Mąątɛ̨nɛ̨ 107 - Bible

Gɔlɔ-kpuai ǹɔ́ɔlui (107:1--150:6) Ka Ɣâla láa maa tɛ́ ŋɔsɔŋ lɛ̂lɛ-laai mɛni ma

¹ Óo kwaa sɛɣɛi fêi tɛɛ Yâwɛɛ pɔ́, kpɛ́ni fêi, zɔŋ lɛ̂lɛɛi. Wɔ́lɔ-wɔlɔ da wɔ́lɔ-wɔlɔ wɛli kɛ-maa káa ǹyêei.

² Káai kélee Yâwɛɛ a káŋuŋ ma ƃói, ka ǹáa maa tɛ́. Ka ǹáa maa tɛ́, kpɛ́ni fêi, a káŋuŋ ma ƃó kákpɔara-ƃelai yêei.

³ Ka ǹáa maa tɛ́, kpɛ́ni fêi, a káŋuŋ ma ƃó a kákula kákpɔara-ƃelai yêei lɔii ŋuŋ-ŋa su, vóloi kulâi-pere da vóloi liî-pere, yá-ŋûa-pere da yá kwára-pere.

⁴ Díta ni dí kɛ̀ nɔ́ sia siâi vɛ̃ɛ-kpâlaŋ-ŋai su, dífa díseêi kàa taa-lee da su.

⁵ Kpele wɛ̂li da puru è kɛ̀ dípaâi. Dí gɔ̀lɔŋ a gɛɛ dí kpɔŋ mâa nuu da fé kɛ́ ní ŋɔ́nɔ naa.

⁶ Nya ƃe dí wɔ̀lɔ Yâwɛɛ ma dí mɛni kpɔ̂lui su, é díwoo mɛ́ni, é díŋuŋ ma ƃó dílii too pôlui su.

⁷ È tɔ̀ɔ dítuɛ é sía a dia pere sã́a su, é lí a dia taa lêe su ƃɛ́i da pɔ̂ri seêi naai.

⁸ Fɛ̂ɛ da Yâwɛɛ sɛɣɛ̂i fè ŋɔwɔ́lɔ-wɔlɔ wɛli kɛ́-maai da m̀ɛni kpaya-kpayai è gɛ̀ dîɛi, mɛni ma.

⁹ A yá tɛ̀ɛ diai pɔ́ kpele wɛ̂li a díkɛ̂i, é mii-sãa tɛɛ diai pɔ́ puru a dípaâi.

¹⁰ Da-ŋa díkɛ̀ dítee-tee kwaa ma kpînii, yɔlɔ toɔ́ɔ da-ŋa kɔ̂ŋ ma dífa pɔ̂ri liî kwaa da ma díkɛ mɔ̃lɛ,

¹¹ kpɛ́ni fêi, dífe díwoli tɔɔ ní Ŋ̀âla Kɛ́tɛi ma, dí tela dípôlu tɔ̀ɔ ŋɔsɛŋ lɛ́ɛi ma.

¹² Tíi kpânaŋ kɛ́ɛ è kɔlɔ kpɛ̂ɛ dîa, ǹyaŋ da tòo, núu da fé kɛ́ ní naa é kpɔŋ mâa tɛɛ dípɔ.

¹³ Nya ƃe dí wɔ̀lɔ Yâwɛɛ ma dí mɛni kpɔ̂lu su, é díwoo mɛ́ni, é díŋuŋ ma ƃó dílii too pôlui su.

¹⁴ È díkùla gbíni maa pɔlɔ-pɔlɔɔi su ƃɛ́i díkɛ̀ naa díkɛ mɔ̃lɛi, é ǹyɔlɔ-ŋai tée díkɔŋ ma.

¹⁵ Fɛ̂ɛ da sɛɣɛi fêi tɛɛ Yâwɛɛ pɔ́ m̀ɛni lɛ́lɛɛi ŋí mɛni ma da, ŋ̀wɛli kɛ́-maa kpanaŋ gáa ǹyêei dímɛni mai.

¹⁶ È m̀ara kpôŋ-ŋai kɛ̀ gbini-pɛrɛ-ŋai lái, wòlo, é gbôŋ soŋ wûru-ŋai nyii-ŋai kɛ̀ a gbɛtɛ́ɛ a kɔlii, fṹa-fũa.

¹⁷ Da-ŋa dí kɛ̀ tûai a ƃoo-pere, díkɛ mɔ̃lɛ dítua pere nyɔ̂ŋ-ŋai da dísɔnyɔ̂ŋ mɛni ma.

¹⁸ Mii-sɛŋ mii wɛ̂li dɔnɔ kpîŋ fé kɛ́ ní dîa, dí kɛ̀ pâi saâi.

¹⁹ Nya ƃe dí wɔ̀lɔ Yâwɛɛ ma dí mɛni kpɔ̂lui su, é díwoo mɛ́ni, é díŋuŋ ma ƃó dílii too pôlui su.

²⁰ È díƃàlo a ŋ̀óo, é díkula m̀oloŋ-ŋai su.

²¹ Fɛ̂ɛ dí Ɣâla Yâwɛɛ sɛɣɛ̂i fé m̀ɛni lɛ́lɛɛi ŋí mɛni ma da ŋ̀wɛli kɛ́-maa kpânaŋ ǹyêei dímɛni mai. A mɛni kpaya-kpaya támaa kɛ́ dímɛni ma.

