Mąątɛ̨nɛ̨ 146 - Bible

Laa maa tɛ́ é tɛ́ɛ Kúƃalo-nuui Ɣâla pɔ́

¹ Ka laa maa tɛ̂ tɛɛ Yâwɛɛ pɔ. Ŋa pâi Yâwɛɛ láa maa tɛ̂i a ńii kélee.

² Ŋa pâi ǹáa maa tɛ̂i ŋákɛ ɣéniɛi su. Ŋa pâi wule toôi Ŋáɣâlai ma ŋákɛ ɣéniɛi su.

³ Ífe íkili tɔ̀ɔ ǹúu láa túɛ-ƃelai dîa, núu-kpune da fa pɔ̂ri íƃâloi.

⁴ Tãi da sâa lai, da pâi kɛ̂i pôlu a pɔ̂rɔ. Ŋ̀ele tɔ̂nɔi tí nɔ́ ƃé dí mɛni kpɛtɛɛ-ŋai kélee a pâi kperâi la.

⁵ Lûwa káa diai dîa Zeeka Ŋɔɣâlai a kpɔŋ mâ tɛ̀ɛ dí pɔi, da diai da díkili tɔ̀ɔ Díɣâlai Yâwɛɛ mai,

⁶ nyii ŋ̀elei, ǹɔii, da yúo kpɛ̀tɛi, da zãai nyii-ŋai gáa dí sui. A ŋɔkono-teei kélee ŋ̀aa sèe kɛ̀.

⁷ A mɛni ŋá tèe a ǹɛ́lɛɛ diai nûa da dí mɔ̃̂lɛi dímɛni ma, gɛ́ mii-sɛŋ tɛ̀ɛ diai pɔ́ puru a díkɛ̂i. Yâwɛɛ a diai ŋuŋ mâ ƃò nyii-ŋai díkaa kpini-pɛrɛ mui,

⁸ gɛ́ ŋ̀ɛi-pu-ƃelai ŋɛ́i-la ƃò. A ǹúu doo-mu-ƃelai, mù sìɣe, deniŋ ƃô-ƃelai wɛ́li kɛ́ ƃò m̀a.

⁹ A ŋɔ̃ya-ŋai díkaa kúlɔii sui maa kɔ̃̂ɔ. Gɛ́ kpɔŋ mâa tɛ̀ɛ dee-loŋ-ŋai da bɔɔ-nɛyãai pɔ, kɛ́lɛ, a ŋ̀wana-lɔ̂ɔ-ƃelai dímɛni kpɛtɛɛi su kàra.

¹⁰ Yâwɛɛ káa nɔ́ a kâloŋ wɔ́lɔ-wɔlɔ da wɔlɔ-wɔlɔ. Óo Zãiyɔŋ, Íɣâlai a pâi kɛ̂i wala-wala-laa su a tãi kélee. Ka Yâwɛɛ láa maa tɛ́.