Mąątɛ̨nɛ̨ 137 - Bible

Eezuɛ ƃelai dí malôŋ see kɛ̀ Babelɔŋ lɔii su

¹ Kú kɛ́ɛ seêni ǹyá-lee ŋai kɔlɛ Babelɔŋ lɔii sui, kú wɔ̀lɔ tãi Zãiyɔŋ mɛni kíli è tòo la kú ŋái.

² Kú kúkɔnîŋ-ŋai sɛ̂lɛŋ walo-wuru-ŋai dîa kɛ̀ kú kɔlɛi.

³ Diai lì a kúa gɔ-soŋ laa sui, dí kɛ̀ dîɛ fɛ́ɛ kú wule tóo. Dí mò a gɛɛ kú pêle kɛ́ dîa: “Ka wule tóo kûa é pîlaŋ Zãiyɔŋ ma.”

⁴ Kwa pɔ̂ri wule too pêre kɛ̂i léŋ Yâwɛɛ ma lɔii da kpɛ́ni su?

⁵ Óo Zerusâlɛŋ, à kɛ̀ ŋà nìa yâ, gɛ̀ ní ḿve ŋɔ́nɔ kɔnîŋ ɣàle.

⁶ À kɛ̀ ŋa nìa yâ, ŋà wàla ŋ́gili ŋá sía é pîlaŋ yâ a gɛɛ yá ƃé í káa a ŋálii-nɛ̃ɛ kɛ́tɛi, gɛ̀ ní ḿve ŋɔnɔ pɔ̀ri wule toôi.

⁷ Yâwɛɛ, m̀ɛnii Idɔŋ-ƃelai dí gɛ̀i, gíli é lɛ́ɛ íŋa, a tài dí Zerusâlɛŋ kula yêei kɛ̀ lai. Gíli é lɛ́ɛ íŋa a gɛɛ díkɛ m̀ôi dîyɛɛi, “Ka ŋ̀ólo ká ǹaa lɛɛ a yɛ́ɛ ŋá.”

⁸ Babelɔŋ, nûa da pâi a gɛɛ dí í su kara. Lûwa káa diai dîa pâi mɛni kpâ kulâi yâi, m̀ɛnii í gɛ̀ a kúai, m̀ɛni ma.

⁹ Diai pâi kánîa-pɛlɛɛi sonîi, dí dítoo kɔni mâi, lûwa a pâi kɛ̂i dîa.