Ɉaan 4 - Bible

Zîsɛ da Sameria-nɛnii

¹ Tãi nâa Kúnuu-namui e gɔ̀lɔŋ la a gɛɛ Faresii-ŋai da mɛ́ni a gɛɛ Zîsɛ e kɛ̀ pôlu-ƃela támaa kɛ̂i, gɛ díbatâi kɛ̀ é tɛ́ɛ Zɔ̂ŋ mai

² (berei máŋ Zîsɛ ǹyaa kpîŋ fe kɛ́ ni batâi kɛ̂i, fɛ̂ɛ nɔ ŋɔpôlu-ƃelai),

³ e kùla Zuda e li Galalii ŋɔ́nɔ.

⁴ Fɛ̂ɛ ǹyaŋ e tɛɛ kɛ̀ Sameria.

⁵ Nya ƃe e pà Sameria taa kɛ́tɛi dɔnɔ su, da kɛ̂ ma Sakai, ǹɔii kpuai kɔlɛ nyii Zeeka e dɛ̀ɛ ǹóŋ Zosɛ pɔi.

⁶ Zeeka ŋɔya-loai e kɛ̀ naa. Nya ƃe Zîsɛ fii e kpɛ̀ɛ ŋɔsiai su, e see nya-loai kɔlɛ. E kɛ̀ yɛ̂ɛ folo tɛ́ɛ ŋuŋ ma.

⁷ Nɛnî tɔnɔ e kùla Sameria e pa yá kulâi. Zîsɛ e mò ma, ǹyɛɛi, “Yá tɛ́ɛ ḿbɔ ŋá gbéle.”

⁸ Kpɛ́ni fêi, ŋɔpôlu-ƃelai dí lì daai su mii-sɛŋ yâi.

⁹ Sameria-nɛnii e m̀are kɛ̀, ǹyɛɛ ma, “Le ƃe kɛ̀, ƃiai a Zûu-nuu, íkaa ḿvɛlîi yá mai, ńyãai a Sameria-nɛnii?” Kpɛ́ni fêi, Zûu-ŋai da Sameria-ƃelai dífa fâa.

¹⁰ Zîsɛ e ŋ̀óo su tòo, ǹyɛɛi, “Iî kɛ̀ a Ɣâla ŋɔsama-sɛŋ kɔlɔŋɔɔ, da ǹúui gáa môi yâi, ‘Yá tɛ́ɛ ḿbɔ ŋá gbélei,’ iî pɔ̂ri m̀are kɛ̂i, ǹyaŋ eêi pɔ̂ri fulu-laa-ya tɛɛ̂i ípɔ.”

¹¹ Nɛnîi e mò ma, ǹyɛɛi, “Nalôŋ, sɛŋ da fe íyeêi a gɛɛ í ǹyái kula la, ǹyá-loai su, ǹyaŋ ziŋɔɔ̂i. Mí ƃe vulu-laa-yai ti káa naa íyeêi?

¹² Íkɛtɛ-laai tɛɛ̂i kúnâŋ Zeeka ma, nyii nya-loai tɛ̀ɛ kúpɔi? Ǹyaa kpîŋ e da kpèle, da ǹônii, bɛlɛɛ ŋɔtaa-tulɛ-ŋai diai.”

¹³ Zîsɛ e mò ma, ǹyɛɛi, “Ǹúui nyii kélee a ǹyái ŋi da kpèlei, kpele-wɛli a pâi ŋɔ́nɔ gɛ̂i,

¹⁴ kɛ́lɛ, ǹúui nyii a ǹyái kpèle ŋa pâi dɛɛ̂i bɔi, kpele-wɛli fa ŋɔ́nɔ wɔ́lɔ gɛ̀. Ǹyái ŋa pâi dɛɛ̂i bɔi a pâi kɛ̂i gbonôi a yá-lee ŋwɔlɔ-wɔlɔ fulu-laai mɛni ma.”

¹⁵ Nɛnîi e mò ma, “Nalôŋ, ǹyái ŋi fe mî a gɛɛ kpele-wɛli fe ŋ́gɛ, kpaa máŋ ŋá pá ƃɛ yá kulâi.”

¹⁶ Zîsɛ e mò ma, ǹyɛɛi, “Lí í ípɔ̂ŋ tóli. Ka pá ƃɛ.”

¹⁷ Nɛnîi e ŋ̀óo su tòo, ǹyɛɛ ma, “Mbɔ̂ŋ fé ma.” Zîsɛ e mò ma, ǹyɛɛi, “Yá dɔ̃yâi ƃôi, yɛɛ, ‘Mbɔ̂ŋ fé ma,’

¹⁸ kpɛ́ni fêi, ya wɔ́lɔ surɔ̂ŋ lɔ́ɔlu kúla, ǹyaŋ ǹúui nyii gáa íyeêi nâai, vé a ípɔ̂ŋ. Í nyíŋi ƃò a tɔ̃yâ.”

