Mąątɛ̨nɛ̨ 19 - Bible

Ɣâla kpɛtɛ-sãai a ŋɔfólo-laai lɛ̀

Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni mai

¹ Ŋ̀ele-kɔlɔŋ-ŋai da Ɣâla ŋɔfólo-laai lɛ̂i a zu ponoɔɔ, ŋ̀elei kɛ́ ŋɔtíi-ŋai lɛ̂.

² Ɣele lá-ƃoɔɔ kélee a ŋɔfólo-laai lɛ̂, kpíni kélee kɛ́ ŋɔfólo-laai lɛ̂.

³ Dífa lôno yɛ̂ɛ núu-kpune a kɛ̀ laa ma-tɛ tɛɛ̂i. Núu fa díwoo mɛ̀ni.

⁴ É máŋ kɛ́ tí, díworɛ̂-wooi a seri ǹɔii gwaa kélee. Nûa da ŋ̀orɛ̂-wooi ŋí mɛ̀ni ŋ̀éniɛi gwaa kélee. Ɣâla è ŋ̀elei kpɛ̂tɛ é naa kɛ́ a vóloi kɛ̂i.

⁵ Vóloi a ƃêla a ɣele-wala a lii-nɛ̃ɛ yɛ̂ɛ surɔ̂ŋ a kùla ŋɔnɛnîi maa sɛŋ kɔlɛ̂i, gɛ́ pà la bɔ́-taai a lii-nɛ̃ɛ, yɛ̂ɛ kɔ-kuluƃa a kùla gbɔara-ƃela yée mɛi ɣâlei.

⁶ Vóloi a kûla ǹɔii m̀éla dɔnɔ ma é lí gbéli ma, é tínaŋ é lí gbélii ma pere. Ǹyaŋ núu da fa pɔ̂ri ǹoôi ŋɔzi-zii yêei.

Yâwɛɛ ŋɔtɔ̂ŋ

⁷ Yâwɛɛ ŋɔtɔ̂ŋ káa a tɔ̃yâ tɔŋ. A kponoi-kpanaŋ tɛ̀ɛ núu pɔ́. Núu a pɔ̂ri gíli tɔɔ̂i Yâwɛɛ ŋɔtɔ̂ŋ mà. A kíli-ŋa pôno tɛ̀ɛ diai pɔ́ díkili ŋá teɣîɛɛi.

⁸ Yâwɛɛ ŋɔtɔ̂ŋ sãai. Diai da lâa lai da lii nɛ̃ɛ kùla. Yâwɛɛ ŋɔtɔ̂ŋ káa a tɔ̂ŋ maa waa. A núu ŋɛ́i-la ƃò.

⁹ Núu yaoɔ Yâwɛɛ ma káa a mɛni maa waa. Gáa a wɔ́lɔ-wɔlɔ da wɔ́lɔ-wɔlɔ mɛni. Yâwɛɛ ŋɔmɛni ŋá-teɛɛi káa a tɔ̃yâ mɛni ŋá-teɛɛ. Ŋɔɣele kélee mɛni ŋá-teɛɛi káa a teniŋ ƃo-pere.

¹⁰ Ŋɔmɛni ŋá-teɛɛi lɛ̂lɛɛi é tɛ́ɛ gôo lɛ́lɛɛ ma. Ǹɛ̃ɛ̂i máŋ é tɛ́ɛ gɔ̃́iŋ wûlɔi ma nyii a kùla kɔ̃́iŋ-kpaŋ sui.

¹¹ Ŋɔtɔ̂ŋ ƃa táre tɛ̀ɛ ḿbɔ ńyãai a ŋɔyée mu-nuui. Ŋa dímɛi kâa, ŋa pâi mɛni lɛ́lɛɛ sɔlɔ ƃôi zu.

¹² Núu da fa gbîŋ ŋɔpɔara maai kâa. Yâwɛɛ, ŋ́uŋ ma ƃó í ŋ́gula loo mɛni nyɔ́mɔɔ-ŋa kɛ́ɛ su.

¹³ Ífe ǹɛɛ naa mɛnii nyii-ŋai ŋá díkɔlɔŋ dínyɔmɔ̂ɔ ŋ́gɛ díkɛ. Ífe ǹɛɛ naa ŋá kɛ́ a dí luɛ. Fé pâi ŋɔ́nɔ mɛni nyɔ́mɔɔ da kélee kɛ̂i, a gɛɛ ŋá kɛ́ ŋa ŋ́uŋ ma ƃóɔɔ sɔnyɔ̂ŋ yêei.

¹⁴ Tɔɔ m̀ɛni-ŋai kélee ŋa m̀ôi da nyii-ŋai kélee ńii sui, díkɛ a ílii láa mɛni-ŋa, óo Yâwɛɛ, yái íkaa a ŋá kili tɔɔ-maa kɔnii da ŋ́uŋ ma ƃó-nuui.