Ɉaan 9 - Bible

Nalôŋ dí zɔlɔ ƃò a ŋɛi puɔɔ̂i Zîsɛ e m̀alo

¹ Gɛɛ tɛɛ̂i e ŋɛi-pu-nuu kàa nyii ŋ̀ɛ́i puɔɔ̂i e sìɣe sɔlɔ-ƃo-tãi ma.

² Ŋɔpôlu-ƃelai dí m̀arê kɛ̀, dîyɛɛ ma, “Kaamɔ̂ɔ, gbɛ̂ɛ ŋɔsɔnyɔ̂ŋ ƃe gɛ̀ dí nalôŋ ŋi sɔlɔ ƃó a ŋɛi puɔɔ̂i, ǹyaa kpaa ŋɔkáa-ƃela?”

³ Zîsɛ e zu tòo, ǹyɛɛi, “Ve kɛ́ ni a gɛɛ nalôŋ ŋi e sɔnyɔ̂ŋ kɛ̀ kpaa ŋɔkáa-ƃelai. Kɛ́lɛ, e kɛ̀ a gɛɛ Ɣâla ŋɔtíi é lɛ́ gbonôi.

⁴ Fɛ́ɛ ku ǹúui ŋɔtíi kɛ́ nyii ńdɛ̀ɛi tãi voloi káa niî ɣele ma. Gbínii káa pâi, tãi núu da kélee fa pɔ̂ri tíi kɛ́i.

⁵ Tãi nɔ ǹyaŋ ŋ́gaa ǹɔii sui ŋ́gaa a ǹɔii ŋɔkwaa-ponoɔi.”

⁶ E nyiŋi ƃò nɔ, é ǹá yâ pú ǹɔii ma. E pɔ́rɔ kpɛ̀tɛ a ǹá-ya. E bɔ̂rɔi ŋi siɣe e zia nalôŋ ŋ̀ɛi.

⁷ E mò ma, ǹyɛɛi, “Lí í íŋɛi waa Saloaŋ-poai su” (nyii zu-kulâi ƃa Dí Dɛ̀ɛi). Nya ƃe e lì e ŋ̀ɛi wáa e pa pôlu, gɛ nâa kwaa kaa.

⁸ Marâai da diai gàa gɛ ƃo a fɛli-kɛ-nuu a maa-nuŋ, dí mare-kɛɛ kɛ̀, dîyɛɛi, “Kɛrɛ̂e, ǹúui ƃéi ŋi a kâa kɛ̀ see ni gɛ́ fɛli kɛ̀i?”

⁹ Da-ni dí mò, dîyɛɛi, “Ǹyaa ká ŋi.” Da-ni dí mò, dîyɛɛi, “Kpao, kɛ́lɛ, móloŋɔɔ̂i mà.” E mò, ǹyɛɛi, “Ǹyaa ƃa ǹyaa.”

¹⁰ Dí mò ma, dîyɛɛi, “Gɛ̀ ní, í gɛ̀ leŋ íŋɛi lá kɛ́ fuloŋ?”

¹¹ E zu tòo, ǹyɛɛi, “Nalôŋ da kɛ̂ ma Zisɛi, e pɔ́rɔ kpɛ̀tɛ e zia ŋ́ɛi, e m̀o mâ, ǹyɛɛi, ‘Lí Saloaŋ í íŋɛi wáa’; nya ƃe ŋá lì ŋá ŋ́ɛi wáa ŋá nâa kwaa káa.”

¹² Dí m̀are kɛ̀, dîyɛɛi, “Mi-ta ƃe gáa naa:?” E zu tòo, ǹyɛɛi, “Fe gɔ́lɔŋ.”

Faresii-ŋai dí ǹalôŋ ƃálo-mɛni su kàa

¹³ Dí lì a nalôŋ kɛ̀ a ŋ̀ɛi púɔɔ̂i Faresii-ŋai pɔ.

¹⁴ E kɛ̀ Vii-tɔɔ-ɣelei ma, tãi Zîsɛ e bɔ̂rɔi kpɛ̀tɛ la e gɛ nalôŋ e kwaa kaai.

