Izikiɛ 48 - Bible

Berei dí ǹɔii ŋáa kɔ̀lɛ la Eezuɛ nuu-suu-ŋai sámai

^1-7 Ŋ̀wála-wâla kélee Yâwɛɛ è mò ǹyɛɛ, “Yá-ŋua-pere gɔyɛŋ-perei è sìɣe Mɛditɛrenia Yuoi mâ, é pîlaŋ Etulɔŋ taa-leei mâ, é tóo Ama perei ma, é síɣe naa é tóo Inɔŋ taa-leei mâ, é tóo Dɛmɛika da Ama lɔii kpiniŋ loai. È sìɣe vóloi kulâi pere é tóo vóloi liî pere. Berei ŋí ƃé dí ǹɔii ŋáa kɔ̀lɛ la Eezuɛ nuu-suui-ŋai loai: Daŋ ƃé kɛ̀ a ǹúui maa ŋuŋ, Asɛ kɛ́ ƃò gɔlɛ ma, Nɛfɛtɛli kɛ́ ƃò ǹaa kɔlɛ, Manasɛ kɛ́ ƃò ǹaa kɔlɛ, Ifiraŋ kɛ́ ƃò Manasɛ kɔlɛ, Lubiŋ kɛ́ ƃò Ifiraŋ kɔlɛ, Zuda kɛ́ ƃò Lubiŋ kɔlɛ.

Ǹɔii sâmai lɔii

⁸ “Ka Zuda ŋɔlɔii kwára-pere lɛɛ mɛni-ŋuŋ da kɛ́ mɛ̂ni ma. Ŋɔŋa kɛ̂tɛ é kɛ́ a mâai puu. Ŋɔkôya kɛ́ ƃò nɔ́ yɛ̂ɛ ǹɔii ŋuŋ-ŋai dí dɛ̀ɛ Eezuɛ-ŋai pɔ́i da ŋɔkôya. Ka Ŋ̀âla-pɛrɛi tɔ́ɔ ǹaa sâmai.

⁹ “Ka gwaai ŋí sâmai tɛɛ ḿbɔ. Ǹaa ŋɔŋa kɛ̂tɛ é kɛ́ a mâai lɔ́ɔlu mɛi saaƃa, ŋɔkôya kɛ́ ƃò a mâai puu.

¹⁰ Gwaai ŋí ma a pâi kɛ̂i a gwaa maa waai nyii ŋa pâi dɛɛ̂i zâla láa-soŋ-ƃelai pɔ, nyii ŋɔkɔ̀ɔŋ ma a pâi kɛ̂i a mâai puu é síɣe vóloi kulâi pere é tóo vóloi liî pere. É síɣe yá-ŋua pere é tóo seɣai pere kɛ́ ƃò a mâai náaŋ. Ǹyaŋ, Ŋápɛrei a pâi kɛ̂i ǹaa sâmai.

¹¹ Gwaai ŋí ma a pâi kɛ̂i zâla láa-soŋ-ƃelai nyii-ŋai díkaa a Zadɔ ǹônii pɔ́ɔ nyii-ŋai tíi kɛ̀ ḿî a téniŋ ƃô pere a tãi Eezuɛ-ŋai da Liiva-ŋai kpéli-ŋai dí dípôlu tɔ̀ɔ la ḿâi.

¹² M̀ɛni ma gáa a sɛŋ dí kwaa mâ sɔlɔ ƃó nyii gáa Liiva-ŋai kɔlɛ ma nyii gáa gwaa mâ waai mai.

¹³ Liiva-ŋai diaŋ máŋ da pâi kwaa ma sɔlɔ ƃôi zâla láa-soŋ-ƃelai kɔlɛ ma nyii ŋɔkôya a pâi kɛ̂i a mâai puu, é síɣe vóloi kulâi pere é tóo vóloi liî pere, ŋɔŋa kɛ̂tɛ kɛ́ ƃò a mâai náaŋ, é síɣe yá-ŋua pere é tóo seɣai pere.