²² Fɛ̂ɛ dí sɛɣɛi fêi sala-ŋa kula, dí lii-nɛ̃ɛ wule-ŋa too, dí gɛ́-mɛni kpaya-kpayai maa mɛ̂ni ƃó.

²³ Da-ŋa díkɛ̀ tîma-ŋa su yúo ŋá díkɛ pɔni tɔ̂ɔ.

²⁴ Dí m̀ɛni-ŋai kâa Yâwɛɛ a pɔ̂ri gɛ̂i. È mɛni mĩli-mĩliɛɛ-ŋa kɛ̀ yúo ŋá.

²⁵ È gɛ̀ fãa kɛ́tɛ é pɛ́lɛ tɛɛ̂i, nyii gɛ̀ yúo é pɛ́lɛ tɛ̂i gɛ́ tòo.

²⁶ È ǹyá ŋá keleŋ tɛ̀ ɣelêi é yéŋ pôlu ǹya kaoi ma. M̀ɛnii ŋí è gɛ̀ diai kɛ̀ géleŋ sui, kɔlɔ é kpɛ́ɛ dîa.

²⁷ Díkɛ̀ kpɛ̃lînii, díkɛ kɛ̀ tàka-taka yɛ̂ɛ da lɔɔ kpêle. Díŋuŋ su è kɛ̀ wúlee dífa pɔ̂ri mɛni da kɛ̂i a táre-pere.

²⁸ Nya ƃe dí wɔ̀lɔ Yâwɛɛ ma dí mɛni kpɔ̂lui su, é díwoo mɛ́ni, é díŋuŋ ma ƃó dílii too pôlui su.

²⁹ È gɛ̀ vãai é kpéra, ǹyai é sée tɔ̀ŋ.

³⁰ Dílii è nɛ̃ɛ kpɛ́ni fêi vãai è kpèra. È pà a dia nɛ́ŋ-kpɛlɛɛ ǹya-ƃelai ma díkɛ pâi naai.

³¹ Fɛ̂ɛ dí sɛɣɛi fêi tɛɛ Yâwɛɛ pɔ́ ŋ̀ɔwɛli kɛ́ maa kpanaŋ ǹyêei dí mɛni mai màa mɛ̂ni mà, da m̀ɛni lɛ́lɛɛi a gɛ́ dîɛi.

³² Fɛ̂ɛ dí ǹáa maa tɛ́ ɣelêi pere ŋɔnûai díkpɔŋ gîe mai su, dí ǹáa maa tɛ́ ǹɔii-namelai sáma.

³³ Yâwɛɛ è gɛ̀ ǹya lêe-ŋai dí kpála kpɔ́ kpúŋ ǹaa kɛ́ ƃò yɛ̂ɛ fɛ̃ɛ kpâlaŋ su, é gɛ́ ǹyá ɣɛ̂li-ŋai dí kpéra ɣilînii.

³⁴ È gɛ̀ ǹɔii é kpála, sí-sɛŋ da fa ŋɔ́nɔ kpɛ̀tɛ ma, kpɛ́ni fêi, ǹaa-ƃelai dísɔnyɔ̂ŋ su è kɛ̀ a gɛ́tɛ.

³⁵ È gɛ̀ vɛ̃ɛ-kpâlaŋ su é pene a yá yá-ɣɛli-ŋa díkɛ ɣiliŋ lɔii kpâla ḿâ.

³⁶ Diai puru è kɛ̀ dípaâi, dí pà naa dí taa-lêe tɔɔ naa díkɛ ƃò naa.

³⁷ Dí sí-sãa sì naa díkɛ ƃûu ƃò díyêei díkɛ m̀á mìi.

³⁸ A gɛ̀ nûa dí nîa-pɛlɛɛ maa sɔlɔ ƃó a dámaa, é lûwa láa dítaa tulɛ-ŋai dîa.

³⁹ Tãi Ɣâla ŋɔnûai díkpɔara-ƃelai dí díyee mɛi ɣâle la, dí dísoŋ a ǹyɔ́mɔɔi,

⁴⁰ dímaa mɛni kíli è too Ɣâla kíli ŋá. È gɛ̀ díkpɔara-ƃelai dí pú dí lí vɛ̃ɛ-kpâlaŋ su.

⁴¹ Kɛ́lɛ diai mɔ̃lɛi díkɛ ŋ̀wɛli a kpɔŋ mâai, a díkùla dímɔ̃lɛ-laai su, é lûwa láa dîa dí ƃûu ƃó yɛ̂ɛ taa tulɛ-ŋa.

⁴² Dɔ̃yâ-ƃelai da m̀ɛnii ŋí ǹaa kàa da lii-nɛ̃ɛ kula, kɛ́lɛ a ŋ̀wana-lɔ̂ɔ-ƃelai lá tɛ̀.

⁴³ Diai dítareɛɛi, tɔɔ dí m̀ɛni-ŋai ŋí naa káa, dí Yâwɛɛ ŋɔwɔ́lɔ-wɔlɔ da wɔ́lɔ-wɔlɔ wɛli kɛ-maai maa mɛni ŋá káa.