Mąątɛ̨nɛ̨ 106 - Bible

Ɣâla sɔŋ lɛ̂lɛɛi ŋɔnûai mɛni ma

¹ Ka laa maa tɛ̂ tɛɛ Yâwɛɛ pɔ́. Ka sɛɣɛ fêi tɛɛ Yâwɛɛ pɔ́, kpɛ́ni fêi, zɔŋ lɛ̂lɛɛi. Ŋɔwɛli kɛ́-maai kɔ́yɛŋ fé ma.

² Gbɛ̂ɛ ƃa pɔ̂ri gɛ́ mɛni kpaya-kpayai mɛni ƃôi? Gbɛ̂ɛ ƃa pɔ̂ri ǹáa maa tɛ̂i a zu kɛ́tɛi?

³ Lûwa káa diai dîa da ŋ̀óo mɛni, díkɛ tûa sãa kɛ̀ a ɣele kéleei.

⁴ Yâwɛɛ, yà kɛ̀ kpɔnii ínûai dîa, ḿaa mɛni kíli é lɛ́ɛ íkili ŋá. Yà kɛ̀ díŋuŋ ma ƃôi, ŋ́gɛ a díta,

⁵ a gɛɛ ŋá díkaa díkɛ ŋɔ́nɔ ƃûu ƃò. Ǹyaŋ à kɛ̀ tí, kwa dîa-ni kwa pâi kɛ̂i lii-nɛ̃ɛ kulâi gîe ma, kwa dîai díkaa a ípɔɔ kúkɛ ílaa maa tɛ̀ gîe ma.

⁶ Kwa sɔnyɔ̂ŋ kɛ́ a yá yɛ̂ɛ berei kúnâŋ pɔlɔ-ŋai dí wɔ́lɔ gɛ̀ lai. Kúkaa a sɔnyɔ̂ŋ kɛ́-ƃela.

⁷ Kúnâŋ pɔlɔ-ŋai dífe wɔ́lɔ Ɣâla kɛ́ mɛni mĩli-mĩliɛ-ŋai mɛni ŋá káa ní Ize. Dífe díyee see ní ŋɔwɔ́lɔ-wɔlɔ wɛli kɛ-maai mu, kɛ́lɛ dí tɔ̀ɔ Ŋ̀âla Kɛ́tɛi m̀a Ǹyúo Kpɔ̂lui ma.

⁸ Kɛ́lɛ è díŋuŋ maa ƃò yɛ̂ɛ berei è góno tèe lai, a gɛɛ é ŋɔwála-walai lɛ́ dîa.

⁹ È gɛ̀ Ǹyúo Kpɔ̂lui ŋáa é kɔ́lɛ zâmai díperêi, dí tɛ́ɛ naa lɔii kpâla ma yɛ̂ɛ fɛ̃ɛ kpâlaŋ su.

¹⁰ È dí kùla díkpɔara-ƃelai yêei é díŋuŋ ma ƃó.

¹¹ Kɛ́lɛ ǹyái è sìa díkpɔara-ƃelai kélee mɛi dí sáa. Dítɔnɔ da fé lɛɛ ní.

¹² Nya ƃe ǹûai dí làa a ŋɔkono-teei è gɛ̀ díyêei. Dí laa maa tɛ̂ wule tòo ma.

¹³ Kɛ́lɛ dí nìa a maa félaa. Dífe dílii kpele ní dí m̀aa kpɛ́ŋ.

¹⁴ Dí díŋuŋ su-woo sàa é pîlaŋ m̀ii-sãa lɛ́lɛɛ-ŋai dí kɛ̀ miî Ize lɔii su mâ, vɛ̃ɛ-kpâlaŋ sui. Dí Ɣâla su kɔ̀ɔŋ.

¹⁵ Nya ƃe è m̀ii-sãai tɛ̀ɛ dípɔ díkɛ̀ ŋ̀wɛ̂lii lai. Kɛ́lɛ è kɔlɔ-fela nyɔ́mɔɔ pìli dísama.