¹⁴ Dífe gwaai ŋí ma dɔnɔ kpîŋ kɔ̀lɛ, kpaa máŋ dí ǹaa maa fáleŋ. Dífe díyee kùla gwaai ŋí ma mu, kpɛ́ni fêi ǹaa maa waâi ḿaa mɛ̂ni ma.

¹⁵ “Gwaai ŋí ma m̀ɛ́i pâi lɛɛ̂i nyii ŋɔkôya káa a mâai puu, ŋɔŋa kɛ̂tɛ kɛ́ ƃò a mâai feerɛi fé pâi kɛ̂i a kwaa mâ maa waa. A pâi kɛ̂i a tíi kɛ́ kwaa ma daai mɛ̂ni ma da nûa kɛ̂i, gbéli é lɛ́ɛ a vólo. Daa-leei a pâi kɛ̂i gwaai ŋí ma sâmai.

¹⁶ Daai ŋí m̀éla kélee ma ŋɔkɔ̀ɔŋ ma a pâi kɛ̂i a kɔ́ɔ ƃɔ́rɔnii 7,500 m̀éla kélee ma.

¹⁷ Daai ŋí kɔlɛ ma kélee a pâi kɛ̂i a vólo, nyii ŋɔkɔ̀ɔŋ ma a pâi kɛ̂i a kɔ́ɔ ƃɔ́rɔnii 416.

¹⁸ Ǹɔii nyii pâi lɛɛ̂i gwaa mâ waai kɔlɛi a pâi kɛ̂i a kpâlaŋ ŋá-tii kɛ̂i daa-ƃelai mɛ̂ni ma. Gwaai ŋí ma m̀éla veerɛ nyii gáa vóloi kulâi pere da vóloi liî perei, dɔnɔ ŋɔkôya a pâi kɛ̂i a mâai náaŋ, ŋɔŋa kɛ̂tɛ kɛ́ ƃò a mâai feerɛ.

¹⁹ Gwaai ŋí ma a pâi kɛ̂i a diai díkaa daai sui dítii kɛ́ kwaa ma. Vé pâi kɛ̂i a sîi tɔnɔ pɔ́ɔ.

²⁰ “Ǹyaŋ ƃɛ́i pâi lɛɛ̂i gwaai ŋí mɛ̂ni mai a pâi kɛ̂ a m̀éla kélee pɔriɛɛ. Ŋɔ kɔ̀ɔŋ maa a pâi kɛ̂i a mâai puu m̀éla kélee ma. Daa-leei a pâi kɛ̂i gwaai ŋí ma.

^21-22 “Ƃɛ́i pâi lɛɛ̂i gwaa mâ waai ŋí kɔlɛ ma é síɣe vóloi kulâi é tóo vóloi liî perei a pâi kɛ̂i a gâloŋ, zâla láa-soŋ-ƃelai, da Liiva-ŋai, pɔ́ɔ. Gwaai ŋí ma ƃé da pâi Ŋ̀âla-pɛrɛ Kɛ́tɛi tɔɔ̂i naa, da daa-lee kɛ́tɛi. Ǹɔii ŋí è sìɣe vóloi kulâi pere é tóo vóloi liî pere gɔyɛŋ perei ma. È lì vóloi liî pere é séri Mɛditɛrenia Yuoi ma. Gɔyɛŋ perei nyii gáa ǹɔii ŋí mà yá-ŋua-perei è làa a ǹɔii kpîniŋ nyii gáa a Zuda ŋɔsuui pɔɔi. Ŋɔsíɣai-pere gɔyɛŋ perei è làa a Bɛŋsima ŋɔsuui ŋɔlɔii kpîniŋ.

