Izikiɛ 5 - Bible

Ŋ̀ɛ́i kɛ́ maai nyii gáa Zerusâlɛŋ wólo mɛ̂ni mai

¹ Yâwɛɛ è mò ḿâ ǹyɛɛi, “Núu-kpune ǹóŋ, ye ƃóa-sɔ̂kpɔ ŋá-liɛɛ kɛ́ɛ yɛ̂ɛ ŋuŋ ƃô-kɔli siɣe, í íŋuŋ ƃó la í ŋɔ́nɔ íla-leɣa pú la. À kɛ̀ tí, í sɛŋ kɔ̂ɔŋ-kɔli siɣe í íŋuŋ-leɣa da íla-leɣa ŋáa kɔ́lɛ gîei saaƃa.

² Gbua tɔ̂nɔ siɣe í géreŋ Zerusâlɛŋ taa-lee pɔɔkɔŋ sâmai a tãi dí Zerusâlɛŋ soŋ lai maa fôlo kuui kpɛɛ-ŋa tãi. À kɛ̀ tí, í gbulu tɔ̂nɔ siɣe í dáa tâa a m̀óa-sɔ̂kpɔi ítinaŋ la daa lêei ma. Gbua kpéli síɣe í dáa tâa vãai é vɛ́ɛ. Ŋa pâi ŋá ƃóai kulâi daâi ŋ́gɛ ƃò la dípôlu.

³ Naa pôlu ma, íŋuŋ-leɣa gbului da-loŋ siɣe í gbulɔ̂ŋ í yɛkɛi wóŋ lá.

⁴ À kɛ̀ tí, í ŋɔ́nɔ da-loŋ siɣe í bú ŋ̀ɔŋ ŋá í díkereŋ. Gɛ̀ ní ŋɔŋ a pâi toôi Eezuɛ-ŋai sáma.”

⁵ Yâwɛɛ Ɣâla è mò ǹyɛɛi, “Zerusâlɛŋ ká ŋí nyii ŋá zèe ǹɔii-ŋûŋ-ŋai sáma dítinaŋɔɔ m̀ai.

⁶ A mɛni nyɔ́mɔ támaa kɛ́ kpɛ́ni fêi a tɔɔ mâ, a ŋátɔ̂ŋ-ŋai kara a ŋánaa a tɛɛ ǹɔii-ŋûŋ-ŋai ŋí dîa. A tɔɔ ŋátɔ̂ŋ-ŋai dîa a tɛɛ ǹɔii-ŋai ŋí dîa nyii-ŋai dítinaŋɔ̂ɔi mai. Kpɛ́ni fêi a ǹyée kúla ŋátɔ̂ŋ-ŋai mu va sîa a ŋátɔ̂ŋ lá-woo.

⁷ M̀ɛni ma, Ǹuu-namui Ɣâla è mò ǹyɛɛ íkaa a sɔnyɔ̂ŋ nuu é tɛɛ ǹɔii-ŋûŋ-ŋai dítinaŋɔ̂ɔi yâi dîa. Ǹyaŋ yaâ ípôlu tɔɔ dɔ̂ŋ mâ ŋá ǹɛ yâi. Ífe ŋátɔ̂ŋ-ŋai mɛi kâai, kɛ́lɛ ya tûa a ǹɔii-ŋûŋ-ŋai dítinaŋɔ̂ɔi yâi dítɔ̂ŋ-ŋai.

⁸ M̀ɛni ma Ǹuu-namui Ɣâla è mò ǹyɛɛ, ‘Ńyãa kpîŋ-kpîŋ ŋa pâi íkula maa kɛ̂i. Ŋa pâi íkula maa kɛ̂i a tɔ̃yâ-laa ǹɔii-ŋûŋ-ŋai ŋí ŋɛ́i túɛ.