¹⁶ Dí tólo kùla Mose ma da Yâwɛɛ ŋɔnúu maa waai Eelɔŋ vɛ̃ɛ-kpâlaŋ su.

¹⁷ Nya ƃe Ɣâla è gɛ̀ ǹɔii é pú zu é Dataŋ, Abiraŋ da díyee mu-ƃelai kélee mɛi pɛ́lɛ.

¹⁸ Ɣâla è gɛ̀ ŋɔŋ é tóo dípôlu-ƃelai sáma é ŋ̀wana-lɔ̂ɔ-ƃelai kéreŋ.

¹⁹ Dí niŋa sîrɛ pɔkɔɔŋ kpɛ̀tɛ Sana Yeei ma a gôo dí gɛ́ a díɣâla, díkɛ vɛ̀li.

²⁰ Fɛnɛ-sɛŋ nyii gɔ́nɔŋ ƃa kalai, dí zìɣe dí dɔ̀ɔ Ɣâla ŋɔwála-wala-laai pɔ́ɔ ŋá.

²¹ Dí nìa díŋuŋ ma ƃó nuui Ɣâla ma nyii díŋuŋ ma ƃò a ŋɔwála-wala-laai, é díkula Ize lɔii sui.

²² È mɛni kpaya-kpaya támaa kɛ̀ naa. È m̀ɛni mĩli-mĩliɛɛ-ŋai ŋí kɛ̀ Ǹyúo Kpɔ̂lui kɔlɛ ma.

²³ Ɣâla kɛ́ɛ a ǹíi ŋwána dîa a gbɛtɛ a gɛɛ é dísu karai, ŋɔtíi kɛ́ nuui Mose è lɔ̀ díloai da Ɣâla ni é dímaa kpera-fei kɛ́ a gɛɛ vé gɛ̀ tí.

²⁴ Kɛ́lɛ dí díyee kùla ǹɔii lɛ́lɛɛi mu Ɣâla è dɛ̀ɛ dípɔi. Dífe láa-ni a Ɣâla ŋɔkono têei mɛni.

²⁵ Dí kɛ̀ díƃûu-ŋai mu díkɛ díŋuŋ su-woo sàa. Dífe díwoli tɔ̀ɔ ní Yâwɛɛ ma.

²⁶ Nya ƃe Ɣâla è ǹíi ŋwàna dîa, é dília-woo ƃó kpɔ́ a gbanaŋɔɔ ǹyɛɛ dîai, “Kà wàla kálii maa fáleŋ, ŋa pâi gɛ̂i kákelee ká sáa vɛ̃ɛ-kpâlaŋ ŋí su,

²⁷ ŋá gɛ́ kálônii dí lɛ́ɛ a lɔii ŋuŋ da kpɛ́ni-ŋa su-ƃela pɔ́ɔ dí lɛ́ɛ naa dí sáa.”

²⁸ Kɛ́lɛ ǹia-wooi ŋí fé lɛ̀ɛ ní díkili ŋá. Dí pɛ̀lɛ ŋɔ́nɔ ŋ̀âlai fɛlîi nyii da kɛ̂ m̀a Bêe nyii vúlu fé zui Peo Yeei ma, dí kɛ́ zâla sãai mîi nyii da dɛ̀ɛ zaa-ƃelai pɔi.

²⁹ Dí Yâwɛɛ líi tòo pôlu a dítûa pere sii ŋí. Nya ƃe è ǹíi ŋwàna é kɔlɔ-fela nyɔ́mɔɔ píli dísama.

³⁰ Kɛ́lɛ Fineɣa è zɔnyɔ̂ŋ-ƃelai kula maa kɛ̂. Nya ƃe gɔlɔ-felai è kpèra.