Ǹúu-suui gbéli-ŋai dílɔii

^23-27 “Gwaai nyii pâi lɛɛ̂i gwaa mâ waai kɔlɛ síɣai perei, a pâi kɛ̂i a ǹúu-suui gbéli-ŋai pɔ́ɔ. Ǹúu-suui ŋí dɔnɔ a pâi lɔii sɔlɔ ƃôi é síɣe vóloi kulâi pere kɔyɛŋ perei ma é pîlaŋ Mɛditɛrenia Yuoi ma é lí síɣai pere a bere-sîi ŋí: Bɛŋsima è kɛ̀ a ǹúui maa-ŋuŋ, Simiɔŋ kɛ́ ƃò gɔ̀lɛ ma, Isaka kɛ́ ƃò naa kɔlɛ, Zɛbulɔŋ kɛ́ ƃò Isaka kɔlɛ, Gâa kɛ́ ƃò Zɛbulɔŋ kɔlɛ.

²⁸ “Síɣai pere lɔii kpiniŋ a pâi kɛ̂i a Gâa pɔ́ɔ. Ŋɔgɔyɛŋ perei a pâi siɣêi síɣai pere é tɛ́ɛ é lí Tama taa-leei ma pere é seri ǹyá gɛlɛŋ-gɛlɛi ma Kedɛ é lí yá-ŋua pere é sía a Ize kóo é pîlaŋ Mɛditɛrenia Yuoi mâ.

²⁹ “Bere ƃé gáa a sɛŋ ká ǹɔii ŋáa kɔ́lɛ la a gbua-ŋa Eezuɛ-ŋai dîa a dí pɔ́ɔ. Ńyãai a Ŋ̀wála-wâla kélee Yâwɛɛ ƃé mò tí.”

Zerusâlɛŋ siɣaŋ-ŋai láƃerei

³⁰ “Bere ƃé ká ziɣãŋ láƃerei kula la Zerusâlɛŋ. Yá-ŋua pere ƃelai nyii ŋɔkôya káa a kɔ́ɔ ƃɔ́rɔnii wála lɔ́ɔlu mei feerɛ pôlu ŋuŋ lɔ́ɔlu (7,500),

³¹ siɣãŋ láƃerei saaƃa ƃé pâi kɛ̂i naa. Ziɣãŋ láƃerei-ŋai ŋí láa a pâi kɛ̂i a zeɛ́ɛ, Lubiŋ, Zuda da Liiva-ŋai dîa.

³² Ziɣãŋ láƃerei nyii pâi kɛ̂i vóloi kulâi perei sîɣaŋ ƃelai mâ perei nyii ŋɔkôya káa a kɔ́ɔ ƃɔ́rɔnii wála lɔ́ɔlu mei feerɛ pôlu ŋuŋ lɔ́ɔlu (7,500), ǹáa a pâi kɛ̂i a zeɛ́ɛ, Zosɛ, Bɛŋsima, da Daŋ ni dísuui ma.

³³ Ziɣãŋ nyii gáa seɣai pere siɣaŋ m̀élai ma nyii ŋɔkôya káa a kɔ́ɔ ƃɔ́rɔnii wála lɔ́ɔlu mei feerɛ pôlu ŋuŋ lɔ́ɔlu (7,500), láa a pâi kɛ̂i a zeɛ́ɛ, Simiɔŋ, Isaka, da Zɛbulɔŋ ni dísuui ma.

³⁴ Ziɣãŋ nyii gáa vóloi liî pere siɣaŋ ƃelai ma nyii ŋɔkôya káa a kɔ́ɔ ƃɔ́rɔnii wála lɔ́ɔlu mei feerɛ pôlu ŋuŋ lɔ́ɔlu (7,500), láa a pâi kɛ̂i a zeɛ́ɛ Gâa, Asɛ, da Nɛfɛtɛli ni dísuui ma.

³⁵ Ziɣãŋ ŋí ŋɔkɔ̀ɔŋ maa kélee bu gîe ma é tínaŋ daa-leei ma káa a kɔ́ɔ ƃɔ́rɔnii wála ŋuŋ buu saaƃa (30,000). Ǹyaŋ daa-leei ŋí láa ƃé pâi kɛ̂i a ‘Yâwɛɛ káa ƃɛ́.’ ”