Izikiɛ 6 - Bible

Ŋ̀âla-wooi bîlaŋɔɔi ǹyée-ŋai díkaa Eezuɛi dîai

¹ Nya ƃe Yâwɛɛ è ŋɔ́nɔ lòno ḿbɔ, ǹyɛɛi,

² “Núu-kpune ǹóŋ, íŋɛi tínaŋ Eezuɛ yèe-ŋai pɔ́ naa í ɣâla-woo ƃó é pîlaŋ dîa.

³ M̀ó dîa yɛ̂ɛi, Eezuɛ yee-ŋai, ka káwoli tɔ́ɔ Yâwɛɛ Ɣâla wóo ma nyii a môi é pîlaŋ kâai. È mò ǹyɛɛ, ǹyée kpaya-kpayai, ǹyée-ŋai da diŋ-tiŋ-ŋai dîa ǹyɛɛ ŋa pâi pâi a ƃóa-sɔkpɔ-ŋa a gɛɛ ŋá káɣâla-pɔɔkɔŋ-ŋai fɛli kwaa-ŋai kélee su kara.

⁴ Ŋa pâi gɛ̂i káɣâla-teƃele-ŋai kélee dílɛɛ a díkpolôŋ. Kákereŋ-sɛŋ kuŋ-nɛ̃ɛ kéreŋ ɣala-teƃele-ŋai díwolo. Ǹyaŋ ŋa pâi diai da káfɛlii dí paâi káɣâla-pɔɔkɔŋ-ŋai ŋɛ́i túɛ.

⁵ Ŋa pâi Eezuɛ-ŋai poma táa tâai díɣâla-pɔkɔɔŋ-ŋai ŋɛ́i túɛ. À kɛ̀ tí, ŋa pâi kákao-ŋai táa tâai ŋá dínaŋ káɣâla-teƃele-ŋai dîa.

⁶ Ƃɛ́i kélee kpɔ́ ká káa naai, ŋa pâi kátaa-lee-ŋai kɛ̂i dílɛɛ a díkpolôŋ da káɣâla-fɛli kwaa-ŋai ma. Ǹyaŋ ŋa pâi ŋ̀âla-pɔɔkɔŋ-ŋai wólo-woloi, ŋa kákereŋ-sɛŋ-kuŋ nɛ̃ɛ kéreŋ ɣâla-teƃelei su kara kpɔ́ ŋá doo ǹɔii ma. Díi-ŋai kpɔ́ ká gɛ̂i ŋa pâi gɔɔ̂i kpɔ́ fati-fati.

⁷ Ŋa pâi ká ǹûai kɛ̂i dísaa kásama. Gɛ ni ka pâi gɔlɔni a gɛɛ ńyãa ƃa Yâwɛɛ.

⁸ “À kɛ̀ tí, ŋa pâi kákpulu-loŋ lɛɛ̂i ɣele ma. Tãi ka pâi kɛ̂i la ǹɔii-ŋuŋ ŋai tí samai, ká ta-ni da pâi pui mòa-sɔkpɔi yêei a tãi ka pâi liî la lɔii-ŋuŋ da kpɛ́ni ŋa sui.

⁹ Ǹyaŋ diai da pâi liî a dîa kɔ́-soŋ pere sui da pâi díkili-ŋa siai é pîlaŋ mâ ǹɔii-ti su ƃɛɛ̂i da pâi kɛ̂i naai. Da pâi gɔlɔni berei ŋá ǹíi ŋwana la dîa é pîlaŋ berei mâ dí dípôlu-tɔɔ la mai a dílii da díŋɛi nyii gɛ̀ ɣâla-pɔkɔɔŋ fɛli mɛ̂ni kɛ́ too díkoi. À kɛ̀ tí, díƃɛlɛ a pâi kpɛɛ̂i díkpîŋ koi ŋwana-lɔ̂ɔ dí gɛi mɛ̂ni ma.

¹⁰ À kɛ̀ tí, da pâi gɔlɔni a gɛɛ ńyãa ƃa Yâwɛɛ. Ǹyaŋ ḿve kɛ́ ni dípɛlɛ̂i a gɛɛ ŋa pâi mɛni nyɔmɔ kɛ̂i a dîa.”

¹¹ Yâwɛɛ Ɣâla è mò ǹyɛɛi, “Ka káyee-ŋa lokwa, ka kákɔɔ pîlaŋ ǹɔii ma ká mò kaai áao Eezuɛ-ŋai dímɛni nyɔmɔ-ŋai mɛ̂ni ma. Kpɛ́ni fêi da pâi lɛɛ̂i mòa-sɔkpɔi mu, puru é dípaa, kɔlɔ-fela é dísoŋ.

¹² Ǹúui nyii gáa kwaa koyaa mai, kɔlɔ-fela nyɔmɔ a pâi baai. Ǹyaŋ ǹúui nyii gáa kwaa kpûa mai, a pâi lɛɛ̂i mòa-sɔkpɔi mu. Naa pôlu ma, ǹúui nyii pâi lɛɛ̂i ɣele mai, a pâi sâai a puru. Bere ƃé ŋa pâi ŋálii-ŋwanai lɛi la día.

¹³ À kɛ̀ tí, ka pâi gɔlɔni a gɛɛ ńyãa ƃa Yâwɛɛ. Tãi ka pâi ká ǹûai poma kaai lâai ni la káɣâla-pɔɔkɔŋ-ŋai samai, dílaa ǹyee kpaya-kpaya ŋai tôŋ-sui, daa-tâa ŋ̀úru-ŋai mu gwaa kéleei, ƃɛɛi da kɛ́ kereŋ-sɛŋ kúŋ nɛ̃ɛ kereni naa díɣâla-pɔkɔɔŋ-ŋai diai.

¹⁴ M̀aa tãi tí ma, ŋa pâi ǹyée pɛlɛi dîa ŋá dílɔii lɛ́ɛ a bûŋ kɛ̂i fa ŋɔ́nɔ kɛ́ m̀a. Mɛnii ŋí a pâi kɛ̂i dílɔii gwaa kélee mâ é siɣe vɛ̃ɛ-kpâlaŋ su é tôo Lebala. À kɛ̀ tí, da pâi ŋgɔlɔni a Yâwɛɛ kpîŋ-kpîŋ.”