Mąątɛ̨nɛ̨ 148 - Bible

Ɣâla láa maa tɛ́-mɛni ŋɔkpɛtɛ-sãai dîɛ

¹ Ka Yâwɛɛ láa maa tɛ́. Káai ŋ̀elei su-perei, ka ǹáa maa tɛ́. Káai ŋ̀elei su-mɛi-perei, ka ǹáa maa tɛ́.

² Ɣâla-taa kêla-ŋa kélee, ka ǹáa maa tɛ́. Káai kélee a gɔ́ kɔ́-ƃelai ŋ̀elei su-perei, ka ǹáa maa tɛ́.

³ Fólo, ka ɣáloŋ, ka ǹáa maa tɛ́. Pɛmɛlɛ̂ŋ-kao-ŋa, ká kélee ka ǹáa maa tɛ́.

⁴ Káai kélee ŋ̀elei su-pere póŋ-poŋ, ka ǹáa maa tɛ́. Káai a ǹyá-ŋai ŋ̀elei su-mɛi perei, ka ǹáa maa tɛ́.

⁵ Tɔɔ díkelee dí Yâwɛɛ láa maa tɛ́, kpɛ́ni fêi, è sɛŋ kélee kpɛ̀tɛ a ŋ̀óo.

⁶ È dípù ƃɛ́i maa nɛ̃ɛ̂i díkɛ naa wɔ́lɔ-wɔlɔ da wɔ́lɔ-wɔlɔi. Dífa pɔ̂ri díkpîŋ maa fálenîi. È tɔ̂ŋ kpɛ̀tɛ nyíi m̀aa fa wɔ́lɔ fàleŋ.

⁷ Káai kélee ŋ̀éniɛi sui, ka Yâwɛɛ láa maa tɛ́. Yûoi zele-kali-ŋa, da yúo kpóŋ ma sãa kélee, ka ǹáa maa tɛ́.

⁸ Ɣele gbâna, sãɔɔ, kɔ́lɛ da ɣele-kɔlɔŋ-ŋa, ka ǹáa maa tɛ́. Káai a vãa su-kpanaŋɔɔ-ŋai ka ŋ̀óo mɛnii, ka ǹáa maa tɛ́.

⁹ Yée pɛlɛ-pɛlɛɛ da gbaya-kpayaa-ŋa, ka ǹáa maa tɛ́. Káai a m̀á wuru-ŋai ka ŋ̀olâ wuru-ŋai, ka ǹáa maa tɛ́.

¹⁰ Fɛnɛ-sãa, taa-tulɛ-ŋa, ka ǹáa maa tɛ́. Tɔara sãa ka ŋ̀ɔni-ŋai da kôoŋ, ka ǹáa maa tɛ́.

¹¹ Kâloŋ-ŋa, ka ǹáa maa tɛ́. Núu-kpune-ŋa kélee, ka ǹáa maa tɛ́. Nûa láa túɛ-ƃela ka m̀ɛni sâa ƃôo-ƃelai, ka ǹáa maa tɛ́.

¹² Nɛnî-kpela-ŋa da nyáŋkpa-ŋa, ka ǹáa maa tɛ́. Núu pɔlɔ-ŋa da nîa-pɛlɛɛ, ka ǹáa maa tɛ́.

¹³ Tɔɔ dí kélee dí Yâwɛɛ láa maa tɛ́. Ǹáa tɛɛ̂i láa sîi kélee ma ǹɔii ma ƃɛ́. Ŋɔfólo-laai tɛɛ̂ ŋ̀elei su, da ǹɔii ma sãai kélee dîa.

¹⁴ A gɛ̀ ŋɔlɔii-ŋuŋ su é kpanáŋ a gɛɛ ŋɔnûai dí ǹáa maa tɛ́. Eezuɛ-ŋai maa mɛni kpanaŋɔ̂i mà. Ka Yâwɛɛ láa maa tɛ́.