Mąątɛ̨nɛ̨ 145 - Bible

Laa maa tɛ́ wule

Deeƃé ŋɔlaa maa tɛ́ wulei

¹ Ŋáɣâlai da Ŋákâloŋ, ŋa pâi ílaa maa tɛ̂i. Ŋa pâi ílaa maa tɛ̂i wɔ́lɔ-wɔlɔ da wɔlɔ-wɔlɔ.

² Ŋa pâi ílaa maa tɛ̂i a ɣele kélee. Ŋa pâi ílaa maa tɛ̂i wɔ́lɔ-wɔlɔ da wɔlɔ-wɔlɔ.

³ Yâwɛɛ kɛ̂tɛi, ǹyaŋ gáa a sɛŋ kú laa maa tɛ́ kɛ́tɛ tɛ́ɛ ƃɔ́. Ŋɔkɛ́tɛ-laai tɛɛ̂i kú mɛni ŋá káai ma.

⁴ Núu sûu tɔnɔ a pâi ílaa maa tɛ̂i m̀ɛnii kpaya-kpayai ya gɛ̂i, m̀ɛni ma díƃarâai dîa. Dia máŋ dí m̀ó díƃarâai dîa. Da pâi ítii kpaya-kpayai maa mɛ̂ni ƃôi.

⁵ Da pâi ímaa-waa laai da íkɛtɛ-laai maa tûŋ toôi, ǹyaŋ ŋa pâi ŋ́gili-ŋa siâi é pîlaŋ m̀ɛni kpaya-kpayai ya gɛ́i dîa.

⁶ Núu kélee a pâi ítii kpaya-kpayai maa mɛ̂ni ƃôi, ǹyaŋ ŋa pâi íkɛtɛ-laai maa mɛ̂ni ƃôi.

⁷ Da pâi lônoi é pîlaŋ ítûa-pere lɛ́lɛɛi ma, dí wule tóo é pîlaŋ íteniŋ ƃô-laai ma.

⁸ Ɣâla Yâwɛɛ káa a maloŋ kâa da wɛli kɛ́-maa Ɣala. Vá ǹíi ŋwàna a maa félaa, kɛ́lɛ ŋɔwɛli-kɛ-maai káa naa wɔ́lɔ-wɔlɔ.

⁹ Yâwɛɛ sɔŋ lɛ̂lɛɛi núu kélee mɛni ma, zãâi kélee è gbɛ̀tɛi, gélee malôŋ káa mà.

¹⁰ Óo Yâwɛɛ, íkpɛtɛ sãai kélee da pâi ílaa maa tɛ̂i. À kɛ̀ tí ínûai kélee da pâi ísɛɣɛ̂i fêi.

¹¹ Da pâi íkâloŋ-laai ŋɔfólo-laai maa tɛ̂i. Da pâi íwala-wala-laai maa mɛ̂ni ƃôi,

¹² a gɛɛ núu kélee é íwala-wala laai kɔ́lɔŋ, da íkâloŋ-laa kɛ́tɛi ŋɔwála-wala laai.

¹³ Íkâloŋ-laai káa naa wɔ́lɔ-wɔlɔ, ǹyaŋ íkaa a kâloŋ wɔ́lɔ-wɔlɔ. Yâwɛɛ teniŋ ƃôɔɔi ŋɔkono-tee-ŋai kélee su. Ŋɔmaloŋ kâai káa gɛ́-mɛni kélee su.

¹⁴ A kpɔŋ mâ tɛ̀ɛ diai pɔ́ díkaa mɛni kpɔ̂lu sui, diai da tôoi, é dí mu siɣe.

¹⁵ Fúlu-sɛŋ kélee kíli tɔɔ̂i yâ, ǹyaŋ ya mii-sɛŋ tɛ̀ɛ dí pɔ́ a tãi da ŋ̀wɛ̂lii lai.

¹⁶ Ya sɛŋ tɛ̂ɛ dí pɔ́ a íyee láa ƃóɔɔ, díkelee dípila, dílii é láa.

¹⁷ Yâwɛɛ teniŋ ƃôɔɔi, gɛ́-pere kélee su, dûa-pere kélee kɛ́ ƃò a maloŋ kâa-pere.

¹⁸ Yâwɛɛ káa diai kélee da dòlii díkɔlɛ ma, diai da dòli a teniŋ ƃô-perei.

¹⁹ Diai da dòlii a lii sêe tɛ̀ɛ dí pɔ́. A díwɔlɔ-wóo m̀ɛni é díŋuŋ ma ƃó.

²⁰ Diai kélee Yâwɛɛ wɛ́linii, a dímɛi kâa, kɛ́lɛ, a pâi ŋ̀wana-lɔ̂ɔ-ƃelai su karâi.

²¹ Ŋa pâi Yâwɛɛ láa maa tɛ̂i a ɣele kélee. Tɔ̂ɔ zãâi Ɣâla è gbɛ̀tɛi, gélee é ǹaa maa tɛ́ wɔ́lɔ-wɔlɔ da wɔlɔ-wɔlɔ.