Kolosə 2 - Bible

¹ Mɛni ma ŋa ŋ̀wɛ̂lii ka gɔ́lɔŋ berei ŋa kɔ̂i la kpɔ́ a gbanaŋɔɔ kámɛni mai, da diai díkaa Leodisiɛ da diai kélee dífe niî ŋ́gaa níi,

² a gɛ́ɛ dílii su e kpanaŋ yɛ̂ɛ berei díɣiriɛi la díkîe-ni dîa a wɛli-kɛ-maai, a gɛ́ɛ Ɣâla ŋɔloo-mɛnii su-tɔɔ-laai maa-tarei é kɛ́ káyêei a gbanaŋɔɔ, nyíi gáa a Kôrai, ká ŋá káa,

³ nyíi táre ŋɔtɔɔ-laai kélee da mɛni kɔlɔŋɔɔ díloɔɔ̂i gbonôi.

⁴ Ŋa nyíŋi ƃôi a gɛ́ɛ núu da fé kápɛlɛ a la-nɛ̃ɛ-maa-lono.

⁵ Berei máŋ ŋ́gbonôi fé la kákɔlɛi, ŋ́gaa kákɔlɛ ŋámɔ̂leŋ su. Ńii nɛɛ̂i a gɛ́ɛ ŋa kákaa kakɛ tíi kɛ̀ gîe ma kálaa-lai su kpanaŋɔɔ Kôrai kponôi.

Kúlaa a pâi fɛɛ̂i a fulu-laa Kôrai kponôi

⁶ Mɛni ma berei ká Kúnuu-namui Zîsɛ Kôrai sɔlɔ ƃô lai, ka kɛ́ ti gbonôi.

⁷ Ka kásame píli gbonôi ka ƃɔlɔ naa, kákponôi e kpanaŋ naa-lai su, yɛ̂ɛ berei dí nɛ̀ la kâai. Sɛɣɛi-fei támaa é kɛ́ káyêei.

⁸ Ka kámɛi káa a gɛ́ɛ núu da fe káƃòo a táre-lono-ŋa da núu pɛlɛ-woo kpɛni-kpɛni-ŋa yɛ̂ɛ berei núu-kpune tua-pere káa lai, yɛ̂ɛ bere ŋɔ́nɔ ŋ̀éniɛi su tua-perei káa lai. Dífa Kôrai ŋɔsɛŋ-lɛɛi maa-tua kɛ̀.

⁹ Kpɛ́ni fêi, Ɣâla Ŋɔɣâla-laai kélee káa gbonôi.

¹⁰ Káfulu-laai láa a fɛ́ɛ Kôrai kponôi, nyíi gáa a nuu-mɛi-ƃelai kélee díŋuŋ-tuɛ-nuu da wála-wala kéleei.

¹¹ Dí kákpɛ̀tɛ máŋ gbonôi. Ǹyaŋ dífe kákpɛtɛ ni a díyee. Kɛ́lɛ, Kôrai e kákpɛ̀tɛ a kákpîŋ-tua-pere-nyɔŋ kúlaa kâa.

¹² Dí kálòo ka dîa-ni batâi su. Ka dîa-ni ka kámu siɣe máŋ batâi su laa-la sârai Ɣâla ŋɔtíi kɛ́ɛ su, nyíi Kôrai mu siɣe saa yêei.

¹³ Ká kɛ̀ a kasaa tɔ̂ŋ karaa su. Dífe kákpɛtɛ ni. Kɛ́lɛ, Ɣâla e ká kɛ̀ a káfulu ka Kôrai-ni, e kútɔ̂ŋ karaa-ŋai kélee su-mɛni lɛɛ.

¹⁴ E kútɔ̂ŋ karaa-ŋai maa-kpa-kɔlɔi su kara da dɔ̂ŋ-ŋai fɛ̂ɛ kɛ̀ kúmɛi káai, nyíi-ŋai kɛ̀ a bɔ̃̀yɛ ŋɔkpa-kɔlɔi sui. E dɔ̂ŋ-ŋai ŋí kpera a díkpamoɔɔ zaa-wurii ma.

¹⁵ E nuu-mɛi-ƃelai da ŋwála-wala-ƃelai ŋá yèŋ e díŋumɛ kpɔŋ su. Ɣâla e díyee mɛi ɣâle zaa-wurii sârai.

¹⁶ Mɛni ma káfe ǹɛɛ naa núu da fe kámɛni ŋá tee a mii-sɛŋ ka mii, kpaa máŋ gbele-sɛŋ ka gbelei, kpaa máŋ a kúu kɛ́ɛ, kpaa máŋ ɣáloŋ nina maa-mɛni, kpaa máŋ Vii-tɔɔ-ɣelei.

¹⁷ Nyii-ŋai ŋí káa nɔ́ a ǹúui pâi ǹinîŋ; kɛ́lɛ, maa-nuui kpîŋ ƃa Kôrai.

¹⁸ Káfe ǹɛɛ naa núu da fe mɛni ŋá tee a káa a nyɔ́mɔɔ a gɛ́ɛ fɛ̂ɛ ka tɔ̂ŋ kpɛ́ kákpîŋ ma ka Ɣâla-taa-kela-ŋai fɛli. Ǹúui a zĩai maa-mɛni ƃo kásamâi, káfe laa a maa-nuui ti. Maa-nuui ŋí líi kɛ́tɛ̂i nɔ́ kpɛni. Ŋɔkili-ŋa-siai maa-sâpo fe ma. Gáa nɔ́ a núu-kpune kpîŋ-tua-pere-nyɔŋ maa-kili-ŋa-sia.

¹⁹ Va gbonoi Ŋuŋ sôŋ a gbanaŋɔɔ, nyíi a gbonoi da ŋoŋo-ŋai ŋá kɔ̀ŋ é díɣiri díkîe ma gbulɔ̂ŋ-ŋai da ǹúu sârai. Gbonoi ŋɔƃɔlɔi a kûla Ɣâla yêei.

²⁰ À kɛ̀ ka Kôrai-ni ká sàa, ǹyaŋ káŋuŋ ma a nâa ƃó ŋ̀éniɛi su tua-perei yêei, lé mɛni ƃe ŋaŋ kákaa tuâi yɛ̂ɛ kà kɛ̀ a ŋ̀éniɛi pɔ́ɔi? Le-mɛni ƃe ka kákpîŋ kɛ̀ ŋ̀éniɛi su-tɔŋ-ŋai mu,

²¹ nyíi-ŋai da mò, dîyɛɛ, “Káfe nyíŋi soŋ, Káfe nyíti kɔɔŋ, Káfe lɛɣɛ nyíti mai?”

²² Día ƃa sɛŋ nyíi kélee da tíi kɛ̀ la é kpɛ́ɛi. Nyíŋi káa yɛ̂ɛ núu-kpune ŋɔtɔ̂ŋ-ŋai da ŋɔsɛŋ-lɛɛ-ŋai.

²³ Nyii-ŋai díkaa kpɔ́ yɛ̂ɛ táre a tɔ̃yâ. Da Ɣâla fɛli-pere kpanaŋ, díkɛ tɔ̂ŋ kpɛ́ díkpîŋ ma, dí ŋ̀wana-lɔ̂ɔ kɛ́ a díkpono, kɛ́lɛ, nyíi-ŋai kélee fela-fei fe ma a gɛ́ɛ dí núu-kpune kpîŋ-tua-pere-nyɔŋ kpera.