Lonon mo 25 - Bible

Eezuɛ-ŋai dí Môa-ŋai díɣâlai Bêe fɛ̀li

¹ Tãi Eezuɛ-ŋai dí díƃûui pù la Akesia tiŋ-tiŋ sui, gbakolo-ŋai da-ŋa díkɛ̀ lɔ-pɔ̂rɔŋ kɛ̂i a Môa-nɛyãai kɛ̀ naai.

² Môa-nɛyãai dí maa kpakolo-ŋai ŋí tòli díɣâlai ŋɔsâla-kula-kûui su. Nya ƃe Eezuɛ kpakolo-ŋai ŋí dí zâla mii-sɛŋ mìi dí Môa-ŋai díɣâlai fɛ́li.

³ Nya ƃe Eezuɛ-ŋai dí pìlaŋ Môa-ŋai díɣâlai Bêe-Peɔ pôlu. Mɛni ma Yâwɛɛ líi è ŋwàna Eezuɛ-ŋai dîa.

⁴ Yâwɛɛ è mò Mose mà ǹyɛɛi, “Eezuɛ-ŋai díkâloŋ-ŋai kélee sóŋ nyii-ŋai díyee káa m̀ɛnii ŋí sui, í dípaa ŋ́ɛi-tuɛ vóloi ŋá a gɛɛ ŋálii-ŋwânai ŋá é yéŋ Eezuɛ-ŋai dîa.”

⁵ Nya ƃe Mose è mò mɛni ŋá-tee-ƃelai dîa ǹyɛɛi, “Diai kélee pìlaŋ Bêe-Peɔ pôlu kásuui sui, ka dípaa.”

⁶ Eezuɛ-ŋai dí kɛ̀ wɔlɔ̂i Yâwɛɛ ma ŋɔsua kɔlɔ seɣe pɛrɛ maa waai la. Gɛɛ tíi, Eezuɛ-nuu tɔnɔ è pà a Midiɛŋ-nɛni tɔnɔ ŋɔƃûui la ŋɔnûai sáma.

⁷ Tãi zâla láa-soŋ-nuu kɛ́tɛi Eelɔŋ ǹóŋ Ilieza ǹóŋ Fineɣa è nyíŋi kàa lai, è kùla ǹûai sáma, é ŋɔkpalai síɣe,

⁸ é pílaŋ la Eezuɛ-nuui pôlu ŋɔsua kɔlɔ seɣe pɛrɛi mu é dífeerɛŋɔɔ dísɔɔ a gbalai. Mɛnii ŋí ƃé gɛ̀ zaa-kɔlɔ-felai kɛ́ kpèra Eezuɛ-ŋai sáma.

⁹ Kɛ́lɛ diai gɔlɔ-fêlai ŋí è dípàai díkaa a núu wála buu feerɛ káo náaŋ (24,000).

¹⁰ Nya ƃe Yâwɛɛ è mò Mose mà ǹyɛɛi,

¹¹ “Mɛnii zâla láa-soŋ-nuu kɛ́tɛi Eelɔŋ ǹóŋ Ilieza ǹóŋ Fineɣa è gɛ̀i nya ƃe gɛ̀ a gɛɛ ŋálii-ŋwanai ŋá é yéŋ Eezuɛ-ŋai mɛni ma. Kpɛni fêi, è ḿaa lii-ŋwana kɛ̀ dísama. Nya ƃe gɛ̀ a gɛɛ ŋálii-ŋwanai fé Eezuɛ-ŋai su kara ní.

¹² Mó mà a gɛɛ ŋa pâi ŋákpanaŋ-wooi kɛ̂i ǹyêei.

¹³ Ǹyaa da ŋɔsuui su-ƃelai da pâi kɛ̂i a sâla-laa soŋ-ƃela wɔ́lɔ-wɔlɔ da wɔlɔ-wɔlɔ. Kpɛni fêi, vé fáa ní ma a gɛɛ ǹûai dí ɣâla da kpɛ́ni tɔ́ɔ ńduɛ. È Eezuɛ-ŋai dísɔnyɔ̂ŋ su-mɛni-lɛɛ maa-sala kula.”

^14-15 Eezuɛ-nuui è bàai, ǹáa ƃé kɛ̀ a Zimi nyii kɛ̀ a Simiɔŋ ŋɔsuui su-ƃelai túɛ nuui dɔnɔ Salu ǹóŋ. Ǹyaŋ Midiɛŋ-nɛnii è bàai, ǹáa ƃé kɛ̀ a Kɔbi nyii kɛ̀ a Midiɛŋ-ŋai díkâloŋ dɔnɔ da kɛ̂ mà Zɔ̂ɔ ǹóŋ-nɛnii.

¹⁶ Nya ƃe Yâwɛɛ è mò Mose mà ǹyɛɛi,

¹⁷ “Ka kɔ́ pɛ́lɛ Midiɛŋ-ŋai dîa ká dísu kara,

¹⁸ mɛni nyɔ́mɔɔ-ŋai mɛni ma dí gɛ̀ a káa tãi dí kápɛ̀lɛ la, dí gɛ̀ ká kɛ́ díɣâlai Bêe fɛli Peɔ, da Kɔbi mɛni ma nyii dí bàa tãi zaa kɔlɔ-felai è pɛ̀lɛ la kâa Peɔi.”