Mąątɛ̨nɛ̨ 2 - Bible

Gâloŋ Ɣâla è zìɣe zui

¹ Lɔii-ŋuŋ-ŋa da tɔ̂ɔ Ɣâla ma lé mɛni ma? Nûa da tɔ̂ɔ Ɣâla ma kpɛ́ni-kpɛni lé mɛni ma?

² Ǹɔii kâloŋ-ŋai da tɔ̂ɔ Ɣâla ma. Ǹúu láa túɛ-ƃelai da mɛni nyɔ́mɔɔ kpɛ̀tɛ Yâwɛɛ mɛni ma da gâloŋ è zìɣe zui.

³ Da m̀o dîyɛɛi, “Kwaa kúkpîŋ ŋuŋ ma ƃó díyêei. Kúfe ŋɔ́nɔ pâi kɛ̂i díwala-walai mu.”

⁴ Yâwɛɛ a seêni ŋɔkâloŋ see-sɛŋ ŋá ɣâla-taa gɛ́ ɣɛlɛ dîa. A ɣɛlɛ̂i dîa kpɛ́ni fêi, m̀ɛnii da gbɛtɛ̂i, gáa nɔ́ kpɛ́ni-kpɛni.

⁵ A pâi dí lia-woo ƃôi a lii-ŋwana-woo, é dímaa yao a ŋɔlii ŋwânai ǹyɛɛ dîai,

⁶ “Ŋâa ŋákâloŋ sée Zãiyɔŋ Yeei ma nyii gáa a ŋáyee maa waai.”

⁷ Gâloŋ è m̀o ǹyɛɛi, “Ŋa pâi Yâwɛɛ ŋɔtɔ̂ŋ maa mɛ̂ni toôi a lolo.” Yâwɛɛ è m̀o ḿâ ǹyɛɛi, “Ńyãa ƃe ímaa sɔlɔ ƃô. Yâa sâa kɛ́ a nóŋ.

⁸ Ḿarê kɛ́, ǹyaŋ ŋa pâi ǹɔii-ŋûŋ-ŋai kélee tɛɛ̂i ípɔ. Ŋa pâi ŋ̀éniɛi gwaa kélee tɛɛ̂i ípɔ gɛ́ ƃò a íkɔ̃liŋ.

⁹ Ya pâi díyee mɛi ɣâlei a kɔli sɔ̂kpɔ. Ya pâi dísu-karâi yɛ̂ɛ núu a pɔrɔ leɣi wòlo-wolo.”

¹⁰ Óo kâloŋ-ŋa, ka káwoli tɔ́ɔ ǹîa-wooi ŋí ma. Káai a ǹɔii láa túɛ-ƃelai, ka m̀ɛnii ŋí maa kɔ́ri.

¹¹ Ka tíi kɛ́ Yâwɛɛ mì, ká ƃaa kɛ́-maa tɛ́ɛ bɔ́, ka kɛ́ kpɛ̃lini a yao

¹² ká tóo gɔ́ɔ mu ká gɔ́ɔ sóŋ. A wàla kɛ́ tí, a pâi ǹíi ŋwânai kâa é káŋuŋ lá píli, kpɛ́ni fêi, mɛni lôŋ nɔ́ ƃa ŋɔlii ŋwânai su kɛ̀tɛ. Lûwa káa diai kélee dîa díkili tɔɔ̂i mà dí mɛi káa mɛni mai.