Mąątɛ̨nɛ̨ 135 - Bible

Laa maa tɛ̂ wule

¹ Ka Yâwɛɛ láa maa tɛ́. Káai kélee a Yâwɛɛ ŋɔtíi kɛ́-ƃelai, ka ǹáa maa tɛ́.

² Káai kélee ka tíi kɛ̀ Yâwɛɛ mì Ɣâla Ŋɔpɛ́rɛ Kɛ́tɛi mui,

³ ka Yâwɛɛ láa maa tɛ́. Ka ǹáa maa tɛ́, kpɛ́ni fêi, zɔŋ lɛ̂lɛɛi. Ka laa maa tɛ̂ wule-ŋa too m̀a, kpɛ́ni fêi, gáa a mɛni lɛ́lɛɛ a gɛɛ ká gɛ́ tí.

⁴ È Zeeka da Eezuɛ-ŋai sîɣe zu a ǹyaa kpîŋ ŋɔnûa.

⁵ Ŋá gɔ́lɔŋ Yâwɛɛ kɛ̂tɛi. Gɛ̂tɛi é tɛ́ɛ ŋ̀âla-ŋai kélee dîa.

⁶ M̀ɛni-ŋai kélee a ŋ̀wɛ̂li é gɛ́ ŋ̀elei su, ǹɔii ma, yúo su, da yúo káo ma kéleei, a gɛ̀.

⁷ Ŋ̀ele-kɔlɔŋ-ŋai kélee ǹɔii mɛi, ǹyaa ƃé díkpɛ̀tɛ. È ŋ̀ele gbâna kpɛ̀tɛ, tuna a kɛ̀ pûi, gɛ́ làɣi. Ǹyaa ƃa gɛ̀ fãa kɛ́ tɛ̀ɛ.

⁸ È Ize-ƃelai dílônii sinaai maa-ŋuŋ-ŋai da dítaa tûlɛ-ŋai dílônii maa-ŋuŋ-ŋai kélee pàa.

⁹ È gâloŋ da ǹɔii láa túɛ-ƃela kpaya-kpayai kula maa kɛ̂, a ŋɛ́i kɛ́-maa sîi támaa da mɛni mĩli-mĩliɛɛ sii-ŋa.

¹⁰ È lɔii-ŋuŋ-ŋa su kàra, é kâloŋ wála-walaa-ŋa támaa páa.

¹¹ È Amora-ŋai díkâloŋ Siɔŋ pàa, é pɛ́lɛ Basãŋ kaloŋ Oŋ, da Keena kaloŋ-ŋai kélee.

¹² È dílɔii tɛ̂ɛ ŋɔnûai Eezuɛ-ŋai pɔ́ a díkɔ̃̂liŋ.

¹³ Yâwɛɛ, ílaa a pâi kɛ̂i ɣele ma wɔ́lɔ-wɔlɔ da wɔlɔ-wɔlɔ. Ílaai maa mɛ̂ni a pâi lɛɛ̂i núu kélee kíli ŋá.

¹⁴ Yâwɛɛ a pâi ŋɔnûai Eezuɛ-ŋai malôŋ kâai, é dímaa kɔ̃ɔ.

¹⁵ Núu-kpune ƃé ǹɔii ŋuŋ-ŋai díɣâla pɔkɔɔŋ-ŋai kpɛ̂tɛ. Dí díkpɛ̀tɛ nɔ́ a káne da gôo tee-tee.

¹⁶ Díla káa dîa, kɛ́lɛ dífa lôno. Díŋɛi káa dîa, kɛ́lɛ dífa kwaa kâa.

¹⁷ Díwoli káa dîa, kɛ́lɛ dífa mɛni mɛ̂ni. Dífa pɔ̂ri kpîŋ lɛ̂woi.

¹⁸ Díkaa nɔ́ yɛ̂ɛ díkpɛtɛ-ƃela. Ǹúui a gíli tɔ̀ɔ dîai, maa nuui a pâi kɛ̂i nɔ́ yɛ̂ɛ dia.

¹⁹ Eezuɛ-ƃela, ka Yâwɛɛ láa maa tɛ́. Káai a Eelɔŋ ŋɔsuui su-ƃelai, ka ǹáa maa tɛ́.

²⁰ Káai a Liiva suui su-ƃelai, ka ǹáa maa tɛ́. Káai ka vɛ̀lii, ka ǹáa maa tɛ́.

²¹ Ka Yâwɛɛ láa maa tɛ́ Zãiyɔŋ. Káai Zerusâlɛŋ, ka ǹáa maa tɛ́. Ka Yâwɛɛ láa maa tɛ́.