Mąątɛ̨nɛ̨ 112 - Bible

Ǹûwai tɔ̃yâ nuu a zɔlɔ ƃôi

¹ Ka Yâwɛɛ láa maa tɛ́. Lûwa káa ǹúui ma a ƃaa kɛ́-maa tɛ̂ɛ Yâwɛɛ pɔ́i, gɛ́ ŋɔtɔ̂ŋ-ŋai mɛi kâai.

² Wála-wala a pâi kɛ̂i ǹônii yêei ǹɔii ma, lûwa kɛ́ ƃò dîa.

³ Da pâi kɛ̂i a tɔɔ-ƃela, díkɔ̃liŋ su kɛ́tɛ. M̀ɛni kélee da díyee pìli zui, a pâi ƃûu ƃôi díyêei wɔ́lɔ-wɔlɔ da wɔlɔ-wɔlɔ.

⁴ Diai dísɔŋ lɛ̂lɛɛi, díkaa kwaa ponóɔɔ su. Diai da nûa malôŋ kàa, dɔ̃yâ-ƃelai da ǹúu sã́a-ŋai, a nɛ̃ɛ ma kpíni é tóo, dímaa a pâi kɛ̂i a bonóɔɔ.

⁵ Lûwa káa diai dîa díyee lá ƃôɔi kpa pili mɛ̂ni mai, díkɛ dípɔnii tɔ̂ɔ a teniŋ ƃô perei.

⁶ Núu sɔŋ lɛ́lɛɛ fé pâi wɔ́lɔ fɛɣɛ̂i gɛ́ mɛni ma. M̀aa mɛni kíli fa wɔ́lɔ kpɛ̀ɛ núu-kpune kíli ŋá.

⁷ Va yâo tuŋ nyɔ́mɔɔ da ma. Ŋɔkili kɛ-zui su kpanaŋɔ̂ɔi, gíli tɔɔ Yâwɛɛ ma kpɔ́ a gbanaŋɔɔ.

⁸ Ǹíi fa sɛ̂lɛŋ, kpaa máŋ é yao. A pâi ŋɔkpɔara-ƃelai su karâi kâai.

⁹ Ǹyée lá ƃôɔi sɛŋ tɛɛ mɛni ma ǹúui pɔ́ pɔ̂ri mâa fé mìi. Ŋɔmɛni lɛ́lɛɛi káa nɔ́ naa wɔ́lɔ-wɔlɔ da wɔlɔ-wɔlɔ. A pâi kɛ̂i a ŋ̀wála-walaa, nûa díkɛ ŋumɛ mâa tɛ̀ɛ bɔ́.

¹⁰ Ŋ̀wana-lɔ̂ɔ-nuui a nàa kàa, ǹíi é ŋwâna, é zĩ̂a mii é tɛ́ɛ. Kili kɛ-zu fa ŋɔ́nɔ kɛ̀ ǹyêei.