³¹ Fineɣa maa mɛni kíli è lɛ̀ɛ Eezuɛ-ŋai kíli ŋá, da dílônii díwɔ̂ lonii mɛni lɛ́lɛɛi ŋí è gɛ̀i maa mɛni ma wɔ́lɔ-wɔlɔ da wɔlɔ-wɔlɔ.

³² Eezuɛ-ŋai dí ŋɔ̂nɔ Yâwɛɛ líi ŋwàna Mɛriba Ya-loŋ ma. Kɛ́lɛ m̀ɛnii ŋí fé láa ní Mose líi ma.

³³ È ǹíi ŋwàna kpɔ́ dîa a ŋánaa, é wóo kpanaŋ nyɔ́mɔɔ támaa ƃó dîa.

³⁴ Dífe zîi da kpɛ́ni-ŋai paa ní kɛ̀ ǹɔii tí sui yɛ̂ɛ berei Yâwɛɛ è m̀o la dîai,

³⁵ kɛ́lɛ da dîa-ni dí díkîe-ni kùla a sinâa da nɛyâa, dí pɛ́lɛ díkpɛtɛ ɣâla-ŋai fɛlîi.

³⁶ Dí kɛ̀ ɣâla da kpɛ́ni-ŋa fɛlîi nyii kɛ̀ a ƃáre-ŋa dímɛni mai.

³⁷ Dí dílônii-sinaai da ǹɛyâai da-ŋa kùla a sâla Keena-ŋai díkpɛtɛ ɣâla-ŋai dîa a sâla.

³⁸ Dí nîa-pɛlɛɛ pàa kpɛ́ni-kpɛni. Dí ǹɔii maa lîƃi a núu kuláa a sâla.

³⁹ Dífe kɛ́ ní a díteniŋ ƃôɔɔ Ɣâla mɛni ma. Dí díkpîŋ maa lîƃi a tua pere nyɔ̂ŋ.

⁴⁰ Yâwɛɛ è ǹíi ŋwàna dîa. Ǹíi è tòo pôlu dímɛni ma.

⁴¹ È ǹyée kùla dímu é dítɛɛ lɔii ŋuŋ da kpɛ́ni su-ƃelai pɔ́ díkɛ ƃò díwala-wala-laai mu.

⁴² Dí kɛ̀ díkpɔara-ƃelai yêei luɛ-laa su díkɛ mɔ̃lɛ.

⁴³ Yâwɛɛ è díŋuŋ ma ƃò a tãi támaa. Kɛ́lɛ dífe wɔ́lɔ dísɔŋ maa fáleŋ ní a dɔnɔ kpîŋ, Kɛ́lɛ díkɛ̀ nɔ́ a dítɔɔ m̀a.

⁴⁴ Kɛ́lɛ nyíŋi kélee su, Yâwɛɛ fé wɔ́lɔ ǹyée kùla ní dímu. È ŋ̀óli tɔ̀ɔ díwɔlɔ woo ma, é díkula mɛni kpɔ̂lu-ŋa su.

⁴⁵ Vé wɔ́lɔ nia ní gono têei ma è gɛ̀i, kpɛ́ni fêi, ŋɔwɛli kɛ́-maai su kɛ̂tɛi dímɛni ma.

⁴⁶ È gɛ̀ díkpɔara-ƃelai dí díŋɛi malôŋ káa.

⁴⁷ Óo Yâwɛɛ Kúɣâlai, kúŋuŋ ma ƃó í kúkula kúkpɔara-ƃelai yêei ǹɔii ŋuŋ-ŋai su. Yà gɛ̀ tí, kwa pâi ísɛɣɛ̂i fêi, kú ílaa maa waai maa tɛ́.

⁴⁸ Ka Yâwɛɛ, Eezuɛ Ŋɔɣâlai láa maa tɛ́. Ka ǹáa maa tɛ́ wɔ́lɔ-wɔlɔ da wɔ́lɔ-wɔlɔ. Kákelee ka m̀ó kâai, “É kɛ́ tí.” Kwaa Yâwɛɛ láa maa tɛ́.