Mąątɛ̨nɛ̨ 121 - Bible

Yâwɛɛ ƃa kú maa kɔ̃ɔ nûu

Ɣâla fɛli wule

¹ Ŋa pâi ŋɛ́i pîlanii ǹyée kɛ́tɛi ma. Mí ƃe ŋá kpɔŋ mâi a pâi kûlai naai?

² Ŋá kpɔŋ mâi a pâi kulâi Yâwɛɛ yêei, nyii ŋ̀elei kpɛ̂tɛ da ǹɔii.

³ Vé pâi ǹɛɛ̂i naa ítoo, íkpɔŋ mâ nuui káa a ŋ̀ɛ́i a tãi kélee.

⁴ Eezuɛ maa kɔ̃ɔ nuui fá nyîi a ŋuŋ, kpaa máŋ é láa é nyíi.

⁵ Yâwɛɛ ƃa ímɛi káa-nuui. Gáa íkɔlɛ ma, gɛ́ ímaa kɔ̃̂ɔ.

⁶ Vóloi fé pâi íkerenîi a ɣele ƃɔ́ɔ, kpaa máŋ ŋ̀áloŋ é íkereŋ a kpíni.

⁷ Yâwɛɛ a pâi ímaa kɔ̃ɔ̂i é íkula mɛni kpɔ̂lu sii kélee su. A pâi íŋuŋ maa ƃôi.

⁸ A pâi ímaa kɔ̃ɔ̂i, ya kɛ̀ pâi kpaa ya kɛ̀ liî, é síɣe sâa ma é lí tuɛ-pere.