɔ kú lii-nɛ̃ɛ kula, kpɛ́ni fêi, íyee a tɛɛ kúkpɔara-ƃelai dîa. Ǹyaŋ kwa pâi kúƃenâ-ŋai tɛ̂i ɣelêi Kúɣâlai láai su. Tɔɔ Yâwɛɛ é gɛ́ ífɛli-wooi kélee ŋ̀aa-see é kɛ́.

⁶ Ŋâa gɔ́lɔŋ nâa a gɛɛ Yâwɛɛ a wála-wala-laa tɛ̀ɛ gâloŋ pɔ́ nyii a zìɣe zui díkpɔara-ƃelai yée mɛi ɣále mɛni ma. Ǹyaŋ a pâi kɛ̂i ŋɔkwaa maa waai ma ŋ̀elei su gɛ́ díwoo su tòo a ŋɔwála-walai.

⁷ Da-ŋa da kɛ̂ yoŋka teêi a díkɔ kɔ́-keleŋ-ŋai da díkɔ kɔ́-soo-ŋai, kɛ́lɛ kwa yoŋka tèe a Kúɣâlai Yâwɛɛ láa.

⁸ Da pâi karêni dí tóo, kɛ́lɛ kwa pâi kúmu siɣêi kú tɔ́ɔ ɣelêi.

⁹ Óo Yâwɛɛ, kwa ífɛlîi a gɛɛ í wála-wala tɛɛ gâloŋ pɔ́ é ŋɔkpɔara-ƃelai yée mɛi ɣále. Kwa ítòli, kúwoo su too.