Mąątɛ̨nɛ̨ 16 - Bible

Kili-kɛ-zu Ɣala-fɛliɛɛ

Deeƃé ŋɔwulei

¹ Ḿaa kpɛ́ óo Ɣâla, kpɛ́ni fêi, yá ƃé ńâai a yá ŋ́uŋ ma ƃó mɛni ma.

² Ŋá m̀o Yâwɛɛ ma ńyɛɛ̂i, “Yá ƃa Ŋánuu-namui. Zɛŋ lɛ́lɛɛi kélee ŋa zɔlɔ ƃôi, yá ƃé a kûla íyêei.”

³ Ínuu maa waa-ŋai maa mɛ̂ni kpanaŋɔɔ̂i. Ńii lâai a dímaa mɛ̂ni.

⁴ Diai da díkili tɔ̀ɔ ɣâla da kpɛ́ni-ŋa dîai, dímɛni kpɔ̂lui su a pâi kɛ̂i nɔ́ kɛ̂tɛi. Fé pâi ńyee pîlii dísâla kula mɛni-ŋai da su. Fé pâi díɣâla-ŋai da fɛlîi.

⁵ Yâwɛɛ, yá ƃé ŋ́gili tɔɔ̂i yâ. Zɛŋ kélee ŋa wɛ̂li lai yá ƃa dɛ̀ɛ ḿbɔ. Yá ƃé ŋ́gili káa yâ ŋáfulu-laai mɛni ma.

⁶ Ísama-sãai mɛni kpanaŋɔɔ̂i. Díkaa a kɔ̃liŋ mɛni kpanaŋɔɔ ńyêei.

⁷ Ŋa Yâwɛɛ láa ma tɛ̀, kpɛ́ni fêi, ǹyaa ƃa ńdeniŋ tɔ̀ɔ. Ńii a ńdeniŋ tɔ̀ɔ a kpíni.

⁸ Yâwɛɛ maa mɛni kíli fa wɔ́lɔ kpɛ̀ɛ ŋ́gili ŋá, kpɛ́ni fêi, gáa ŋ́gɔlɛ a tãi kélee, ǹyaŋ mɛni da fa pɔ̂ri kɛ̂i a ńyãa.

⁹ M̀ɛni ma, ńii nɛ̃ɛ̂i, ŋ́gɛ koi-nɛ̃ɛ kùla, ŋ́gɛ sɛɣɛ-fei tɛ̀ɛ kpɛ́ni fêi, ŋ́uŋ ma ƃôɔɔi.

¹⁰ Ya ŋ́gula saa ŋɔwála-walai yée mu. Ŋa tíi kɛ́ yɛ̂ a teniŋ ƃô-pere, ǹyaŋ ífe pâi wɔ́lɔ ǹɛɛ̂i naa ŋá lɛ́ɛ saa ŋɔwála-walai mu.

¹¹ Ya vúlu-laa perei lɛ́ ḿâ. Ŋà kɛ̀ íŋɛi-tuɛ, lii-nɛ̃ɛ káa ḿâ. Ŋà kɛ̀ ílaa mii-yee mɛi-pere, ńii a kɛ́ a ǹáa wɔ́lɔ-wɔlɔ da wɔ́lɔ-wɔlɔ.