Korɛntə veelɛ 11 - Bible

Pɔ̂ɔ da ǹɛ́ɛ sia-ƃelai

¹ Ka káwoli tɔ́ɔ ḿâ ŋáƃoo-lono-wooi su. Ka káwoli tɔ́ɔ ḿâ a lii-kpêle!

² Ɣâla-tólo káa ńii su kámɛni ma, kpɛ́ni fêi, ŋa kátɛ̀ɛ Kôrai pɔ́ a gɛ́ɛ ŋá ká lɛ́ yɛ̂ɛ núu à kɛ̀ nɛnî maa-waa tɛɛ̂i ŋɔsurɔ̂ŋ pɔ́ nyíi gɔli-kao lai.

³ Kɛ́lɛ, ŋ́gaa yaôi a gɛ́ɛ yɛ̂ɛ berei nɔ́ gàlii è Iî pɛ̀lɛ la a ŋɔwôyai, bere ƃe kákili-ŋa-siai a pâi kakulâi la Kôrai ŋɔsã́a-laai da ŋɔtɔ̃yâ laa-lai maa-wɛli-kɛ-maai ma.

⁴ Kpɛ́ni fêi, à kɛ̀ núu da à pà é Zîsɛ da kpɛni maa-mɛni ƃó káa é kúla nyíi pôlu ku maa-mɛni ƃò káa a maa-ŋuŋ, kpaa máŋ kà mɔ̂leŋ da kpɛ́ni sɔlɔ ƃô é kúla nyíi pôlu ká zɔlɔ ƃô a maa-ŋuŋ, kpaa máŋ kà káyee sèe tuŋ da kpɛ́ni mu é kúla nyíi pôlu ká káyee sèe mu a maa-ŋuŋ, gɛ̀ ní káyee-see-mui a pâi kɛ̂i a nàa fii kpɛ̂ɛ.

⁵ Gáa ŋ́gili ŋá a gɛ́ɛ fe a nuu-doo-mu pere-sii kélee su zia-ƃelai ŋí sama nyíi-ŋai da dí-kpîŋ kɛ̀tɛi.

⁶ À kɛ̀ máŋ fa pɔ̂ri lônoi a ǹɛ́lɛɛ, táre lɛ́lɛɛ káa ńyêei; pere-sii kélee su kwa nyíŋi ŋá lɛ̀ káa a ǹɛ́lɛɛ mɛni kélee su.

⁷ Ŋá sɔnyɔ̂ŋ kɛ̀ a ŋ́gbîŋ maa-yeŋɔɔ a gɛ́ɛ kámaa é tɛ́, kpɛ́ni fêi, ŋa Ɣâla tuŋ lɛ́lɛɛi ƃò káa káfe ḿvela fe ni?

⁸ Ŋa Kôrai-toli-kpɔŋ da kpɛni-ŋai ŋuma a sɛŋ-kao soŋɔɔ díyêei a gɛ́ɛ ŋá tíi kɛ́ kâa.

⁹ Tãi ŋá kɛ̀ la kákɔlɛi, ŋá sãâ wɛ́li kɛ̀, fe kákpaaŋ ni, kpɛ́ni fêi, zãâi ŋá kɛ̀ ŋ̀wɛ́li kɛ̂i, ḿarâai nyíi-ŋai kùla Masadoniai dí dɛ̀ɛ ḿbɔ. Mɛni ma fe kákpaaŋ ni, fe tela pâi kákpaanîi pere-sii kélee su.

¹⁰ Berei Kôrai, ŋɔtɔ̃yâi káa la ŋ́gbonôi, ŋáyoŋkai ŋí fe pâi kperâi Ɛkeya kpiniŋ su.

¹¹ Le-mɛni ma? Kpɛ́ni fêi, fe káwɛli ni? Ɣâla e gɔ́lɔŋ a gɛ́ɛ ŋa káwɛli ni.

¹² Mɛnii ŋa gɛ̀i, ŋa pâi kɛ̂i nɔ́ gɛ̂i a gɛ́ɛ ŋa diai kpera da dítii maa-yoŋka tèe a gɛ́ɛ da dítii kɛ̀ yɛ̂ɛ berei kwa kúwɛi kɛ̂ lai.

¹³ Kpɛ́ni fêi, nuu-sii kɛɛ-ŋai ti díkaa a woya-sia-ƃela, dí ƃo a núu-pɛlɛ tii-kɛ-ƃela, díkɛ dí-kpîŋ kɛ̀ yɛ̂ɛ Kôrai ŋɔsia-ƃela.

¹⁴ Ǹyaŋ ve a la-kpala maa-mɛni, kpɛ́ni fêi, Sêtɔŋ a gbîŋ kɛ́ máŋ yɛ̂ɛ gwaa-ponoɔi ŋɔkéla.

¹⁵ Mɛni ma ve a mɛni nina à kɛ̀ Sêtɔŋ yée-mu-ƃelai máŋ da díkpîŋ kɛ̀ yɛ̂ɛ tɔ̃yâ laa-la maa-yee-mu-ƃela. Dísaai a pâi kulâi nɔ́ dítûa-perei su.

Pɔ̂ɔ kɛ́ɛ a sia-nûui è mɛni-sôli káa

¹⁶ Ŋa nyíŋi ƃôi ŋɔ́nɔ, núu da fe ńziɣe a ƃoo-nûu; kɛ́lɛ, à kɛ̀ kà ńziɣe máŋ a ƃoo-nuu, gɛ̀ ní ka ńziɣe la a gɛ́ɛ ńyãa máŋ ŋa yoŋka tée a guro.

