Izikiɛ 7 - Bible

Mɛni-ŋa teɛɛ a pâi Eezuɛ-ŋai mɛ̂ni ma

¹ Naa pôlu ma, Yâwɛɛ è ŋɔ́nɔ lono ḿbɔ́ ǹyɛɛi,

² “Nuu-kpune ǹóŋ, mò Eezuɛ-ŋai dîa yɛ̂ɛi, Ŋ̀wála-wâla kélee Ɣâlai ǹyɛɛi, mɛnii kélee kpɛɛ-ŋa aâ seri! Mɛni-kpɛɛ ŋa aâ pá ǹɔii m̀elá náaŋ mɛ̂ni ma.

³ “M̀ɛnii gbɛɛ-ŋai aâ pá ká mɛ̂ni ma. Ǹyaŋ ŋa pâi ǹíi ŋwanai kâa. Ŋa pâi ká mɛni-ŋai ŋá teei yɛ̂ɛ berei kátua-pere káa lai. Ŋa pâi kákula maa kɛ̂i ká tua pere nyɔ̂ŋ ŋanaai mɛ̂ni ma.

⁴ Ḿve pâi ká sɔnyɔ̂ŋ-ŋai su mɛni lɛɛ̂i, kpaa máŋ ŋá ká ŋ̀ɛ́i maloŋ káa. Ŋá pâi ká kula maa kɛ̂i ká mɛni nyɔmɔɔi maa mɛ̂ni ma. À kɛ̀ tí, ka pâi gɔlɔni a gɛɛ ńyãa ƃa Yâwɛɛ.”

⁵ Ŋ̀wála-wâla kélee Ɣalai è mò ǹyɛɛi, “Mɛni-kpɔ̂lu a pâi lâai kâa gîe mɛi.

⁶ Mɛni-kpɛɛ ŋá a pá! Mɛni-kpɛɛ ŋá a pá kâa. Ká m̀ɛnii gbɛɛ-ŋai a pá. Ká wɔi a nâa kpɛɛ.

⁷ Káai ká káa ǹɔii sui, ká m̀ɛnii gbɛɛ-ŋai a pá. Voloi a nâa lɛɣɛ. Vé a lii-nɛɛ kula fólo. Kɛ́lɛ gáa a mɛni kpɔ̂lu kula fólo nyii a ká kɛ̀ kákɛ ƃò tɔɔi ni ǹyéei ma ká fa pɔ̂ri lâɣii a lii-nɛ̃ɛ perei.

⁸ “Ŋa pâi ǹíi ŋwanai kâa a ŋanaa. Ŋá ká mɛnii-ŋa têe yɛ̂ɛ berei ká tûa-pere káa lai. Ǹyaŋ ŋa pâi ká kula-maa kɛ̂i kátua pere nyɔ̂ŋ ŋanaai mɛ̂ni m̀a.

⁹ Ḿve pâi kásɔnyɔ̂ŋ-ŋai su mɛ̂ni lɛɛ̂i, kpaa máŋ ŋá káŋɛi maloŋ káa. Ŋa pâi ká kula maa kɛ̂i yɛ̂ɛ berei ka sɔnyɔ̂ŋ kɛ̀ lai a gɛɛ ká gɔ́lɔŋ a gɛɛ ńyãa ƃa Yâwɛɛ nyii gáa ká kula maa kɛ̂i.”

¹⁰ Mɛni-kpɔ̂lu maa fólo káa pâi. A nâa seri ƃɛ. Ŋwana-lɔɔ mɛni a nâa kɛ́ ƃûu ƃoi. Su mɛni kɛtɛ a nâa seri gɔ̃yɛŋ ma.

¹¹ Woo-pili mɛni a nâa pá a ŋwana-lɔɔ mɛni támaa. Díta kpîŋ fé pâi lɛɛ̂i. Dítɔɔ-sãai dɔnɔ kpîŋ fé pâi lɛɛ̂i. Dílàa ma tɛi dɔnɔ kpîŋ fé pâi lɛɛ̂i kpaa máŋ dífolo lâai.

¹² Tãi a pâi. A nâa seri. Diai sãâ yâi, dífe lii-nɛ̃ɛ kùla, kpaa máŋ diai sãâ kɔlɛ̂i dífe malôŋ see ƃò. Kpɛ́ni fêi lii-ŋwâna káa pâi ǹûai kélee dîa.

¹³ Diai lɔii kɔlɛi dífe ŋɔ́nɔ pâi zɔlɔ ƃoi pôlu ŋɔ́nɔ a tãi díkaa la ɣele mai. Kpɛ́ni fêi Ɣâla a pâi ǹíi ŋwanai dîa nyii vé pâi ŋɔ́nɔ zîe pôlu. Diai kélee díkaa a sɔnyɔ̂ŋ ƃelai díta fé pâi lɛɛ̂i ɣele ma.

¹⁴ Tãi da pâi gɔ-kɔ́ turui fɛɛi lai, ǹûai da pâi díkpîŋ kpɛtɛi kɔ́kɔ mɛ̂ni ma, kɛ́lɛ núu da fé pâi liî gɔ̀-ɣinei ŋa kpɛ́ni fêi Ɣâla a pâi ǹíi ŋwanai dîa.