⁹ Ǹyaŋ m̀ɛnii ŋa pâi gɛ̂i a yá í sɔnyɔ̂ŋ-ŋai mɛ̂ni mai, a pâi kɛ̂i a m̀ɛnii nyii ḿve ta da kɛ́ ní. Ǹyaŋ ḿve tela pâi ŋɔ̂nɔ da kɛ̂i a núu da wɔ́lɔ-wɔlɔ da wɔlɔ-wɔlɔ.

¹⁰ Ǹaŋ-ƃelai da pâi dílônii miî. Lônii díkɛ dínâŋ-ni mìi. Ŋa pâi ká kula maa tí-tí kɛ̂i. Ǹyaŋ diai pâi lɛɛ̂i ɣele mai, ŋa pâi dítaa-taai ǹɔii su gwaa kélee.

¹¹ “M̀ɛni ma, Ŋ̀wála-wâla kélee Ɣalai è mò ǹyɛɛi, ‘Tɔ̃yâ ma, tãi nɔ́ ka ŋápɛrɛ-maa waai maa tĩa kara la a ɣâla-pɔɔkɔŋ-ŋa da sâla nyɔ́mɔɔ-ŋa kulaai, ŋa pâi ǹyée kulâi ká mu. Ḿve pâi ká malôŋ kâai a dɔnɔ kpîŋ.

¹² Kákpulu sêei saaƃai dɔnɔ a pâi saâi a puru, kpaa máŋ a kɔlɔ-fela nyɔ́mɔ. Kákpɔara-ƃela da pâi ká paâi a ƃóa-sɔ̂kpɔ. Ǹyaŋ ŋa pâi kákpulu dɔnɔ táa tâai a fãa, ŋá dí kpɛ́ a ƃóa-sɔpɔ kuláa daâi.’

¹³ “Gɛ̀ ní, ŋálii ŋwânai ŋáa a pâi yenîi. Ŋá ńii ŋwàna dîa a gɛɛ ńii é láa. Ǹyaŋ tãi ŋa pâi ńii ŋwânai la dîai, da pâi gɔ́lɔnîi a gɛɛ Ńyãa ƃa Yâwɛɛ nyii lòno dípɔ a wála-wala laai.

¹⁴ Ŋa pâi ká kélee ká su karâi. Ŋá pâi ká kɛ̂i a ɣɛ́lɛ-maa-sɛŋ ǹɔii-ŋûŋ-ŋai dítinaŋɔ̂ɔi kâai sáma. Ŋá pâi m̀ɛnii ŋí kɛ̂i ǹûai kélee ŋɛ́i túɛ da diai kélee da kɛ́ tɛɛ̂i.

¹⁵ “Tãi ŋa pâi ká mɛnii ŋá teêi la a lii ŋwânai, ka pâi kɛ̂i a ɣɛ́lɛ-maa sɛŋ ǹɔii kélee sáma. Ǹyaŋ ká kula-maa kɛ́ɛi a pâi kɛ̂i a mɛni kɔɔŋ maa ǹɔii-ŋûŋ-ŋai mɛ̂ni ma. Ŋa pâi m̀ɛnii ŋí kɛ̂i ǹûai kélee ŋɛ́i túɛ nyii-ŋai dítinaŋɔɔi kâai. Ńyãa ƃa Yâwɛɛ nyii mò tí.

¹⁶ Ŋa pâi ká ƃóŋ nîi a puru yɛ̂ɛ núu a sɛŋ da ƃòŋ a tɔ̃a-ŋa. Ǹyaŋ ŋa pâi gɛ̂i puru kɛ́tɛ é tóo kâa káfa mii-sɛŋ da kàa ká mii.

¹⁷ É tée burui ŋa pâi gɛ̂i é ká paai ma, ŋa pâi lɔɔ-fɛnɛ-sãa tɛɛ̂i a gɛɛ díka nîa-pɛlɛɛ-ŋai su kara. Kɔ́ da kɔlɔ-fela da pâi ká lɔii pênei dí bɛlɛ. À kɛ̀ tí, Ńyãa kpîŋ ŋa pâi ká su karâi a ƃóa-sɔ̂kpɔ. Ńyãa Yâwɛɛ ńyãa ƃé mò tí.”