Mąątɛ̨nɛ̨ 147 - Bible

Ka Ɣâla láa maa tɛ́

¹ Ka Yâwɛɛ láa maa tɛ́. Ǹɛ̂lɛɛi a gɛɛ kú laa maa tɛ̂ wule too Kúɣâlai ma. Gáa a tɔ̃yâ mɛni lɛ́lɛɛ a gɛɛ kú ǹáa maa tɛ́.

² Yâwɛɛ a Zerusâlɛŋ tɔɔ̂i ŋɔ́nɔ pôlu. A pâi pâi pôlu a gɔ-soŋ-ŋai.

³ A pâi dípala-ŋai ŋá ɣirîi. Diai dílii toɔ̂ɔi pôlui, a pâi dí díŋa nɛnɛ̂i.

⁴ Bɛmɛlɛŋ kao-ŋai ŋ̀elei sui è díkɔni kɔ́lɔŋ. È díkelee dílaa kɔ́lɔŋ.

⁵ Kúɣâlai Yâwɛɛ kɛ̂tɛi, ŋ̀wála-walaa. Núu da fa ŋɔtárei kɔ̀ɔŋ sɛŋ da ma.

⁶ A kpɔŋ mâa tɛ̀ɛ diai pɔ́ dímaa yeŋɔ̂ɔi, é gɛ́ dí dímu siɣe dí tɔ́ɔ. Kɛ́lɛ a ŋ̀wana-lɔ̂ɔ-ƃelai tôo ǹɔii ma.

⁷ Ka sɛɣɛi-fei wule too Yâwɛɛ ma, ká ɣale-sãa ɣale, ká wule nɛ̃ɛ-ŋa too Kúɣâlai ma.

⁸ È ŋ̀ele-kɔlɔŋ-ŋai pɛ̂lɛ ŋ̀elei su. A gɛ̀ tuna kɛ́ pù, ǹɔii kɛ́ yɔ̀ɔ, é gɛ́ gala-ŋai díkɛ lɛ̀lɛ ǹyée-ŋai ma.

⁹ A zua-ŋai kɔ́nɔ̃ŋ kùla, da gɔ̃ɔ lonii nyii-ŋai da wɔ̂lɔ m̀ai.

¹⁰ Soo-ŋa díwala-wala mɛni da fa ǹíi kùla ma, kpaa máŋ kɔ-kuluƃa wála-wala-ŋa lii kpeleɛɛ-ŋa mɛni.

¹¹ Kɛ́lɛ è diai wɛ́lini da ƃaa kɛ́-maa tɛ̀ɛ bɔ́, dí láa a ŋɔwɔ́lɔ-wɔlɔ wɛli kɛ́-maai mɛ̂ni.

¹² Óo Zerusâlɛŋ, ye laa maa tɛ tɛɛ Yâwɛɛ pɔ́. Óo Zãiyɔŋ, Íɣâlai láa maa tɛ́.

¹³ Ǹyaa ƃa ísiɣãŋ-ŋai mɛi kâa, gɛ́ lûwa làa ínûai dîa.

¹⁴ A kálɔii ŋɔgɔyɛŋ pere-ŋai maa kɔ̃̂ɔ, gɛ́ mii-sãa lɛ́lɛɛ-ŋa tɛ̀ɛ kápɔ.

¹⁵ M̀ɛnii a mò a gɛɛ é kɛ́i, ǹyaa ƃa kɛ̂. M̀ɛnii kélee a mò a gɛɛ é kɛ́i, a kɛ̂ a maa félaa.

¹⁶ A gɛ̀ kɔ́lɛ é pɛ́lɛ ǹɔii mɛi yɛ̂ɛ bilaŋkîti, ǹúui é táa-taa yɛ̂ɛ muluŋ kpôlo.

¹⁷ A gɛ̀ sãɔɔ é táa-taa yɛ̂ɛ kɔni-kayaŋ. Gɔ́lɛi a kûla ǹyêei, núu da fa pɔ̂ri tɔɔ̂i berêi.

¹⁸ Ŋ̀óo a kɔ́lɛ kane sèɣeŋ. A gɛ̀ fãa é tɛ́ɛ, gɔlɛ-kanei é séɣeŋ, gɛ́ ɣìliŋ yɛ̂ yá.

¹⁹ È ŋɔworɛ̂-wooi ƃô Zeeka ŋɔsuui su-ƃelai dîa, é ŋɔtɔ̂ŋ da zu mɛni-ŋai ŋá lɛ́ Eezuɛ-ƃelai kpéli-ŋai dîa.

²⁰ Vé tá gɛ́ ní tí a lɔii-ŋuŋ da kpɛ́ni su-ƃela nyii-ŋai dífe ŋɔtɔ̂ŋ kɔ́lɔŋ. Ka laa maa tɛ̂ tɛɛ Yâwɛɛ pɔ́.