Mąątɛ̨nɛ̨ 109 - Bible

Mɛni kpɔ̂lu su nuu ŋɔsɔŋ pú maai

Deeƃé ŋɔwulei è bɔ̃yɛ ŋ̀ule too-ƃelai láa túɛ-nuui mɛni mai

¹ Ɣâla, ŋa ílaa maa tɛ̂i. Ífe lɛ̀ɛ a ímɛi saá.

² Ŋ̀wana-lɔ̂ɔ-ƃelai da ǹɛ́ɛ-ƃelai da tɔɔ ḿâ. Da lɛ́ɛ tee-tee kɛ̂i a ńaa.

³ Da mɛni nyɔ́mɔɔ-ŋa ƃôi a ńaa. Dítɔɔ̂i ḿâ ŋuŋ da kélee fé ma.

⁴ Berei máŋ ŋá díwɛlini lai, kɛ́lɛ dítɔɔ̂i ḿâ, a nɛ̃ɛ ma kpîŋ ŋ́gɛ Ɣâla fɛ̀li dímɛni ma.

⁵ Ŋà mɛni lɛ́lɛɛ kɛ̀ dîɛ, da zu tòo mî a mɛni nyɔ́mɔɔ, díkɛ ŋáwɛli kɛ́-maa su tòo a kpɔara.

⁶ Wôya mɛni saa ƃó-nuu tɛɛ é ŋ́gbɔara-nuui ŋɔmɛnii ŋá tée. Tɔɔ gbɔara-ƃelai dɔnɔ é mɛni lɛ́ɛ m̀a

⁷ Da ŋɔmɛnii su kàa, vé kɛ̀ a maa waa. Tɔɔ ŋɔɣâla fɛli-wooi é kɛ́ a dɔ̂ɔ gbîŋ ma.

⁸ Gɛ́ ŋɔkɛ-ɣeniɛi su é kpua, núu da kpɛ́ni é lɛ́ɛ bɔ́ɔ ŋá ŋɔtíi kɛ́ɛi su.

⁹ Tɔɔ ǹônii dí lɛ́ɛ a tee-loŋ-ŋa, ŋɔnɛnîi é lɛ́ɛ a pɔɔ-nɛni.

¹⁰ Tɔɔ nûa dí ǹônii kula dípɛrɛ sâa-ŋai mu, díkɛ nɔ́ a fɛli kɛ́-ƃela, kwaa ma fé kɛ̀ naa dímɛni ma.

¹¹ Tɔɔ kpa soŋ-ƃela dí gɔ̃liŋ kula ǹyêei. Zãâi kélee a kôloi m̀ɛni mai, é kɛ́ a ŋɔ̃́ya-ŋa pɔ́ɔ,

¹² núu da fé mɛni lɛ́lɛɛ kɛ̀ mì, kpaa máŋ núu da é kpáaŋ ŋɔnîa-pɛlɛɛi mɛni ma.

¹³ Tɔɔ ǹônii kélee dí sáa, ǹáa é láŋ ɣéniɛ sú ǹúu-suui pâi paî bôlu mai, sáma.

¹⁴ Tɔɔ zɔnyɔ̂ŋ-ŋai ŋɔnûai dí gɛ̀i, maa mɛ̂ni kíli é lɛ́ɛ Yâwɛɛ kíli ŋá, vé ǹee su mɛni lɛ̀ɛ zɔnyɔ̂ŋ-ŋai è gɛ̀i m̀ɛni ma.

¹⁵ Ŋɔsɔnyɔ̂ŋ maa mɛni kíli fé wɔ́lɔ kpɛ̀ɛ Yâwɛɛ kíli ŋá. M̀aa mɛni kíli fé lɛ̀ɛ núu-kpune kíli ŋá.

¹⁶ M̀ɛni-ŋai ŋí dí kɛ́ la kpɛ́ni fêi, vé núu da kélee ŋɛ́i malôŋ káa ní ɣéniɛ. È nûa sòŋ a ǹyɔ́mɔɔ é dípaa, é gôlo-ƃelai lúaŋ da diai pɔ̂ri mâa fé dîɛi.

