Mąątɛ̨nɛ̨ 108 - Bible

Ɣâla fɛliɛɛ kpɔŋ mâa mɛni ma

Deeƃé ŋɔwulei

¹ Óo Ɣâla, yá nɔ́ ƃé ŋ́gili tɔɔ̂i yâ. Ŋa pâi wule toôi yâ ŋá ílaa maa tɛ́.

² Ŋakɔnîŋ da ŋá ƃɔɔi, ka káŋɛi lá ƃó. Ŋa pâi vóloi ŋɛ́i lá ƃôi.

³ Óo Yâwɛɛ, ŋa pâi ísɛɣɛi-fei ǹɔii-ŋûŋ-ŋai sáma. Ŋa pâi ílaa maa tɛ̂i ǹûai sáma.

⁴ Íwɛli kɛ́-maai kɛ̂tɛi, gɛ́ sèri ŋ̀ele-kɔlɔŋ ma. Íteniŋ ƃô-laai a tɛ́ ŋ̀eleŋ-kɔlɔŋ ma.

⁵ Óo Ɣâla, íkɛtɛ-laai lɛ́ ŋ̀elei su, da ífolo-laai ŋ̀éniɛi gwaa kélee ma.

⁶ Kúŋuŋ ma ƃó a íwala-wala-laai í kúfɛli-wooi su too, a gɛɛ diai í díwɛlinii da pɔ̂ri kɛ̂i a díŋuŋ ma ƃóɔɔ.

⁷ Ɣâla a lɛ̀ɛ ŋɔkwaa maa waa ma ǹyɛɛi, “Ŋa pâi Sɛkɛŋ ŋá kɔ̂lɛi, ŋá Sukɔ Yeei ŋá kɔ́lɛ ŋánûai dîa.

⁸ Gilia da Manasɛ díkaa a ḿbɔɔ. Ifiraŋ ƃa ŋágba-ƃɛlɛi, Zuda kɛ́ ƃò a ŋákâloŋ-wurui.

⁹ Kɛ́lɛ ŋa pâi Môa kɛ̂i a ŋáseɣe waa kwaai ma, ŋá Idɔŋ kɛ́ a ŋákpaŋ-kpalii pûi kɛ̂i é kɛ́ a ŋɛi kɛ́-maa a gɛɛ gáa a ḿbɔɔ, ŋa láɣi Felesia-ŋai dîa a yee tɛɛ-maa-pere.”

¹⁰ Óo Ɣâla, gbɛ̂ɛ ƃé pâi tɛ̂i a ńyãa daa-lee maa kónaŋɔɔ ŋɔsiɣãŋ sui? Gbɛ̂ɛ ƃé pâi liî a ńyãa Idɔŋ?

¹¹ Ya íyee kúla nɔ́ ƃé ŋí kúmu? Ífe pâi tɔɔ̂i kúkɔ-kuluƃa-ŋai láa túɛ kûɛ?

¹² Kpɔŋ kûa kú kɔ́ kúkpɔara-ƃelai pɔ́. Núu-kpune ŋɔkpɔŋ mâai káa nɔ́ kpɛ́ni-kpɛni.

¹³ Ɣâla à kɛ̀ kúƃela ma pere, kwa pɔ̂ri kúkpɔara-ƃelai yée mɛi ɣâlei. Ǹyaa ƃé pâi kúkpɔara-ƃelai yée mɛi ɣâlei kûɛ.