Kolosə 4 - Bible

¹ Nuu-mɛi-ƃela, ka káluɛ-ŋai soŋ a ǹɛ́lɛɛ ka tua a dia a zãa. Ka gɔ́lɔŋ a gɛ́ɛ káa máŋ Kámɛi-nuu káa ma Ɣâla-taa.

² Ka kɛ́ nɔ́ Ɣâla fɛlîi a ɣele kélee. Ka kámɛi káa zu a sɛɣɛi-fei.

³ Ka Ɣâla fɛli kúmɛni ma máŋ a gɛ́ɛ Ɣâla e ŋ̀óoi ŋɔkpôŋ lá ƃo kûɛ a gɛ́ɛ ku Kôrai ŋɔloo-mɛnii lɛ, nyíi ŋ́gaa kpini-pɛrɛ mu mɛni mai,

⁴ a gɛ́ɛ ŋá ǹɛ a zu ponoɔ yɛ̂ɛ berei fɛ̂ɛ ŋá lóno lai.

⁵ Ka kámɛi káa a táre Ŋ̀âla-kpolowa-ŋai sama. Tãi nyíi gáa káyêeii, ka tíi kɛ́ la a ǹɛ́lɛɛ.

⁶ Ka lono-woo é kɛ́ a ǹɛ́lɛɛ, ǹɛ̃ɛ núu wólii yɛ̂ɛ kpolo, a gɛ́ɛ ka berei kɔlɔŋ ka pɔ̂ri núu kélee ŋɔmare-kɛɛ su kulâi lai.

Ǹaa-ti-maai-gbɛɛ ŋái

⁷ Tekekɔ a pâi ŋámɛni-ŋai kélee ƃôi kâa. Gáa a kúƃarâŋ-nuu wɛli-kɛ-maa su, e ƃo ŋɔ́nɔ a yée-mu-nuu sã́a. Gáa máŋ a kúƃarâŋ-tii-kɛ-nuu Kúnuu-namui kponôi.

⁸ Ŋa dɛɛ kápɔ naa sâpoi ŋí kpîŋ ma a gɛ́ɛ ka gɔ́lɔŋ berei kúkaa lai, a gɛ́ɛ ŋɔ́nɔ e kálii kpele.

⁹ Ŋa dítɛ̀ɛ da Onisimɔ nyíi gáa a núu sã́a, e ƃo a kúƃarâŋ-nuu wɛli-kɛ-maa sui. Gáa a kátà. Da pâi mɛni kélee ƃôi kâa nyíi kɛ̀ ƃɛi.

¹⁰ Ɛresitakɔ nyíi gáa a ḿarâŋ-pelesinɛi e fàa kâa. Mâki máŋ nyíi gáa a Banaba ǹêɣei e fàa kâa (nyíi ŋa wɔ́lɔ maa-mɛni ƃo kâai-à pà kápɔ naa, ka káyêei see mu).

¹¹ Zîsɛ nyíi da kɛ̂ ma Zɔsitɔi, e fàa kâa máŋ. Ǹûai ŋí nɔ́ ƃe díkaa a Zûu-Korai-ƃela ḿarâa-tii-kɛ ƃelai sama Ŋ̀âla-taa kâloŋ-laai mɛni ma, nyíi-ŋai da wɔ́lɔ kɛ́ a ŋá-nɛnɛ-ƃelai.

¹² Zîsɛ Kôrai yée-mu-nuui Ɛpafɔlɛ, nyíi gáa a kátài e fàa kâa. Gáa tɔ̂ɔni kámɛni ma kpɔ́ a gbanaŋɔɔ Ŋɔɣâla fɛliɛɛi su, a gɛ́ɛ ka tɔɔ kpɔ́ a gbanaŋɔɔ ka Ɣâla ŋɔnîa-mɛnii kélee kɔlɔŋ a ǹɛ́lɛɛ.

¹³ Kpɛ́ni fêi, ŋa m̀aa-sere-faa kɛ̀ a gɛ́ɛ a tíi kɛ́ kpɔ́ a gbanaŋɔɔ kámɛni ma da diai díkaa Leodisiɛ da Ɣaiyelɛpɔlɔi.

¹⁴ Kúwɛli-kɛ-maa sále-kɛ-nuui Lûu da Diima dí fàa kâa.

¹⁵ Ŋá fáa kúƃarâai dîa díkaa Leodisiɛ da Niŋfa é pɛ́lɛ Kôrai-toli-kpɔŋ ma gáa ŋɔpɛ́rɛi mui.

¹⁶ Dà gɔlɔi ŋí lòno kásama, ká ǹóno máŋ Leodisiɛ-Korai-toli-kpɔŋ su; é lɛ́ɛ kákili ŋá a gɛ́ɛ ká gɔlɔi lóno kùla Leodisiɛi.

¹⁷ Ka m̀ó Asipɔ ma, “É lɛ́ɛ íkili ŋá í díi kɛ́ nyíi Kúnuu-namui e dɛ̀ɛ ípɔi.”

¹⁸ Ńyãa Pɔ̂ɔ, ŋa vaa-maa woo-ŋai ŋí pɔ̃yɛ a ŋ́gbîŋ yée. É lɛ́ɛ kákili ŋá a gɛ́ɛ ŋ́gaa a pelesinɛ. Ƃɛlɛ-sêe é kɛ́ kâa.