Mąątɛ̨nɛ̨ 12 - Bible

Ɣâla fɛliɛɛ kpɔŋ mâa mɛni ma

Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni mai

¹ Yâwɛɛ, kpɔŋ kûa, kpɛ́ni fêi, Ɣâla mɛni kɛ́ nuu da fé ŋɔ́nɔ naa. Núu fa ŋɔ́nɔ pɔ̂ri maa nûu tɔnɔ kpîŋ kâai núu-kpune sáma.

² Ǹúui kélee da kɛ́ nɔ́ lɛ́ɛ kɛ̂i díkîe-ni dîa. Da kɛ́ nɔ́ díkîe-ni pɛlɛ̂i, dílii su pere mɛni-ŋai kɛ́ ƃò a da kpɛ́ni-ŋa.

³ Yâwɛɛ, gɛ́ dí kpéra lɛ́ɛ kɛ̂i, dífe ŋɔ́nɔ yoŋka tèe.

⁴ Da m̀o yɛ̂ɛi, “Kúwoo a pâi gɛ̂i kú zɛŋ sɔlɔ ƃó kwa ŋ̀wɛ̂lii lai. M̀ɛnii kwa ŋ̀wɛ̂lii kú môi, kwa pâi môi. Núu da fa pɔ̂ri kúkperâi.”

⁵ Yâwɛɛ è mò ǹyɛɛi, “Ŋánûai da mɔ̃lɛ̂i, zɛŋ da ŋ̀wɛ̂lii dí zɔlɔ ƃôi, dífa zɔlɔ ƃô. M̀ɛni ma, ŋa pá nâa ḿu siɣêi, ŋá díŋuŋ ma ƃó yɛ̂ɛ berei da ŋ̀wɛ́lii lai.”

⁶ Yâwɛɛ ŋɔkono-tee-ŋai maa waâi. Dímaa waâi yɛ̂ɛ káne a kùla gbɛtɛ kwaa ma a nina, da m̀aa kîiŋ gîei lɔ́ɔlu mɛi feerɛ.

⁷ Óo Yâwɛɛ, kúmaa kɔ̃ɔ ŋ̀wana-lɔ̂ɔ-ƃelai yêei. Kúmaa kpɛ́ zɔnyɔ̂ŋ ɣeniɛi ŋí su.

⁸ Kúkaa ŋwana-lɔ̂ɔ-ƃela tee-tee sáma. Ŋwana-lɔ̂ɔ mɛni-ŋa nɔ́ ƃé da díyee sèe m̀u.