Mąątɛ̨nɛ̨ 105 - Bible

Ɣâla da ŋɔnûai

¹ Sɛɣɛ-fei tɛɛ Yâwɛɛ pɔ́. Ŋɔkɛ́tɛ-laai tuŋ too. M̀ɛni-ŋai nyii-ŋai a gɛ̀i, mó ǹɔii-ŋûŋ-ŋai dîa.

² Laa-maa tɛ̂ wule too Yâwɛɛ ma. M̀ɛni ma-pɔlɔ-pɔlɔɔ-ŋai a gɛ̀i, duŋ too.

³ Ka lii-nɛ̃ɛ kula kpɛ́ni fêi kúkaa a bɔɔ. Tɔɔ diai kélee da vɛlii, dílii-nɛ̃ɛ kula.

⁴ Ka lí Yâwɛɛ pɔ naa ŋɔwála-wala-laai mɛ̂ni ma, ká vɛli a tãi kélee.

^5-6 Káai a Eberaɣɛ̃ɛ nyii kɛ̀ a Ɣâla ŋɔtíi kɛ̀-nuui ŋɔsuui su-ƃelai, káai a Zeeka ŋɔsuui su-ƃelai nyii-ŋai Ɣâla a dísiɣe zui, ŋ̀ɛi-kɛ-maa-ŋai Ɣâla è gɛ̀i, maa mɛ̂ni kíli é lɛ́ɛ kákili ŋa, da mɛni ŋá téɛɛi nyii è gɛ̀i.

⁷ Yâwɛɛ ƃa Kúɣâlai. Ŋɔtɔ̂ŋ-ŋai káa ŋ̀éniɛi gwaa kélee ma.

⁸ Káfe wɔ́lɔ nìa Ɣâla ŋɔkpanaŋ-wooi ma, nyii è gɛ̀ a gɛɛ é kɛ́ naa wɔ́lɔ-wɔlɔ da wɔlɔ-wɔlɔi.

⁹ Gbanaŋ-wooi ŋí ƃé è gɛ̀ Eberaɣɛ̃ɛ yêei, Gono-teei nyii è gɛ̀ Aise yêei.

¹⁰ Yâwɛɛ è kpanaŋ-woo kɛ̀ Zeeka yêei, nyii pâi kɛ̂i naa wɔ́lɔ-wɔlɔ da wɔlɔ-wɔlɔi.

¹¹ È mò ǹyɛɛi, “Ŋa pâi Keena lɔii tɛɛ̂i kápɔ. A pâi kɛ̂i a kákpɔɔ̂i pɔɔ.”

¹² Tãi è m̀ɛnii ŋí ƃò lai, dífe kɛ́-ni a dítamaa. Díkɛ̀ nɔ́ a ŋɔ̃ya-ŋa ǹɔii kpîŋ su.

¹³ Díkɛ̀ nɔ́ pɔnîi lɔii-ŋuŋ-ŋa loai. Díkɛ nɔ́ kulâi kâloŋ tɔnɔ yée mu díkɛ lì da kpɛ́ni yée mu.

¹⁴ Kɛ́lɛ Ɣâla fé fáa ní ma a gɛɛ núu da é dí mɔ̃lɛ. È gâloŋ-ŋa lia-woo ƃò a gɛɛ dífe lɛ̀ɣɛ dîa.

¹⁵ “Káfe lɛ̀ɣɛ ŋánûai dîa, nyii ŋai ŋá dísiɣei. Kpaa máŋ ká mɛni ŋánaa kɛ́ a ŋálono kɛ́-ƃelai.”

¹⁶ Yâwɛɛ è gɛ̀ dísi-sãai su é kara díkɔnɔ̃ŋ é kpɛ́ɛ, puru kɛ́tɛ é tóo dílɔii su.

¹⁷ È nyáŋkpa tɔnɔ tɛ̀ɛ dítuɛ pere. Ǹyáŋkpai ŋí ƃé kɛ̀ a Zosɛ. Dí gɔ̀lɛ nûa dîa dí lí la luɛ-laa su.

¹⁸ Dí dòo yɔlɛ ŋá, dí kɔli tóo gɔŋ ma,

¹⁹ é lɛ́ɛ la zu m̀ɛnii è m̀oi, ŋ̀aa-see é kɛ́. Yâwɛɛ ŋɔwóoi è ǹɛ a gɛɛ m̀ɛnii è m̀oi, gáa a tɔ̃yâ.

²⁰ Ize kaloŋ è nûa tɛ̀ɛ dí gula gbini-pɛrɛi mu, é ŋ̀uŋ ma ƃó.

²¹ È bù gɔ̃liŋ kélee mɛi, é gɛ́ a ǹɔii láa túɛ nuu,

²² wála-wala kɛ́ ƃò ǹyêei gâloŋ ŋɔtíi kɛ́-ƃela kpaya-kpayai mɛi. Wála-wala è kɛ̀ ǹyêei a gɛɛ é táre-ŋa lɛ́ ǹúu pɔlɔ-ŋai da ǹúu láa túɛ-ƃelai dîa, berei da pɔ̂ri díkpîŋ kpɛtɛ̂i la tínaa tuɛ pere mɛni mai.

