Mąątɛ̨nɛ̨ 125 - Bible

Ɣâla ŋɔnûai ŋuŋ ma ƃôɔɔi

Ɣâla fɛli wule

¹ Diai dí kíli tɔɔ̂i Yâwɛɛ mai, díkaa yɛ̂ɛ Zãiyɔŋ yêei, nyii va pɔ̂ri wɔ́lɔ tûmoi, kpaa máŋ é kúla dɔɔ̂i.

² Berei nɔ́ ǹyée kpaya-kpayai tínaŋɔ̂ɔi la Zerusâlɛŋ mai, bere nɔ́ ƃé Yâwɛɛ kpíniŋɔ̂ɔi la ŋɔnûai dîa, é síɣe sâa ḿa é lí tuɛ-pere.

³ Ŋ̀wana-lɔ̂ɔ-ƃelai dífe pâi kɛ̂i nɔ́ deniŋ ƃô-ƃelai dí lɔii mɛi. À kɛ̀ da gɛ̀ tí, deniŋ ƃô-ƃelai dia máŋ da pâi ŋwana-lɔ̂ɔ-tua kɛ̂i.

⁴ Óo Yâwɛɛ, ye mɛni lɛ́lɛɛ kɛ́ zɔŋ lɛ̂lɛ-ƃelai dîɛ. Gɛ́ a diai da íwoo mɛnii.

⁵ Kɛ́lɛ, yà ŋwana-lɔ̂ɔ-ƃelai kula maa kɛ̂, diai da díyee kúla ítûa-pere mui, dí kula maa kɛ́ máŋ. Lii-see é kɛ́ Eezuɛ ma.