Mąątɛ̨nɛ̨ 102 - Bible

Ǹúui gáa mɔ̃lɛ-laa sui ŋɔɣâla fɛli-wooi

Ǹúui gáa mɔ̃lɛi, kɔlɔ kpɛɛ mai, ŋɔmɛnii è bù Yâwɛɛ ŋɛ́i

¹ Óo Yâwɛɛ, ŋáfɛli-wooi mɛni. Ŋ́ɔlɔ-wooi mɛ́ni, í kpɔ́ŋ ḿâ.

² Ŋà kɛ̀ mɛni pɔ̂lu su, ífe ípôlu fè ḿâ. Ŋà ítòli, ŋ́oo mɛ́ni, í zu too a maa félaa.

³ Ŋáfulu-laai a tɛɛ̂i yɛ̂ɛ luri, ŋ́gbono kɛ́ kèreŋ yɛ̂ɛ ǹyaa ƃé ŋɔŋ a kɛ̀ ḿâ.

⁴ Ŋa kpâlai yɛ̂ɛ kala ƃé fólo a tòo ma. Mii-sɛŋ mii pɔ̂ri da fé ŋɔ́nɔ mî.

⁵ Ŋa nyîɣɛi ɣelêi pere a lɛɛ zu ŋa kpála ŋa lɛɛ a ŋ́gao tée-tee.

⁶ Ŋa kɛ́ nɔ́ yɛ̂ɛ kuɛ ƃe vɛ̃ɛ-kpâlaŋ su kpaa máŋ yɛ̂ɛ m̀ûu ƃe lɔii kpâla ma va gɔ́nɔŋ lɛ́lɛɛ sɔlɔ ƃô.

⁷ Nyii fé ŋɔ́nɔ pâi ŋ́ɛi. Ŋa kɛ́ nɔ́ yɛ̂ɛ ŋɔni ƃé ǹyaa tɔ̂nɔ kwaa ma pɛ́rɛ tôŋ su.

⁸ Ŋ́gbɔara-ƃelai da kɛ́ nɔ́ ńarânii a ɣele kélee. Nûa da kɛ́ nɔ́ ɣɛ́lɛ maa kulâi ŋ́gbonôi díkɛ nûa náɣaŋ làa a ńaa.

⁹ Luu nɔ́ ƃa kɛ́ a ŋ́gɔnɔŋ, ŋ́ɛi-ya kɛ́ yèŋ gɛ́ sùmɔ a ŋ́gbele ya.

¹⁰ Nyíŋi kélee a kɛ̂i a ńyãa, kpɛ́ni fêi, ílii ŋwânai ḿâ, yâ ńziɣe ya ḿbili.

¹¹ Ŋáfulu-laai a kɛ́ nɔ́ yɛ̂ɛ fólo a kɛ̀ liî maa nîniŋ. Ŋa kɛ́ nɔ́ yɛ̂ɛ kala kpâla.

¹² Óo Yâwɛɛ, kɛ́lɛ íkaa a kâloŋ wɔ́lɔ-wɔlɔ da wɔlɔ-wɔlɔ. Ímaa mɛni kíli fé pâi wɔ́lɔ kpɛɛ̂i núu-kpune kíli ŋá.

¹³ Ya pâi ímu siɣêi í Zãiyɔŋ malôŋ káa. Tãi a seri a gɛɛ í m̀alôŋ káa. Maa tãi ká ŋí a seri.

¹⁴ Ínûai dí ŋ̀wɛ́lini, berei máŋ a too lai. Maloŋ kâa káa díyêei m̀ɛni ma, berei máŋ zu karâai lai.

¹⁵ Ǹɔii ŋuŋ-ŋai kélee da pâi kpɛ̃lînii Yâwɛɛ ŋɛ́i-tuɛ, ǹɔii ma kaloŋ-ŋai kélee dí yao gɛ́ mɛni kpaya-kpayai a gɛ̂i mɛ̂ni ma,

¹⁶ tãi a pâi Zãiyɔŋ tɔɔ̂i la pôlui, é gbîŋ ŋɔwála-wala-laai lɛ́i.

¹⁷ A pâi ŋ̀ôli tɔɔ̂i ŋɔnûai dîa m̀ɔ̃lɛ-laa sui, é dífɛli-wooi su too.

¹⁸ Ka Yâwɛɛ kɛ́-mɛni-ŋai ŋí mɛni pɔ̃yɛ tínaa tuɛ-pere mɛni ma, a gɛɛ diai pâi kɛ̂i naai, da pɔ̂ri ǹáa maa tɛ̂i.

¹⁹ Yâwɛɛ káa ŋ̀elei su, ŋ̀óli tɔ̂ɔ ǹɔii ma pere.

²⁰ Diai kpini-pɛrɛ mu nyii nûa da fáa ma a gɛɛ dí dípaai, da mɔ̃lɛi, díkɛ wɔ̀lɔi, Yâwɛɛ a díwɔlɔ-woo mɛ́ni, ǹyaŋ a pâi díŋuŋ maa ƃôi.

^21-22 M̀ɛni ma, nûa da pâi kulâi lɔii ŋuŋ-ŋa su dí pá Zãiyɔŋ Yâwɛɛ fɛlîi. Da pâi ŋɔkɛ́tɛ-laai maa mɛni ƃôi, dí ǹáa ma tɛ́ Zerusâlɛŋ.

²³ Yâwɛɛ a gɛ́ kɔlɔ a kpɛɛ ḿâ, ŋ́gɛ ƃò niî a núu ŋûnu. A gɛ́ ŋáfulu-laai su a kpua.

²⁴ Óo Ŋáɣâlai, ífe niî ńzîɣe, é lɛ́ɛ la zu ŋá pɔlɔ. Óo Yâwɛɛ íkaa ɣele ma wɔ́lɔ-wɔlɔ da wɔlɔ-wɔlɔ.

²⁵ Yá ƃé ǹɔii kpɛ̂tɛ tãi su kôyaa tɛɛ pôlu ma, í ŋ̀elei kpɛtɛ a yá kpîŋ íyee.

²⁶ Da pâi tɛɛ̂i kɛ́lɛ íkaa nɔ́ naa. Dílɛlɛ-ŋɛi a pâi kpɛɛ̂i dîa yɛ̂ɛ seɣe í dífala-fala, dí láŋ núu-kpune ŋɛ́i.

²⁷ Kɛ́lɛ ímaa fa wɔ́lɔ fàleŋ, ífa têla sàa.

²⁸ Kúnîa-pɛlɛɛi da pâi kɛ̂i ɣele ma ŋuŋ ma ƃô-pere su, ímaa kɔ̃ɔ-laai sarâi. Bere nɔ́ ƃé a pâi kɛ̂i la a díwɔ̂ nia-pɛlɛɛi ísârai.