¹⁷ Ŋà kɛ̀ ǹyoŋkai ŋí teêi, mɛnii ŋa m̀ôi, fe m̀ôi a Kúnuu-namui ŋɔwála-wala-laai, kɛ́lɛ, ŋa m̀ôi yɛ̂ɛ ƃoo-nuu.

¹⁸ Núu támaa da ŋ̀éniɛi ŋí su-sãai maa-yoŋka tèe, mɛni ma ńyãa máŋ ŋa pâi yoŋka têei.

¹⁹ Táre-ƃela kɛ́ɛ yɛ̂ɛ káa lii-kpele káa káyêei ƃoo-ƃela mɛni ma!

²⁰ Ka fâa ma à kɛ̀ núu à ká kɛ̀ a ŋɔluɛ-ŋa, é ǹîa kɛ́ kákɔ̂liŋ su, núu à woya kɛ̀ a káa, núu à gbîŋ kɛ̀tɛ kámɛi, núu à tela kálôkwa káŋɛi.

²¹ Ŋúmɛ káa ŋ́ɛi a gɛ́ɛ ŋá m̀ó a gɛ́ɛ kú kɛ̀ a kúfii kpɛɛ a gɛ́ɛ kú túa yɛ̂ɛ núu-sii kɛ́ɛ ti! Kɛ́lɛ, à kɛ̀ núu da à sɛŋ da maa-yoŋka tèe-berei máŋ ŋ́gaa ƃoo-lono kɛ̂i lai-ŋa m̀aa-yoŋka tèe ǹyaa máŋ.

²² Díkaa a Ibulu-ŋa? Ŋ́gaa la ńyãa máŋ. Díkaa a Eezuɛ-ŋa? Ŋ́gaa la ńyãa máŋ. Díkaa a Eberaɣɛ̃ɛ ŋɔsuui da? Ǹyaa máŋ ŋ́gaa a da.

²³ Díkaa a Kôrai yée-mu-ƃela? Berei máŋ ŋ́gaa ƃoo lôno kɛ̂i lai, ńdɛɛ̂i dîa kpɔ́ a dámaa tíi kɛ́ɛ su, kpini-pɛrɛ siɣeɛ su, lókwa su, ŋá kɛ̀ pâi saâi máŋ.

²⁴ Ŋa lókwa buu saaƃa kao lɔ́ɔlu mɛi náaŋ sɔlɔ ƃô la kɛ̀ Zûu-ŋai yêei lɔ́ɔlu.

²⁵ Dí ńokwa la kɛ̀ saaƃa a fáa-ɣiri; dí ńzɔɔ tɔnɔɔ a kɔni. Yá-ŋa-keleŋ e pu a ńyãa saaƃa; ŋa kpini tɔnɔ da folo tɔnɔ kɛ̀ ǹyái ŋá;

²⁶ ŋá sia támaa kɛ́, ŋa mɛni káa ya-lee-ŋa yêei, ŋa mɛni káa ŋuma-ƃela yêei, ŋa mɛni káa ńyãa kpɔ́ɔi-ƃelai yêei, ŋa mɛni káa Zɛ̃tai-ŋai yêei, ŋa mɛni káa daa kɛ́tɛi su, ŋa mɛni káa vɛ̃ɛ-kpâlaŋ su, ŋa mɛni káa yúo su, ŋa mɛni káa ŋánûai yêei nyíi-ŋai díkaa a woya-ƃelai;

²⁷ ŋa tíi kpanaŋ támaa kɛ́, ŋa mɛni-soli támaa káa, ŋa ŋɛi-kpala siɣe a kpini támaa, ŋa puru síɣe da kpele-wɛli, tãi támaa mii-sɛŋ fa kɛ́ naa, ŋa kɔ́lɛ támaa síɣe da seɣe-fala-maa.

²⁸ É kúla mɛni-ŋai ŋí pôlu mɛnii kpɔ́ gáa mâ a ŋwiɛɛ a ɣele kéleei, ǹyaa ƃa Kôrai-toli-kpɔŋ-ŋai kélee maa-lii-sɛlɛŋ.

²⁹ Gbɛ̂ɛ ƃe víi à kpɛ̀ɛ, ḿvii fa kpɛ̂ɛ ńyãa máŋ? Gbɛ̂ɛ ƃa pîli mɛni-kpɔ̂lu su, ǹyaŋ fa pîli zu a dámaai?

³⁰ Ŋà kɛ̀ ŋ̀wɛ̂lii a gɛ́ɛ ŋa yoŋka tée, ŋa dèe zãâi mɛni ma da ŋáfii-kpɛɛi lɛ̀i.

³¹ Ŋ̀âlai gáa a Kúnuu-namu í Zîsɛ Ǹâŋ, nyíi lûwa káa mà wɔlɔ-wɔlɔ da wɔlɔ-wɔlɔi, e gɔ́lɔŋ fe lɛ́ɛ kɛ̂i.

³² Tãi ŋá kɛ̀ la Dimɛikai, gɔmɛnɛ-nuui nyíi kɛ̀ Gâloŋ Kɛ́tɛi Elɛtɛ yée mui, è kɔ-kuluƃa-ŋa pù daai su a gɛ́ɛ dí ńzoŋ,

³³ kɛ́lɛ, ŋáwɛ́li- kɛ-maa ƃelai dí ńdòo kpɔ̂lɔ su dí ŋ́gula wênai la dí ǹyeŋ galai pôlu-pere ŋá pú.