¹⁹ Nɛnîi e mò ma, ǹyɛɛi, “Nalôŋ, ŋá gɔ́lɔŋ a gɛɛ íkaa a Ɣâla ŋɔlóno-kɛ-nuu.

²⁰ Kúnuu-pɔlɔ-ŋai dí Ɣâla fɛ̀li ǹyéei ŋi ma, kɛ́lɛ, ya mò a gɛɛ Zerusâlɛŋ ƃe gáa a ƃɛi fɛ̂ɛ núu a Ɣâla fɛli naai.”

²¹ Zîsɛ e mò ma, ǹyɛɛi, “Nɛnîi, láa a ńyãa, tãi káa pâi nyii su núu da fe pâi Nàŋ-nuui fɛlîi ǹyéei ŋi ma, kpaa máŋ Zerusâlɛŋ.

²² Ka zɛŋ fɛ̀li nyii káfe gɔ́lɔŋ, kɛ́lɛ, kwa zɛŋ fɛ̀li nyii ku gɔ́lɔŋ, kpɛ́ni fêi, ƃalo-laa a kùla Zûu-ŋai yêei.

²³ Kɛ́lɛ, tãi a pâi, gáa nâa ƃɛ, tãi Dɔ̃yâ-ɣala-fɛli-ƃelai da pâi Nàŋ-nuui fɛlîi mɔ̂leŋ su da tɔ̃yâ. Kpɛ́ni fêi, diai ti ƃe Nàŋ-nuui a díkɔ̀ri a gɛɛ dí vɛli.

²⁴ Ɣâla káa a mɔ̂leŋ. Diai da vɛ̀lii, fɛ̂ɛ dí vɛli mɔ̂leŋ su da tɔ̃yâi.”

²⁵ Nɛnîi e mò ma, ǹyɛɛi, “Ŋá gɔ́lɔŋ a gɛɛ M̀asâya a pâi (nyii da kɛ̂ ma Kôrai). À pà, a pâi mɛni kélee lɛ̂i kûa.”

²⁶ Zîsɛ e mò ma, “Ńyãai ŋ́gaa lônoi ípɔi, ńyãa ƃa ǹyaa.”

²⁷ E kɛ̀ nɔ ti, ŋɔpôlu-ƃelai dí kɛ́ pà. E kùla a dîa a gɛɛ Zîsɛ e kɛ̀ lônoi nɛnîi pɔ. Kɛ́lɛ, díta dífe m̀are kɛ́ ni, “Le ƃe ya ŋ̀wɛ̂lii?” Kpaa, “Lé ƃé ya lônoi nɛnîi pɔi?”

²⁸ Nya ƃe nɛnîi e ŋɔya-leɣii lɛ̀ɛ naa é lí daai su, e mo ǹûai dîa, ǹyɛɛi,

²⁹ “Ka pá ka nalôŋ kaa nyii a mɛnii kélee ƃó mâ nyii ŋá wɔ́lɔ gɛ̀. Nyiŋi a pɔ̂ri kɛ̂i a Kôrai?”

³⁰ Dí kùla daai su díkɛ pa bɔ.

³¹ Nàa e kɛ̀ ti ŋɔpôlu-ƃelai dí gbera fè, dîyɛɛ mà, “Kaamɔ̂ɔ, ílaa mii.”

³² Kɛ́lɛ, e mò dîa, ǹyɛɛi, “Mii-sɛŋ káa ńyêei a gɛɛ ŋa mii, nyii káfe gɔ́lɔŋ.”

³³ Nya ƃe ŋɔpôlu-ƃelai dí díkîe-ni mare kɛ̀, dîyɛɛi, “Núu da e pà bɔ a mii-sɛŋ?”

³⁴ Zîsɛ e mò dîa, ǹyɛɛi, “Ŋámii-sɛŋ ƃa a gɛɛ ŋa ǹúui ǹîa mɛni kɛ́ nyii ńdɛ̀ɛi, ŋá ŋɔtíi kɛ́ ŋá gbɛɛ.

³⁵ Káfe mo ni kâa, ‘A lɛɛ niî a ɣáloŋ náaŋ a gɛɛ mɔlɔŋ tée tãi é lɛ́ɛ serîi’? Ŋá m̀ó kâa, ká káŋuŋ mu siɣe ká gbâlaŋ-ŋai kâa, berei gélee mɔ̃ɔ̂i la dée mɛni ma.

³⁶ Ǹúui nyii a dée a zɔ̃ɔ sɔlɔ ƃo, é m̀á ŋá tɛ́ ma ŋwɔlɔ-wɔlɔ fulu-laai-mɛni ma, a gɛɛ zí-nuu da dee-nuu dí lii-nɛ̃ɛ kula gîe-ma.