²³ Nya ƃe Zeeka è lì Ize é sée naa.

²⁴ Yâwɛɛ è gɛ̀ é ƃûu ƃó naa, ǹônii kponôi kpanaŋɔɔ é tɛ́ɛ díkpɔara-ƃelai dîa.

²⁵ È gɛ̀ Ize-ŋai dí tɔ́ɔ ŋɔnûai dîa, dí dísoŋ a ǹyɔ́mɔɔ.

²⁶ Nya ƃe è ŋɔtíi kɛ́-nuui Mose tɛ̀ɛ da Eelɔŋ nyii è zìɣe zui.

²⁷ Dí Ɣâla kɛ́ mɛni kpaya-kpayaa-ŋa kɛ̀ da ŋɛi kɛ́-maa-ŋa ǹûai ŋɛ́i Ize.

²⁸ Ɣâla è gɛ̀ kpíni é Ize lɔii mɛi pɛ́lɛ, kɛ́lɛ Ize-ŋai dífe díwoli tɔɔ ní ŋ̀óo ma a gɛɛ dí ǹɛɛ naa Eezuɛ-ŋai dí lí.

²⁹ È ǹyá lêe-ŋai pène a ŋãa, ǹyɛ̃ɛ-ŋai dí sáa zu.

³⁰ È gɛ̀ lofo-ŋa dí ǹɔii lá fɛ́ɛ, da-ŋa dí lɔ́ gâloŋ-pɛrɛi mu.

³¹ Ɣâla è lòno lilî-ŋa da misi-ŋa dí ǹɔii lá fɛ́ɛ.

³² È gɛ̀ sã́ɔɔ é pú ǹɔii ma, ŋ̀ele-gbâna kɛ́ làɣi, tuna fa pû.

³³ È díƃa-wuru-ŋai kélee su kàra da fîi wuru-ŋai, é pɛ́lɛ ǹɔɔ wuru-ŋai dîa.

³⁴ È lòno gotó-ŋa dí kúla a díkpulu su kɛ́tɛ, nyii núu da fa pɔ̂ri kɛ̀ dílônoi.

³⁵ Dí díwuru-ŋai kélee mìi, da dísi-sãai.

³⁶ È Ize lɔii su-ƃelai kélee dílônii-sinaai maa-ŋuŋ-ŋai kélee pàa.

³⁷ Nya ƃe è gɛ̀ Eezuɛ-ŋai dí kúla Ize lɔii su. Dí kùla naa a káne-ŋa, da gôo-ŋa. Díkelee dí lɛ̀ɛ a díkɔlɔi ponoɔɔ, díkponôi kpanaŋɔɔ díkɛ kùla naa.

³⁸ Díkɛɛ kulâi naai, Ize-ŋai dí kɛ̀ a dílii nɛ̃ɛ, kpɛ́ni fêi, dí kɛ̀ yaôi dîa.

³⁹ È gɛ̀ ɣele-kɔlɔŋ kole kɛ́ ƃò ŋɔnûai mɛi, ŋɔŋ kɛ́ ƃò dítuɛ pere a kpíni a gɛɛ é kwaa ponoɔɔ tɛ́ɛ dípɔ.

⁴⁰ Dí m̀arê kɛ̀ mii-sɛŋ mɛni ma. È kpuyíri-ŋa tɛ̀ɛ, é mii-sãa kula ŋ̀elei su é dɛ̀ɛ dípɔ. Dí m̀ii dílii é láa.

⁴¹ È gɛ̀ yá é kúla gɔnii su gɛ́ ɣìliŋ vɛ̃ɛ-kpâlaŋ su yɛ̂ɛ ya lêe.

⁴² È gɛ̀ tí, kpɛ́ni fêi, gono teei è gɛ̀i, maa mɛni è kɛ̀ ǹûai kíli ŋá. È gono-teei ŋí kɛ̀ ŋɔtíi kɛ́-nuui Eberaɣɛ̃ɛ yêei.

⁴³ M̀ɛni ma è ŋɔnûai kùla Ize lɔii su. Dílii è nɛ̃ɛ díkɛ koi-nɛ̃ɛ wule tòo ɣelêi pere.

⁴⁴ È nûa da kpɛ́ni-ŋa dílɔii-ŋa kùla díyêei é dɛ́ɛ Eezuɛ-ŋai pɔ, gɛ́ ƃo a díkɔ̃liŋ.

⁴⁵ È gɛ̀ tí a gɛɛ díkɛ ŋ̀óo mɛni díkɛ ŋɔtɔ̂ŋ-ŋai mɛi kâa. Ka laa maa tɛ̂ tɛɛ Yâwɛɛ pɔ́!