Korɛntə veelɛ 3 - Bible

Gbanaŋ-woo-Kɛɛ Ninai maa-tii kɛ́-ƃela

¹ Kwa pá pɛlɛ̂i kúkpîŋ lɛ́ɛ ma ŋɔ́nɔ? Kpaa fɛ̂ɛ ku kɔlɔ tɛɛ kápɔ kúlɛ mɛni ma, yɛ̂ɛ berei núu da-ni da gɛ̀ lai, kpaa máŋ fɛ̂ɛ ku kɔlɔ kúla káyêei.

² Káa kpîŋ kákaa a kɔlɔ kúlɛ mɛni ma, nyíi bɔ̃yɛɛ̂i kálii su a gɛ́ɛ núu kélee dí gɔ́lɔŋ dí ǹónoi.

³ Ka nɛ̀ a gɛ́ɛ ká káa a kɔlɔ nyíi kùla Kôrai yêei kú dɛɛi. Gɔlɔi ŋí fé pɔ̃yɛ ní a kɔlɔ-ya, kɛ́lɛ, bɔ̃yɛɛ̂i a vúlu-laa Ɣalai Ŋɔmɔ̂leŋ, vé pɔ̃yɛ ní kɔni-ƃêla ma, kɛ́lɛ, bɔ̃yɛɛ̂i núu-kpune líi su.

⁴ Gili-kɛ-maa-sii ti ƃe gáa kúyêei Ɣâla pɔ-pere Kôrai sârai.

⁵ Zu-kulâi fa a gɛ́ɛ kú gula kɛ́ɛ̂i ƃoɔɔ̂i a gɛ́ɛ ku mɛni kélee da ƃó nyíi a kùla kúkponôi; kɛ́lɛ, kúgula-kɛ-laai a kúla Ɣâla yêei,

⁶ nyíi a kúkɛ kwa gula kɛ́ a gɛ́ɛ ku kɛ́ a kpanaŋ-woo kɛ́ɛ nina mɛi-ƃelai, ve a tɔ̂ŋ nyíi bɔ̃yɛɛ̂i, kɛ́lɛ, a kulâi M̀ɔlêŋ yêei; kpɛ́ni fêi, dɔ̂ŋ nyíi bɔ̃yɛɛ̂i a núu pàa, kɛ́lɛ, M̀ɔlêŋ a fulu-laa tɛ̀ɛ núu pɔ.

⁷ Kɛ́lɛ, à kɛ̀ díi nyíi a pâ a saa nyíi bɔ̃yɛɛ̂i kɔni mai, è pà a folo-laa a gɛ́ɛ Eezuɛ-ŋai dífe pɔ̂ri Mose ŋɛi kâai sii, kpɛ́ni fêi ŋ̀ɛi è kɛ̀ fólôi, nyíi maa-folo-laai è kɛ̀ tɛɛ̂i,

⁸ le ŋaŋ ƃe folo-laa támaa fa kɛ̂ la M̀ɔlêŋ ŋɔtíi mai?

⁹ À kɛ̀ folo-laa è kɛ̀ mɛnii ma a pâ a dɔ̂ŋ pu-mai, ǹɛ́lɛɛ̂i a gɛ́ɛ vólo-laai gáa m̀ɛnii ma a pâ a tɔ̃yâ laa-lai é kɛ́ a ǹɛ́lɛɛ é tɛ́ɛ.

¹⁰ Tɔ̃yâ ma, bere-sii ŋí su, nyíi folo-laa è kɛ̀ ma a maa-ŋuŋ, folo-laa da kélee fe ŋɔ́nɔ ma, volo-laai nyíi tɛ̀ɛ mai mɛni ma.

¹¹ Kpɛ́ni fêi, à kɛ̀ zɛŋ nyíi tɛɛ̂i è pà a folo-laa, gɛ̀ ní zɛŋ nyíi gáa naa wɔlɔ-wɔlɔ da wɔlɔ-wɔlɔi fɛ̂ɛ folo-laa é kɛ́ ma.

¹² Tãi gili-kɛ-zu-sii ti káa la kúyêei, lii-kpele támaa káa kúyêei,

¹³ kúfe yɛ̂ɛ Mose nyíi ŋ̀ɛi mɛi pɛ̂lɛ a gɛ́ɛ Eezuɛ-ŋai dífe ŋɔfólo-laa tɛɛ̂i gbɛɛ ŋá kàai.

¹⁴ Kɛ́lɛ, dílii su è kɛ̀ a gbanaŋɔɔ, kpɛ́ni fêi, é séri tãi ŋí ma tãi da gbanaŋ-woo kɛɛ-pɔlɔi lôno lai, ǹúu ŋɛi mɛi pɛlɛ-sɛŋ ti káa nɔ́ niî naa, kpɛ́ni fêi, Kôrai sârai nɔ́ ƃe a kûla la naa.

¹⁵ Tɔ̃yâ ma, é séri tãi ŋí ma, tãi nɔ́ da Mose ŋɔmɛnii lôno lai, núu ŋɛi mɛi pɛlɛ-sɛŋ-mɛni a tôo díkili ŋá a tãi kélee;

¹⁶ kɛ́lɛ, à kɛ̀ núu à tìnaŋ Kúnuu-namui pɔ naa-pere núu ŋɛi mɛi pɛlɛ-sɛŋ mɛni a kpɛ̃ɛ.

¹⁷ Kúnuu-namui ƃa M̀ɔlêŋ, ǹyaŋ ƃɛi Kúnuu-namui Ŋɔmɔ̂leŋ káa naai, nàa ƃe ŋuŋ-ma-ƃo káa naa.

¹⁸ Ǹyaŋ kúkelee kúai kúŋɛi mɛi fe pɛlɛ níi, kwa Kúnuu-namui ŋɔfólo-laai kâa, kúmaa a fâleŋ ku kɛ́ yɛ̂ɛ ǹyaa, ku kúla folo-laa-loŋ su, ku píli folo-laa kɛ́tɛ su; kpɛ́ni fêi, nyíŋi a kulâi Kúnuu-namu yêei, nyíi gáa a M̀ɔlêŋ.