Mąątɛ̨nɛ̨ 103 - Bible

Ɣâla ŋɔwɛli kɛ́-maai

Deeƃé ŋɔwulei

¹ Ŋa pâi Yâwɛɛ láa maa tɛ̂i a ńii kélee. Ŋa pâi ǹáa maa waai maa tɛ̂i a ŋ́gbono kélee.

² Ŋa pâi Yâwɛɛ láa maa tɛ̂i a ńii kélee. Fé pâi niâi ŋɔsɔŋ lɛ̂lɛ-laai mɛni ma.

³ A ńzu mɛni lɛɛ zɔnyɔ̂ŋ-ŋai ŋa gɛ̂i mɛni ma. Ǹyaa ƃa ḿaa kɔlɔ-fela kélee ƃàlo.

⁴ A ŋ́gùla saa wôlo lá. A lûwa làa ḿâ ŋɔwɛli kɛ́-maai sârai é ḿaloŋ káa.

⁵ Zãâi ǹɛ̂lɛɛi ḿɛni mai, a dɛ̀ɛ ḿbɔ tãi nɔ́ ŋ́gaa la ɣele mai. Ǹyaŋ nyíŋi a gɛ̀ ŋ́gɛ ƃò yɛ̂ɛ nyáŋkpa, ŋ́gbonôi kpanaŋɔɔ yɛ̂ɛ kuɛ.

⁶ Yâwɛɛ a tɔ̂ɔ diai mɛni ma nûa da díluânii, é dímɛnii ŋá tée a zãa.

⁷ È ŋɔmɛni kpɛtɛɛ-ŋai lɛ̀ Mose ma, é gɛ́ Eezuɛ-ŋai dí gɛ́-mɛni mĩli-mĩliɛɛ-ŋai naa káa.

⁸ Yâwɛɛ káa a maloŋ kâa da wɛli kɛ́-maa Ɣala. Va ǹíi ŋwàna a maa félaa. Ŋɔwɛli kɛ́-maai káa a wɔ́lɔ-wɔlɔ wɛli kɛ-maa.

⁹ Va wɔ́lɔ kɛ̀ nɔ́ a ǹíi ŋwánaa kûa gɛ́ kúsɔŋ lɛ̀ kûa. Ŋɔlii ŋwânai fa tûa zu.

¹⁰ Va kúkula maa kɛ̂ yɛ̂ɛ berei kúsɔŋ káa lai, kpaa máŋ é kúfela fé kútûa pere ma.

¹¹ Berei kpɔ́ nɔ́ ŋ̀ele-kɔlɔŋ káa la ǹɔii mɛi póŋ-poŋ, bere nɔ́ ƃé ŋɔwɛli kɛ́-maa kpânaŋ káa la diai mɛni ma da ƃaa kɛ́-maa tɛ̂ɛ bɔ́i.

¹² Berei nɔ́ vóloi kulâi-pere kôyaai la vóloi liî-pere mai, bere nɔ́ ƃé a pâi kúsɔnyɔ̂ŋ-ŋai waâi la kûa, kúmaa é kôya dîa.

¹³ Berei nɔ́ ǹaŋ-nuu a ǹônii malôŋ kàa lai, bere nɔ́ ƃé Yâwɛɛ a diai malôŋ kàa la da ƃaa kɛ́-maa tɛ̂ɛ bɔ́i.

¹⁴ È kúkpɛtɛ-pere kɔ́lɔŋ. È gɔ́lɔŋ a gɛɛ kúkaa nɔ́ a pɔ̂rɔ.

¹⁵ Kúfulu-laai káa nɔ́ yɛ̂ɛ kala. Kwa ƃɔ̂lɔ, kú kpɛtɛ nɔ́ yɛ̂ɛ wúru-poa.

¹⁶ Tãi vãa kpânaŋ a pâ lai, a vɛ̀ɛ, é tɛ́ɛ la, núu da fa ŋɔ́nɔ gàa.

¹⁷ Diai da ƃaa kɛ́-maa tɛ̂ɛ Yâwɛɛ pɔ́i, a pâi dí wɛ̂lii, gɛ́ mɛni lɛ́lɛɛ kɛ́ dîɛ, dílônii da díwɔ̂ lòniii, wɔ́lɔ-wɔlɔ da wɔlɔ-wɔlɔ,

¹⁸ gɛ́ ƃò diai kélee mɛni ma da ŋɔkpanaŋ-wooi mɛi kâa, díkɛ sìa a ŋɔtɔ̂ŋ wóo a teniŋ ƃô-perei.

¹⁹ Yâwɛɛ ŋɔkâloŋ see-sɛŋ pîlaŋɔɔi ɣâla-taa. Ŋɔkâloŋ-laai káa sɛŋ kélee mɛi.

²⁰ Káai kélee a ŋ̀âla-taa kela wála-walaa-ŋai, nyii-ŋai da Ɣâla ŋɔtɔ̂ŋ mɛi kâa díkɛ ŋ̀óo mɛnii, ka pá ká laa-maa tɛ̂ tɛɛ Yâwɛɛ pɔ́.

²¹ Káai kélee a ŋ̀wála-wala-ƃelai ŋ̀elei su perei, ka ǹáa maa tɛ́. Káai kélee a ŋɔtíi kɛ́-ƃelai ka ǹîa mɛni kɛ̀i, ka ǹáa maa tɛ́.

²² Ŋɔkpɛtɛ-sãai kélee, ka ǹáa maa tɛ́, káai kélee ŋɔwála-wala-laai mui. Ŋa pâi Yâwɛɛ láa maa tɛ̂i a ńii kélee.