¹⁵ E kɛ̀ ti ŋɔ́nɔ Faresii-ŋai dí m̀arê kɛ̀ berei e gɛ̀ la gɛ́ kwaa kâa. E mò dîa, ǹyɛɛi, “E pɔ́rɔ sìa ŋ́ɛi, ŋá ŋ́ɛi wáa, ŋá kwaa káa.”

¹⁶ Faresii-ŋai da-ni dí mò, dîyɛɛi, “Nalôŋ ŋi fe kulâi Ɣâla yêei. Kpɛ́ni fêi, va Vii-tɔɔ-ɣelei mɛi kaa.” Ǹúui gbeli-ŋai dîyɛɛi, “A kɛ̂ leŋ ǹúui gáa a sɔnyɔ̂ŋ-nuui e ŋɛi-kɛ-maa-ŋai ŋi kɛ́?” Sia e kɛ̀ díloai.

¹⁷ Nya ƃe dí ŋɔ́nɔ ŋɛi-pu-nuui marê kɛ̀, dîyɛɛ ma, “Ya kɛ̂i le é pîlaŋ ma, yái e íŋɛi lá ƃôi?” E mò dîa, ǹyɛɛi, “Gáa a Ɣâla ŋɔlóno-kɛ-nuu.”

¹⁸ Kɛ́lɛ, Zûu-ŋai dífe kɛ̀ láa ni la a gɛɛ e kɛ̀ a ŋɛi-puɔɔ a gɛɛ ŋɔ́nɔ núu da e ŋ̀ɛi lá fùloŋ, fɛ̂ɛ dí ǹúui ŋ̀ɛi lá e kɛ̀ a vúloŋɔɔi ŋɔkáa-ƃelai tòli,

¹⁹ dí dímarê kɛ̀, dîyɛɛi, “Kalóŋ ƃéi ŋi, nyii ká mò a gɛɛ dí zɔlɔ ƃò a ŋ̀ɛi púɔɔ̂i? E gɛ̀ leŋ gɛ nâa kwaa kaa?”

²⁰ Ŋɔkáa-ƃelai dí zu tòo, dîyɛɛi, “Ku gɔ́lɔŋ a gɛɛ gáa a kúloŋ, a gɛɛ ŋɔ́nɔ ku zɔlɔ ƃô a ŋ̀ɛi púɔɔ;

²¹ kɛ́lɛ, berei a gɛ́ la gɛ́ nâa kwaa kâai, kúfe gɔ́lɔŋ, kpaa máŋ ku ǹúui kɔ́lɔŋ ŋ̀ɛi lá fuloŋ. Ka m̀arê kɛ́; gɛ́tɛ̂i gbîŋ mɛni ma, a pâi lônoi gbîŋ mɛni ma.”

²² Ŋɔkáa-ƃelai dí nyiŋi ƃò. Kpɛ́ni fêi, dí kɛ̀ yáôi Zûu-ŋai dîa. Kpɛ́ni fêi, Zûu-ŋai da nâa fáa ma a gɛɛ núu da a mò a gɛɛ Zîsɛ káa a Kôrai, da pâi gulâi Ŋ̀âla-fɛli-kerei mu.

²³ Maa-mɛni ƃe ŋɔkáa-ƃelai dí mò la, dîyɛɛi, “Gɛ́tɛ̂i gbîŋ mɛni ma, ka m̀arê kɛ́.”

²⁴ Nya ƃe ŋɔ́nɔ dí nalôŋ tòli a tãi veerɛi nyii kɛ̀ a ŋ̀ɛi puɔɔ̂i, dí mò ma, dîyɛɛi, “Naa-tɛ-maai tɛ́ɛ Ɣâla pɔ; ku gɔ́lɔŋ a gɛɛ nalôŋ ŋi káa a sɔnyɔ̂ŋ-nuu.”

²⁵ E díwoo su tòo, ǹyɛɛi, “À kɛ̀ gáa a sɔnyɔ̂ŋ-nuu fe gɔ́lɔŋ; kɛ́lɛ, nyii tɔnɔi ŋá gɔ́lɔŋ, ǹyaa ƃa ŋá kɛ̀ a ŋɛi-puɔɔ, kɛ́lɛ, ŋ́gaa nâa kwaa kâai.”

²⁶ Dí m̀arê kɛ̀, dîyɛɛ ma, “Le ƃe e gɛ̀ a yá, e íŋɛi lá ƃó-pere kɛ̀ leŋ?”

