Mąątɛ̨nɛ̨ 132 - Bible

Yâwɛɛ káa nɔ́ ŋɔnûai kɔlɛ a tãi kélee

Ɣâla fɛli wule

¹ Yâwɛɛ, ífe nìa Deeƃé ma da berei sîi è mɔ̃̀lɛ lai.

² Yâwɛɛ, ífe nìa ŋɔkono-teei ma, gono-teei nyii è gɛ̀ yái íkaa a Zeeka Ŋɔɣâlai íyêei ǹyɛɛi,

³ “Ḿve pâi liî ŋápɛrɛi lá, kpaa máŋ ŋá nyíi.

⁴ Ḿve pâi ḿvii tɔɔ̂i, kpaa máŋ ŋá nyíi,

⁵ é lɛ́ɛ la zu ŋá pɛ́rɛ tɔ́ɔ Zeeka Ŋɔɣâlai Yâwɛɛ mì.”

⁶ Ɛfata ƃé kú Gbanaŋ-woo kɛ́ɛ Gãlai maa mɛ̂ni mɛ̀ni naa, ǹaa ƃé kú gàa naa Ziariŋ ŋɔsûai su.

⁷ Kú m̀o kûɛi, “Tɔɔ kú lí Yâwɛɛ ŋɔpɛ́rɛi mu. Tɔɔ kú lí ŋɔkâloŋ see-sɛŋ ŋɛ́i-tuɛ kú vɛli.”

⁸ Yâwɛɛ, pá a Íkpanaŋ-woo kɛ́ɛ maa Gãlai Ípɛrɛi mu, ńyii gáa a íwala-wala laai maa ŋɛ́i kɛ̀ maai, íkɛ ƃɛ́ wɔ́lɔ-wɔlɔ da wɔlɔ-wɔlɔ.

⁹ Gɛ́ zâla láa soŋ-ƃelai díkɛ a teniŋ ƃô-ƃela a tãi kélee. Tɔɔ ínûai díkɛ koi-nɛ̃ɛ wule tòo a tãi kélee.

¹⁰ Óo Yâwɛɛ, ífe nìa gono-teei ma í gɛ̀ íyee mu nuui Deeƃé yêei, kpaa máŋ í íyee kúla íkâloŋ mu nyii í zìɣe zui.

¹¹ Í íkono tèe Deeƃé yêei a gbanaŋɔɔ, gono-teei nyii ífe pâi íyee kulâi mui: “Ŋa pâi íloŋ-surɔŋ dɔnɔ kɛ̂i a kâloŋ, nyii pâi lɛɛ̂i ípɔɔ ŋá a kâloŋ.

¹² A kɛ̀ ílônii-sinaai da ŋákpanaŋ-wooi ŋ̀aa sèe kɛ̀ da ŋátɔ̂ŋ nyii ŋá dɛ̀ɛ dí pɔ́i, dílônii dia máŋ da pâi lɛɛ̂i í pɔ́ɔ ŋá wɔ́lɔ-wɔlɔ da wɔlɔ-wɔlɔ.”

¹³ Yâwɛɛ a Zãiyɔŋ siɣe zu. A ŋ̀wɛ̂lii é ǹaa kɛ́ a bɔ́-taai.

¹⁴ “Ƃɛ́ ƃé ŋa pâi kɛ̂i naa wɔ́lɔ-wɔlɔ. Ƃɛ́ ƃé ŋa ŋ̀wɛ̀lii a gɛɛ ŋá ǹaa mɛi káa.

¹⁵ Ŋa pâi kpɔŋ mâa tɛɛ̂i Zãiyɔŋ pɔ́ a zãâi kélee a ŋ̀wɛ̂lii. Ŋa pâi mii-sɛŋ tɛɛ̂i ŋɔkôlo-ƃelai pɔ́, dílii é láa.

¹⁶ Ŋa pâi lûwa lâai m̀ɛnii ŋɔsâla láa soŋ-ƃelai da gɛi, gélee ma, à kɛ̀ tí, ŋɔnûai kélee da pâi wule tôoi a lii-nɛ̃ɛ pere.

¹⁷ Ŋa pâi Deeƃé ŋɔsuui su nuu tɔnɔ kɛ̂i a kâloŋ kɛ́tɛ, gɛ̀ ní ŋa pâi ŋákâloŋ ŋɔkâloŋ-laai maa kɔ̃ɔ̂i.

¹⁸ Ŋa pâi ŋɔkpɔara-ƃelai paâi a ŋumɛ, kɛ́lɛ ŋɔkâloŋ-laai a pâi ƃûu ƃôi é fólo.”