¹⁷ È wɛ́lini a nûa náɣaŋɔɔ, tɔɔ náɣaŋ é kɛ́ m̀a ǹyaa máŋ. Vé wɛ́lini a lûwa, tɔɔ lûwa fé kɛ̀ m̀a ǹyaa máŋ.

¹⁸ A naɣaŋ lâa tòo gɔŋ ma yɛ̂ɛ yokpo, tɔɔ gbɔ́ɔi naɣaŋ é maa sêɣe yɔɔ yɛ̂ɛ yá, é yéŋ gâoi yɛ̂ɛ wúlɔ.

¹⁹ Tɔɔ dí kpíniŋ la yɛ̂ɛ seɣe, dí kɛ́ ǹeɣei yɛ̂ɛ bɛ̀rɛ ŋuŋ su-ɣɛli.

²⁰ Tɔɔ Yâwɛɛ é ŋ́gbɔara-ƃelai kula maa kɛ́ bere sîi ŋí su, da diai da mɛni nyɔ́mɔɔ-ŋa ƃò a ńaai.

²¹ Kɛ́lɛ, óo Yâwɛɛ, Ŋáɣâlai, kpɔŋ ḿâ yɛ̂ɛ berei í íkono tèe lai. Ŋ́uŋ ma ƃó, kpɛ́ni fêi, íwɛli kɛ́-maa kpanaŋ lɛ̂lɛɛi.

²² Ŋ́goloɔ̂i, kɔlɔ kpɛɛ ḿâ. Ŋ́gaa mɛni kpɔ̂lu su, ńii toɔ́ɔ pôlu.

²³ Ŋ́gaa nɔ́ yɛ̂ɛ ɣele-wulii niniŋ, ŋáfulu-laai su kpuaa, ŋ́gɛ ƃò yɛ̂ɛ koôŋ-kolo nyii kpâlaŋ ŋá tii kɛ́ nuu a ǹokwa nɔ́ ŋɔsí-sãai ǹáa ma é tóo ǹɔii mai.

²⁴ Ŋ́gbêleŋ su a saa, kpɛ́ni fêi, mii-sɛŋ fé ńyêei, ŋa lɛɛ nɔ́ a ŋ́gao tee-tee.

²⁵ Ŋ́gbɔara-ƃelai da ŋ́gàa, da kɛ̂ ɣɛ̂lɛi ḿâ, díkɛ díŋuŋ kpɛ̂mɛŋ.

²⁶ Kpɔŋ ḿâ, óo Ŋáɣâlai Yâwɛɛ. Ŋ́uŋ ma ƃó íwɔlɔ-wɔlɔ wɛli kɛ́-maa sârai.

²⁷ Gɛ́ ŋ́gbɔara-ƃelai dí gɔ́lɔŋ a gɛɛ yá ƃa ŋ́uŋ ma ƃô-nuui.

²⁸ Da ńaɣaŋ làa, kɛ́lɛ yá lûwa làa ḿâ. Tɔɔ diai da ŋwana-lɔ̂ɔ kɛ̀ a ńyãai, díkpɔara-ƃelai dí díyee mɛi ɣále, ńyãai a ítii kɛ́-nuui ŋá maa lii-nɛ̃ɛ kula.

²⁹ Tɔɔ ŋumɛ su kɛ́tɛ é ŋ́gbɔara-ƃelai páa, é kpíniŋ a dia yɛ̂ɛ yokpo.

³⁰ Ŋa pâi sɛɣɛi fêi tɛɛ̂i Yâwɛɛ pɔ́ a ɣelêi-pere. Ŋa pâi ǹáa ma tɛ̂i kpɔŋ su.

³¹ Ŋa pâi gɛ̂i tí, kpɛ́ni fêi, a gôlo-ƃelai maa kɔ̃̂ɔ, gɛ́ díkùla diai yêei da kɛ̂ ŋ̀wɛ̂lii dí díŋuŋ lá pílii.