Eezuɛ-ŋai dísɔnyɔ̂ŋ-ŋai gula maa

¹⁵ Ǹûai da pâi kɛ̂i kɔ́kɔi ǹɔii su. Puru da kɔlɔ-fela da pâi kɛ̂i ǹûai dîa daai su. Diai pâi kɛ̂i ǹɔii sui, da pâi lɛɛi gɔi su. Diai díkaa daai sui, puru da kɔlɔ-fela da pâi dí pâai.

¹⁶ À kɛ̀ tí, diai pâi pui dí liî, da pâi kɛ̂i ǹyée-ŋai mâ díkɛ wɔ́lɔ dísɔnyɔ̂ŋ-ŋai mɛ̂ni ma yɛ̂ɛ toloŋ-ŋa ƃe fâai ǹyée-ŋai tôŋ su.

¹⁷ Ǹûai kélee yée a pâi kɛ̂i saai, díkpeleŋ fii-kpɛɛ yɛ̂ yá.

¹⁸ Da pâi maloŋ-tôo maa seɣe tôoi dîa. Dí dímaa ɣiri a mɛni-kpɔlu seɣe. Ŋumɛ a pâi dísonîi. Kpólaŋ è tòo díŋûa a tɛɛ ŋa.

¹⁹ Da pâi díkane-ŋai pilii berei-leei ma yɛ̂ɛ kala. Dígôo-ŋai da pâi kɛ̂i yɛ̂ɛ sɛŋ maa-liƃiɛɛ. Díkane-ŋai da dígôo-ŋai dífe pâi pɔri dímaa teei a tãi Yâwɛɛ a pâi ǹíi ŋwanai lai. Dífe pâi dilíi laai kpaa máŋ dímaa mɛni é dílii laa. Gôoi da ganei ƃe díperei kpaaŋ díkɛ tòo sɔnyɔ̂ŋ su.

²⁰ Dígôo-ŋai da díkane yɔlɛ-ŋai dí gɛ̀ dísumɛ̂ni é kɛ́tɛ díkɛ díɣâla pɔɔkɔŋ ŋai kpɛtɛ la da pɔɔkɔŋ nyɔmɔɔ-ŋai. M̀aa mɛ̂ni ƃe ŋa pâi zãai ŋí kɛ̂i m̀ɛlɛ é kpɛɛ díkoi.

²¹ “Ŋa pâi gɛi ŋɔyã ŋa dí gula ká yêei. Ǹɔii-ŋuŋ ŋwana-lɔɔ-ŋai da pâi ƃâa kulâi kâa.

²² Ŋa pâi ǹɛɛ̂i naa dí ŋa Ŋ̀âla-pɛrɛ Kɛ́tɛi maa-tĩ̂a kara. Ŋúma-ƃela da pâi lɔ̂i naa dínaa maa tĩa kara.

²³ “Ǹɔii gwaa kélee mâ a paî kɛ̂i wúlee. Kpɛ́ni fêi, ǹɔii láa a fɛ́ɛ a núu pâa. Ǹyaŋ daa-leei-ŋai láa a fɛ́ɛ a làa-sâa.

²⁴ Ŋa pâi ǹɛɛ̂i naa lɔii-ŋuŋ ŋwana-lɔɔ ŋa dí pá díka pɛrɛ-ŋai kula káyeêi. Ŋa pâi díwala-wala laai kpelâi, ŋa díkwaa mâ waa ŋai maa tĩa kara.

²⁵ Tãi mɛni-kpɔ̂lu a pâi pâi lai, da pâi kɛ̂i lii-see kɔ̂rii. Kɛ́lɛ da pâi gɔrîi dífe gàa.

²⁶ Mɛni-kpɔ̂lu a pâi kulâi dîa gîe mɛi, tùŋ nyɔmɔɔ támaa é pá dípɔ. Da pâi ŋâla-woo ƃô ƃelai marê kɛ̂i a gɛɛ díɣâla-woo ƃô dîa, kɛ́lɛ ŋ̀âla-wooi a pâi lani díla. Zâla láa-soŋ-ƃelai dífe pâi pɔrii sɛŋ lɛ̂i ǹûai dîa. Ǹúu-pɔlɔ-ŋai dífe pâi kɛ̂i naa a gɛɛ dínûai lia-woo ƃó.

²⁷ Malôŋ a pâi toôi galôŋ mâ. Lii-too pôlu a paî kɛ̂i galôŋ ŋɔtíi-kɛ-ƃelai dîa. Ǹûai da pâi yaôi ǹɔii su díyee kɛ́ kpɛ̃liŋ. Ŋa pâi díkula maa kɛ̂i yɛ̂ɛ berei dítua-pere káa lai. Ŋa pâi dímɛnii-ŋá teêi yɛ̂ɛ berei da díƃaraai dímɛnii ŋa tèe lai. Nyiŋi a pâi ǹɛi kâa a gɛɛ ńyãa ƃa Yâwɛɛ.”