Korɛntə veelɛ 4 - Bible

¹ Mɛni ma tãi nɔ́ díi ŋí káa la kúyêei Ɣâla ŋɔmaloŋ-kaai sui, kúfii fe kpɛ̀ɛ.

² Kwa kúyee kúla noo-mɛni-ŋai su nyíi-ŋai díkaa a ŋumɛ-mɛnii; kúfa fâa ma a gɛ́ɛ ku wôya maa kɔ́ri, kpaa máŋ ku Ɣâla ŋɔwóoi ƃó a maa-faleŋɔɔ, kɛ́lɛ, kwa kúkpîŋ lɛ̀ nuu-kpune ŋɔkili-ŋa-siai ma Ɣâla ŋɛi a Ɣâla ŋɔtɔ̃yâ-wooi ƃóɔ pono ŋá.

³ À kɛ̀ máŋ kútuŋ lɛ́lɛɛi loôi, gɛ̀ ní ǹoôi nɔ́ diai dîa díkaa saâi.

⁴ Diai laa-la fe díyêei ŋ̀éniɛi ŋí su-ɣalai a díkili ŋá tɛ̀i a gɛ́ɛ dífe Kôrai ŋɔfólo-laai maa-tuŋ lɛ́lɛɛi ŋɔkwaa-ponoɔi kàa, nyíi gáa a Ɣâla-pɔɔkɔ̂ŋ.

⁵ Kpɛ́ni fêi, kúfe kúa kpîŋ kúmaa-mɛni ƃôi, kɛ́lɛ, kwa Zîsɛ Kôrai maa-mɛni ƃôi a gɛ́ɛ gáa a Kúnuu-namui, kúa kpîŋ kúkaa a káyee-mu-ƃela Zîsɛ maa-mɛni ma.

⁶ Ŋ̀âlai ŋí ƃé m̀o, ǹyɛɛi, “Tɔɔ kwaa-ponoɔ é folo gbínii su,” nyíi a fólo kúlii su a gɛ́ɛ e Ɣâla ŋɔfólo-laai maa-tarei ŋɔkwaa-ponoɔi tɛ́ɛ kúpɔ volo-laai su nyíi gáa Kôrai mai.

Kwa kúfulu-laai kɛ̀ a laa-laa

⁷ Kɛ́lɛ, dɔɔ-sɛŋ ŋí káa kúyêei pɔrɔ-leɣi su, nyíi a nɛ̀ a gɛ́ɛ ŋwála-wala su-kɛ́tɛi ŋí fa kûla kúyêei, kɛ́lɛ, a kûla Ɣâla yêei.

⁸ Mɛni-kpɔ̂lu a pâ kúpɔ pere-sii kélee su, kɛ́lɛ, va kúyee mɛi ɣale; kúpɛlɛ a pû, kɛ́lɛ, kúfii fa kpɛ̂ɛ;

⁹ da kúkpɔara, kɛ́lɛ, kúwɛli-kɛ-maa-ƃelai dífa dípôlu tɔ̀ɔ kûa; dí kútòo, kɛ́lɛ, kúsu fé kara ni;

¹⁰ Zîsɛ ŋɔsaai káa kúkponôi a tãi kélee a gɛ́ɛ ŋɔfúlu-laai e lɛ máŋ kúkponôi.

¹¹ Kpɛ́ni fêi, tãi kúkaa la ɣele mai, kútɛɛ̂i saa pɔ Zîsɛ mɛni ma, a gɛ́ɛ ŋɔfúlu-laai e lɛ kúkponôi su nyíi a saai.

¹² Mɛni ma saa káa tíi kɛ̂i kúkponôi, kɛ́lɛ, fulu-laa káa tíi kɛ̂i kákponôi.

¹³ Tãi nɔ́ naa-la-mɔ̂leŋ tɔnɔi ti káa la kúkponôi yɛ̂ɛ berei gáa la ǹúui kponôi nyíi bɔ̃̀yɛ, “Ŋá làa la, mɛni ma ŋá lòno,” kwa láa la máŋ, ǹyaŋ kwa lóno.

¹⁴ Ku gɔ́lɔŋ a gɛ́ɛ ǹúui Kúnuu-namui Zîsɛ mu siɣe saa yêei, a pâi kúmu siɣêi saa yêei máŋ kwa Zîsɛ-ni é pá a kúa kwa kaa-ni ŋ̀ɛi tuɛ.

¹⁵ Gáa kákelee kámɛni ma a gɛ́ɛ berei ƃɛlɛ-sêe a lî la núu támaa pɔi, a sɛɣɛi-fei ƃɔlɔ Ɣâla ŋɔfólo-laai mɛni ma.

¹⁶ Mɛni ma kúfii fe kpɛ̀ɛ. Berei máŋ kúkpono a pɔlɔ̂i la a tãi kéleei, kúmɔ̂leŋ káa kɛ̂i nɔ́ a nina a ɣele kélee.

¹⁷ Kpɛ́ni fêi, tãi kpuai ŋí su-mɛni-kpɔ̂lu-loŋ a wɔlɔ-wɔlɔ folo-laa kɛ́tɛ kpɛtɛ̂i ká mɛni ma, nyíi gɔ̀ɔŋ-maa fe mai.

¹⁸ Kpɛ́ni fêi, kúkili fe zãâi dîa nyíi-ŋai kwa díkaâi, kɛ́lɛ, kúkili káa zãâi dîa nyíi-ŋai kúfa díkaâi; kpɛ́ni fêi, zãâi kwa díkaâi da pâi tɛɛ̂i, kɛ́lɛ, zãâi kúfa díkaâi díkaa nɔ́ naa wɔlɔ-wɔlɔ.