Lonon mo 35 - Bible

Livai-ŋai dítaa-ŋai

¹ Yâwɛɛ è lòno Mose pɔ́ Môa fɛ̃ɛ-kpalaŋ su Zɔdiŋ Ya-leei pôlu Zɛleko téniŋ ma ǹyɛɛi,

² “Mó Eezuɛ-ŋai dîa a gɛɛ dí taa-ŋa tɛɛ Livai-ŋai pɔ́ nyii-ŋai díkaa dílɔii sui a gɛɛ dí sée dísu. Ka kpalaŋ-ŋa tɛɛ dípɔ máŋ nyii-ŋai díkaa daa-ŋai tí kɔlɛi.

³ Daa-ŋai ŋí da pâi kɛ̂i a dípɔɔ a gɛɛ dí sée dísu. Gbanâŋ-ŋai da pâi kɛ̂i dítaa-tulɛ-ŋai da vɛnɛ-sãai mɛni ma.

⁴ Gbanâŋ-ŋai ŋí da pâi dɛɛ̂i Livai-ŋai pɔ́i, dɔnɔ ŋɔkoya a pâi kɛ̂i é síɣe daa-siɣaŋ ma é lí gbalaŋ góyaŋ ma a wãaŋ ŋuŋ lɔ́ɔlu daai m̀éla naaŋɔɔ ma.

⁵ Ka wãaŋ wála tɔnɔ (1,000) kɔ̂ɔŋ daai vóloi kulai-pere ƃelai ma, ka ŋɔ́nɔ wãaŋ Wála tɔnɔ (1,000) kɔ̂ɔŋ daai kwára-pere ƃelai ma, ka ŋɔ́nɔ wãaŋ wála tɔnɔ (1,000) kɔ̂ɔŋ daai vóloi lii-pere ƃelai ma, ka wãaŋ wála tɔnɔ (1,000) kɔ̂ɔŋ máŋ daai ŋûa-pere ƃelai ma, daai kɛ́ ƃò ǹɔii sâmai. Gwaai ŋí mà ƃe pâi kɛ̂i a daai ŋɔkpanaŋ-ŋá tîi kɛ̂i.

⁶ Daa-ŋai ká dɛ̀ɛ Livai-ŋai pɔ́i, ǹɔ́ɔlu mɛi da é kɛ́ a ƃɛ́i núu a núu da pàa, nyii vé gili ní é gɛi a pɔ̂ri liî naa a gɛɛ é ŋuŋ-ma ƃo sɔlɔ bô. É kúla daa-ŋai ŋí pôlu ka taa buu náaŋ káo feerɛ tɛ́ɛ dípɔ máŋ.

⁷ Daa-ŋai ŋí da maa-kpalaŋ-ŋai ka pâi dɛɛ̂i Livai-ŋai pɔ́i gélee púɔ gîe ma a pâi kɛ̂i a taa buu náaŋ káo lɔ́ɔlu mɛi saaƃa.

⁸ Ka pâi daa-ŋai kulâi Eezuɛ-ŋai yêei ká dítɛɛ Livai-ŋai pɔ́ yɛ̂ɛ berei kásuu tɛi-tɛi-ŋai kɛ̂tɛi lai. Ǹûai nyii-ŋai dísuu kɛ̂tɛi ka pâi dámaa kulâi díyêei, ǹûai nyii-ŋai dísuu fé kɛ́tɛ ní, káfe pâi dámaa kulâi díyêei.”

Maa-kɔ̃ɔ taa-ŋai

⁹ Yâwɛɛ è mò Mose ma ǹyɛɛi,

¹⁰ “Mó Eezuɛ-ŋai dîa yɛ̂ɛi, tãi ká Zɔdiŋ Ya-leei tiyeŋ la ká píli Keena lɔii sui,

¹¹ ká maa-kɔ̃ɔ-taa-ŋai ɣɛ́ɛ daa-ŋai su ƃɛ́i núu à núu pàa kɛ́lɛ vé gíri níi, a pɔ̂ri pûi é lí naai.

¹² Nàa ƃé a pâi kpɔŋ-maa sɔlɔ ƃôi naa a gɛɛ zaa-nuui ŋɔnûai dífe bàa é lɛ́ɛ la zu dí ŋɔmɛnii ŋá tée mɛni-saa-ƃo-kerei mu.

¹³ Ka taa lɔ́ɔlu mɛi da siɣe daa-lee-ŋai sama ká díkɛ a maa-kɔ̃ɔ-taa-ŋa.

¹⁴ Ka zaaƃa kúla Zɔdiŋ Ya-leei pôlu-pere. Ká zaaƃa kúla ŋɔ́nɔ Keena lɔii su-pere.

¹⁵ Daa lɔ́ɔlu mɛi da-ŋai ŋí dí kɛ́ a maa-kɔ̃ɔ-taa-ŋa Eezuɛ-ŋai mɛni ma, da ŋɔ̃ya-ŋai é pɛ́lɛ ŋwɔ̃yɛ-ŋai dîa kásama. Núu a núu pàa nyii vé gíri ní, a pɔ̂ri pûi é lí naa.

¹⁶ “Kɛ́lɛ à kɛ̀ núu a núu sɔ̀ɔ a kɔli-sɛŋ ǹyaŋ ǹúui a sàa, gɛ̀ ní gáa a núu-paa-nuu. Fɛ̂ɛ dí maa-nuui tí páa.

¹⁷ À kɛ̀ núu ta à núu sɔ̀ɔ a kɔni, ǹyaŋ maa-nuui à sàa, gɛ̀ ní gáa a núu-paa-nuu. Fɛ̂ɛ dí maa-nuui tí páa.