³⁷ Kpɛ́ni fêi, ƃɛ ƃe ŋ̀óoi a tɔ̃yâ siɣe naa, ‘Dɔnɔ a zì, núu da kpɛni e dee.’

³⁸ Ŋá kátɛ̀ɛ a gɛɛ ká dée nyii káfe maa tíi kɛ́ ni. Núu da kpɛni-ŋa da díi kɛ́, káaŋ ka píli dítii su.”

³⁹ Sameria-nuu támaa kùla daai ti sui, dí làa la nɛnîi ŋɔsêre-wooi mɛni ma, ǹyɛɛi, “E mɛnii kélee ƃò mâ nyii ŋá wɔ́lɔ gɛ̀.”

⁴⁰ Nya ƃe tãi Sameria-ƃelai dí pà la bɔi, dí m̀are kɛ̀ a gɛɛ e lɛɛ díkɔlɛ. E gɛ̀ naa a ɣele-kuu feerɛ.

⁴¹ Ǹyaŋ ǹúui dámaa dí làa la ŋɔwóoi mɛni ma.

⁴² Dí mò nɛnîi ma, dîyɛɛi, “Íwoôi ǹyaŋ mɛni ŋɔ́nɔ fe kúlâi la, kpɛ́ni fêi, kúa kpîŋ kwa ŋ̀óo mɛ́ni, ǹyaŋ ku gɔlɔŋ a gɛɛ ǹɔii Ŋɔƃálo-nuui kpîŋ ká ŋi.”

Zîsɛ e núu kɛ́tɛi lóŋ ƃàlo

⁴³ Ŋele-kuu feerɛi pôlu ma e lì Galalii.

⁴⁴ Kpɛ́ni fêi, Zîsɛ kpîŋ e nɛ̀ a gɛɛ ƃâa fe Ɣâla ŋɔlóno-kɛ-nuu ma gbɔɔi-lɔii su.

⁴⁵ Nya ƃe tãi e pà Galalii, Galalii-ƃelai dí díyee sèe mù, kpɛ́ni fêi, dí mɛni-ŋai kàa e gɛ̀ gúui su Zerusâlɛŋ. Kpɛ́ni fêi, dia máŋ dí lì gúui su.

⁴⁶ Nya ƃe e pà ŋɔ́nɔ Kena, Galalii-lɔii su, ƃɛi e ǹyái kɛ̀ naa a ŋwã̂ai. Núu kɛ́tɛ tɔnɔ e kɛ̀ Kapɔ̂nia. Ǹóŋ e kɛ̀ kɔ́lɛ̂i.

⁴⁷ Tãi e mɛ̀ni a gɛɛ Zîsɛ a kula Zuda a pá Galalii, e lì e gbera fe a gɛɛ e yeŋ e ǹóŋ ƃalo. Kpɛ́ni fêi, e kɛ̀ nâa saâi.

⁴⁸ Ǹyaŋ Zîsɛ e mò ma, ǹyɛɛi, “Fɛ̂ɛ í ŋɛi-kɛ-maa-ŋa kaa da mɛni maa pɔ́lɔ-ŋa, ífe pâi lâai la.”

⁴⁹ Núu kɛ́tɛi e mò ma, ǹyɛɛi, “Nalôŋ, ku yéŋ, ńoŋ fe lâa saa la.”

⁵⁰ Zîsɛ e mò ma, ǹyɛɛi, “Lí, íloŋ a pâi kɛ̂i a vulu.” Nalôŋ e làa a ŋ̀óoi Zîsɛ e mò mai, e lì bɔ naa.

⁵¹ Tãi e kɛ̀ liî lai, da ǹyée-mu-ƃelai dí kòyaŋ. Dí mò ma a gɛɛ ǹóŋ káa ɣele ma.

⁵² Nya ƃe è dímarê kɛ̀ tãi mâ è ƃalo lai. Dí mò ma, dîyɛɛi, “Wɛ́ɛ, volo-peneɛɛ̂i ḿâ, gɔlɔ-fãa-mai è tèe mà.”

⁵³ Ǹâŋ e gɔ̀lɔŋ a gɛɛ tãi tí nɔ́ ƃé Zîsɛ è mò ma, ǹyɛɛi, “Íloŋ a pâi kɛ̂i a vúlu.” Ǹyaŋ ǹyaa kpîŋ è làa la da ŋɔpɛ́rɛ-mu-ƃelai kélee.

⁵⁴ Ŋɛi-kɛ-maa lɛ̂ɛi veerɛi ká ŋi Zîsɛ e gɛ̀ tãi e kùla Zuda é lí Galalii.