²⁷ E díwoo su tòo, ǹyɛɛi, “Ŋa gbâa m̀ó kâa, ǹyaŋ káfe káwoli tɔɔ̂i ma. Ka ŋ̀wɛ̂lii ŋɔ́nɔ ká m̀ɛni le-mɛni ma? Ka ŋ̀wɛ̂lii kákɛ a ŋɔpôlu-ƃelai da máŋ?”

²⁸ Dí díla tɔ̀ɔ ma, dîyɛɛi, “Ya kpíŋ ƃe íkaa a ŋɔpôlu-ƃelai da. Kɛ́lɛ, kúkaa a Mose ŋɔpôlu-ƃela.

²⁹ Ku gɔ́lɔŋ a gɛɛ Ɣâla a lóno Mose pɔ. Kɛ́lɛ, ǹúui ŋi ŋɔi kúfe ƃɛi kɔ́lɔŋ a kulâi naai.”

³⁰ Nalôŋ e zu tòo, ǹyɛɛi, “Gɛ̀ ní lá-kpala maa-mɛni ká ŋi! Káfe ƃɛi kɔ́lɔŋ a kulâi naai, kɛ́lɛ, ǹyaa ƃe ŋ́ɛi lá fùloŋ.

³¹ Ku gɔ́lɔŋ a gɛɛ Ɣâla fa ŋ̀wóli tɔ̀ɔ sɔnyɔ̂ŋ-nuu wóo ma. Kɛ́lɛ, ǹúui à Ɣâla fɛ̀li é ŋɔnîa-mɛnii kɛ̂i, ǹyaa ƃe Ɣâla a ŋ̀wóli tɔ̀ɔ ŋ̀óo ma.

³² É sîɣe ǹɔii kɔ́ɔ-pîlaŋ-tãi ma núu da fe tá wɔ́lɔ mɛni ni a gɛɛ núu da a núu ŋɛi lá fúloŋ nyii dí zɔlɔ ƃô a ŋɛi-puɔɔ.

³³ A kɛ̀ nalôŋ ŋi fe kula ni Ɣâla yêei, vei pɔ̂ri mɛni da kɛ̂i.”

³⁴ Dí ŋ̀óo su tòo, dîyɛɛ ma, “Dí ísɔlɔ ƃô sɔnyɔ̂ŋ kpɛɛ pôlu su. Ǹyaŋ ya pɔ̂ri sɛŋ lɛ̂i kûa?” Nya ƃe dí gùla naa.

Núu ŋɛi púɔɔ ŋɔmɔ̂leŋ su

³⁵ Zîsɛ e mɛ̀ni a gɛɛ da gula Ŋ̀âla-fɛli-kerei mu. Tãi e gàai, e mò ma, ǹyɛɛi, “Ya láa a núu-kpune Ǹóŋ?”

³⁶ E zu tòo, ǹyɛɛi, “Nalôŋ, gbɛ̂ɛ ƃa ǹyaa, a gɛɛ ŋá láa la?”

³⁷ Zîsɛ e mò ma, ǹyɛɛi, “Ya gáa, ǹyaa ƃe gáa a ǹúui lônoi nâa ípɔi.”

³⁸ E mò, ǹyɛɛi, “Ŋánuu-namui, ŋa láa la”; nya ƃe e vɛ̀li.

³⁹ Zîsɛ e mò, ǹyɛɛi, “Mɛni ŋa-tee-mɛni ƃe ŋá bá-kɛ̀ ǹɔii ŋi su, a gɛɛ diai díŋɛi puɔɔ̂i dí kwaa kâa, diai da kwaa kâai díŋɛi é pú.”

⁴⁰ Faresii da-ni kɛ̀ gɔlɛi dí ŋ̀óoi ŋi mɛni. Dí mò ma, dîyɛɛi, “Kua máŋ kúŋɛi púɔɔ̂i?”

⁴¹ Zîsɛ e mò dîa, ǹyɛɛi, “Kâi kɛ̀ a káŋɛi púɔɔ, sɔnyɔ̂ŋ fêi kɛ̀ kâa; kɛ́lɛ, nâa ka mò a gɛɛ ‘Kwa kwaa kâai,’ ǹyaŋ sɔnyɔ̂ŋ káa nɔ kâa.”