Mąątɛ̨nɛ̨ 116 - Bible

Ǹúui saa è fòloŋ mai Ŋɔɣâla láa maa tɛ́-wooi

¹ Ŋá Yâwɛɛ wɛ́lini, kpɛ́ni fêi, a ŋ̀óli tɔ̀ɔ ŋ́oo ma, gɛ́ ŋáfɛli-wooi mɛ̀ni.

² A ŋ̀óli tɔ̀ɔ ḿâ, a tãi kélee ŋa dòli lai.

³ Saa ŋɔƃárei è kɛ̀ a ŋ̀á tɛ́ɛ ḿberêi, ƃolôŋ tínaŋɔɔ ḿâ. Yao támaa è kɛ̀ ŋ́gɔlɔ̂i, ńii toɔ́ɔ pôlu.

⁴ Nya ƃe ŋá Yâwɛɛ tòli ńyɛɛ mai, “Ŋa íkperâi fêi, ye ŋ́uŋ ma ƃó.”

⁵ Yâwɛɛ sɔŋ lɛ̂lɛɛi, gɛ́ núu-kpune malôŋ kàa. Kúɣâlai káa a maloŋ kâa Ɣala.

⁶ Yâwɛɛ a diai maa kɔ̃̂ɔ dífa pɔ̂ri kɔ̂i díkpîŋ mɛni mai. Ŋ́gɛɛ mɛni kpɔ̂lu sui, è ŋ́uŋ mâa ƃò.

⁷ Ńii seɛ̂ɛi, kpɛ́ni fêi, Yâwɛɛ sɔŋ lɛ̂lɛɛi ḿɛni ma.

⁸ Yâwɛɛ è ŋ́gùla saa wôlo lá, é gɛ́ ŋ́ɛi-ya fa ŋɔ́nɔ pù, é gɛ́ fa ŋɔ́nɔ ŋ́gɔɔ tùa.

⁹ M̀ɛni ma, ŋa sîai Yâwɛɛ ŋɛ́i-tuɛ, vúlu-ƃelai sáma.

¹⁰ Kili-kɛ-zu káa nɔ́ ńyêei ímɛni ma, berei máŋ ŋa mɔ̃lɛ̂i la a ŋ̀ánaa ŋa mò ńyɛ̂ɛi, “Ŋa mɛni sôli kâai ƃɔɔlɔ,”

¹¹ berei máŋ kpîŋ ŋá yào la ŋá mó ńyɛ̂ɛi, “Núu da fé ŋɔkili kɛ-zui pù núu-kpune ma.”

¹² Lé ƃé ŋa pɔ̂ri dɛɛ̂i Yâwɛɛ pɔ́, m̀ɛni lɛ́lɛɛ-ŋai a gɛ̂i ḿîi m̀ɛni mai?

¹³ Ŋa pâi ŋwã̂ai sama-sɛŋ tɛɛ̂i Yâwɛɛ pɔ́ a sɛɣɛ-fêi ŋ́uŋ ma ƃó mɛni ma.

¹⁴ Zãâi ŋa ŋ́gono tèe la ǹyêei, ŋa pâi dɛɛ̂i bɔ́ ŋɔnûai ŋɛ́i-tuɛ.

¹⁵ Yâwɛɛ ŋɔnûai da sàa, a sòli m̀a.

¹⁶ Óo Yâwɛɛ, ítii kɛ́-nuu ƃa ńyãa. Ŋá tíi kɛ̀ yɛ̂ yɛ̂ɛ berei ńee è gɛ̀ lai. Ya ŋ́gula saa yêei.

¹⁷ Ŋa pâi sɛɣɛi-fêi sala kulâi Yâwɛɛ ma ŋá vɛ̀li.

^18-19 Ŋa pâi ŋákono têe-ŋai ŋ̀aa-see kɛ̂i Yâwɛɛ yêei Ŋɔpɛ́rɛ Kɛ́tɛi mu, ŋɔnûai ŋɛ́i-tuɛ Zerusâlɛŋ. Ka Yâwɛɛ láa maa tɛ́.