¹⁸ À kɛ̀ núu ta à m̀arâŋ-nuu lòkwa a wúru, ǹyaŋ maa-nuui à sàa, gɛ̀ ní gáa a núu-paa-nuu. Fɛ̂ɛ dí maa-nuui tí páa.

¹⁹ Zaa-nuui ŋɔkaayɔɔ kpîŋ ŋuŋ-maa-mɛni ká tí a gɛɛ é ǹúu-paa-nuui páa. Tãi à gàa lai fɛ̂ɛ é báa.

²⁰ “À kɛ̀ núu ta à m̀arâŋ-nuu kpɔ̀ara é dùaŋ é dòo kpaa máŋ é gíri é zɔɔ a sɛŋ da, à kɛ̀ maa-nuui à sàa,

²¹ kpaa máŋ à kɛ̀ núu da à m̀arâŋ-nuu tùa a mɔ-tai, ǹyaŋ maa-nuui à sàa, gɛ̀ ní maa-nuui káa a núu-paa-nuu. Fɛ̂ɛ dí maa-nuui tí páa. Zaa-nuui ŋɔkayɔɔ kpîŋ-kpiŋ ŋuŋ-maa-mɛni ká tí a gɛɛ é ǹúu-paa-nuui páa tãi à gàa lai.

²² “À kɛ̀ núu da a m̀arâŋ-nuu tùaŋ a maa félaa é dòo nyii vé gbɔara ní, kpaa máŋ é zɔɔ a sɛŋ da nyii vé gíri ní,

²³ kpaa máŋ à kɛ̀ núu da a m̀arâŋ-nuu sɔ̀ɔ a kɔni dɛ́i-pere nyii vé ǹúui tí káa ní ǹyaŋ vé gíri ní, vé ŋɔ́nɔ ǹúui tí kpɔara ní a kɛ̀ maa-nuui tí à sàa,

²⁴ gɛ̀ ní fɛ̂ɛ Eezuɛ-ŋai dí ǹúu-paa-nuui da zaa-nuui díloai mɛni ƃó yɛ̂ɛ berei dɔŋ-ŋai ŋí díkaa lai. Dífe mò a ǹúui dí baai ŋɔnûai dí yao-maa.

²⁵ Fɛ̂ɛ Eezuɛ-ŋai dí ǹúu-paa-nuui maa kɔ̃ɔ zaa-nuui ŋɔnûai yêei, dí lí la pôlu maa-kɔ̃ɔ-taai su ƃɛ́i é pú é lí naai. Fɛ̂ɛ é lɛ́ɛ naa é lɛ́ɛ la zu ǹúui dí zèe a zâla láa-soŋ-nuu kɛ́tɛi é sáa fúlɔi.

²⁶ Kɛ́lɛ à kɛ̀ ǹúu-paa-nuui à kùla maa-kɔ̃ɔ-taai su ƃɛ́i è pù é lí naai,

²⁷ ǹyaŋ zaa-nuui ŋɔnúu da à gàa kwaa da kpɛ́ni ma, à ǹúu-paa-nuui pàa, gɛ̀ ní zɔŋ fêi.

²⁸ Fɛ̂ɛ ǹúu-paa-nuui é lɛ́ɛ maa-kɔ̃ɔ-taai su é lɛ́ɛ la zu zâla láa-soŋ-nuu kɛ́tɛi é sáa. Gɛ̀ ní zâla láa-soŋ-nuui saa pôlu ma, ǹúu-paa-nuui a pɔ̂ri liî pôlu bɔ́-taai.

²⁹ Fɛ̂ɛ Eezuɛ-ŋai dí dɔ̂ŋ-ŋai ŋí mɛi káa wɔlɔ-wɔlɔ da wɔlɔ-wɔlɔ ƃɛ́i kélee da kɛ̂ naai.

³⁰ “À kɛ̀ núu da a núu pàa fɛ̂ɛ sêre feerɛ dí sêre-faa kɛ́ dí lɛ́ɛ pâi ǹúu-paa-nuui pâai. Sêre tɔnɔ ŋɔsêre-woo fa pɔ̂ri gɛ̂i a gɛɛ dí ǹúu-paa-nuui páa.

³¹ Káfe sɛŋ-kao sòŋ a maa-tee-sɛŋ ǹúu-paa-nuui yêei nyii gìri é núu páai. Fɛ̂ɛ maa-nuui tí é sáa.

³² Káfe máŋ sɛŋ-kao sɔlɔ ƃò a maa-tee-sɛŋ ǹúui yêei nyii pù é lí maa-kɔ̃ɔ-taai su, a gɛɛ ká ǹɛɛ naa é lí pôlu bɔ́-taai zâla láa-soŋ-nuu kɛ́tɛi é lɛ́ɛ pâi sâai.

³³ Káfe kálɔii kàra a núu ŋãa púɔɔ. Kpɛni fêi, núu ŋãa púɔɔ a lɔii kɛ̂ maa fa kɛ̂ a ŋwaa. Ǹyaŋ káfa pɔ̂ri ǹɔii karâai kɛ̂i maa é wáa, fɛ̂ɛ ká maa wáa a ǹúu paa-nuui ŋãa.

³⁴ Káfe ǹɔii kɛ̀ maa é liƃi ƃɛ́i kákaa naai. Kpɛni fêi, ńyãa Yâwɛɛ ŋ́gaa kásama káai a Eezuɛ-ŋai.”