Izikiɛ 45 - Bible

Yâwɛɛ ŋɔlɔii

¹ Tãi kà kɛ́ ǹɔii ŋákɔlɛ̂i lai, ka Yâwɛɛ ŋ̀ɔi kúla m̀a, nyii pâi kɛ̂i a lɔii maa waai. Ǹɔii ŋí ŋɔkôya é kɛ́ a mâa púu, ŋɔŋa kɛ̂tɛ kɛ́ ƃò a mâa lɔ́ɔlu-mɛi saaƃa.

² Ǹɔii ŋí ŋɔkɔ́ɔ ƃɔ́rɔnii ŋuŋ lɔ́ɔlu mɛi saaƃa pôlu buu náaŋ (840) m̀éla kélee ma káa Ŋ̀âla-pɛrɛ Kɛ́tɛi mɛ̂ni ma. À kɛ̀ tí, ka kɔ́ɔ ƃɔ́rɔnii buu-lɔ́ɔlu mɛi saaƃa káo náaŋ lɛ́ɛ é kɛ́ a dínaŋɔɔ m̀a.

³ Ka Yâwɛɛ ŋɔlɔii ŋí nyii ŋɔkôya káa a mâa puu ŋɔŋa kɛ̂tɛ kɛ́ ƃò a mâa náaŋ da gbûra kula m̀a nyii pâi kɛ̂i a Ŋ̀âla-pɛrɛ Kɛ́tɛi tɔɔ̂i nyii gwaa maa-waa ŋɔkwaa ma waai a pâi kɛ̂i naai.

⁴ Nàa é kɛ́ a ǹɔii kpûai nyii maa wâai. Ǹaa é kɛ́ a zâla láa-soŋ-ƃelai nyii-ŋai da tíi kɛ̀ ḿî Ŋ̀âla-pɛrɛi mui pɔ́ɔ díkɛ pà Yâwɛɛ ŋɛ́i-tuɛ díkɛ tíi kɛ̀ mìi. Ǹaa a pâi kɛ̂i a dípɛrɛ-ŋai tɔɔ̂i da Ŋ̀âla-pɛrɛ Kɛ́tɛi tɔɔ̂i.

⁵ Ǹɔii ŋí gbua kpéli a pâi kɛ̂i a Liiva-ŋai da tíi kɛ̀ Ŋ̀âla-pɛrɛi mui dípɔɔ. Da pâi taa-ŋa tɔɔ̂i naa díkɛ ƃò zu.

⁶ Ka lɔii-kpûa lɛɛ ǹɔii m̀aa waai kɔlɛ ma nyii ŋɔkôya káa a mâa puu, ŋɔŋa kɛ̂tɛ kɛ́ ƃò a mâa feerɛ. Ka taa lêe tɔɔ naa ƃɛ́i Eezuɛ-ŋai da pɔ̂ri kɛ̂i naai.

Ǹúu láa-tuɛ-nuui ŋɔlɔii kpûai

⁷ Ǹúu-laa-tuɛ nuui ŋɔlɔii é kɛ́ ǹɔii maa waai m̀éla feerɛ ma da ǹɔii nyii gáa a daa lêei pɔɔi. Ǹɔii ŋí ŋɔkɛ́tɛ a pâi kɛ̂i yɛ̂ɛ ǹɔii maa waai da ǹɔii dí daa lêei tɔ̀ɔ mai. Ŋɔŋa kɛ̂tɛ a pâi siɣêi vóloi liî pere é seri Eezuɛ ŋɔgoyaŋ-pere ma vóloi lîi-pere. É síɣe vóloi liî pere é seri Mɛditɛrenia Yuoi ma. Ǹúu láa-tuɛ-nuui ŋɔlɔii ŋɔkôya é kɛ́ yɛ̂ɛ Eezuɛ ǹuu suu tɔnɔ ŋɔlɔɔi.

⁸ Ǹɔii ŋí ƃé pâi kɛ̂i a ǹúu láa-tuɛ-nuui nyii gáa tíi kɛ̂i ŋɔlɔii. À kɛ̀ tí, ŋá núu-mɛi-ƃelai dífe ŋɔ́nɔ pâi tûai a Yâwɛɛ ŋɔnûai a wôya pere. Kɛ́lɛ da pâi ǹɛɛ̂i naa Eezuɛ-ŋai dí díkpɔɔi lɔii sɔlɔ ƃó yɛ̂ɛ berei dínuu-suui káa lai.

Dɔ̂ŋ-ŋai díkaa Ǹúu-laa-tuɛ ƃelai mɛ̂ni mai

⁹ Ŋ̀wála-wâla kélee Yâwɛɛ è mò ǹyɛɛi, “Kaai a Eezuɛ-ƃelai láa-tuɛ-ƃelai ka nâa kpera kásɔnyɔ̂ŋ ma nyii ka gɛ̀ a tãi su kôyaai. Ka kpera ŋwana lɔ̂ɔ da wôya tua kɛ̂i a ŋánûai ká téniŋ-ƃo da tɔ̃yâ tua kɛ́. Káfe ŋɔ́nɔ ŋánûai kùla dílɔii su. Ńyãai ŋ́gaa a Ŋ̀wála-wâla kélee Yâwɛɛ ńyãa ƃé mò tí.

¹⁰ “Kakɛ pɔni tɔɔ̂i, ka m̀aa sãai kɔ̂ɔŋ zɛŋ kɔ̂ɔŋ sɛŋ-foloi su nyii gáa a zɛŋ kɔ̂ɔŋ sɛŋ nyii núu kélee fâai m̀ai. Zɛŋ kɔ̂ɔŋ sãai ŋí ƃa ífai da bâi.

¹¹ “Ífai nyii ka zãa kpalai kɔ̂lɛ zu, da bâi nyii ka yá kɔ̀ɔŋ zui, díkɛ a dípɔriɛɛ a gîe. Bai puu káa a omɛ tɔnɔ, ífa puu kɛ́ ƃò a omɛ tɔnɔ. M̀ɛni ma, omɛi é kɛ́ a zɛŋ-kɔ̂ɔŋ sɛŋ nyii ǹúui kélee díkɛ sɛŋ kɔ̂ɔni zu.

¹² “Ká sɛŋ wuyɛɛi ŋɔkɔɔŋ maa é kɛ́ ŋí: Gera buu feerɛ é kɛ́ a sɛkɛ tɔnɔ. Sɛkɛ buu lɔ́ɔu mɛi-da kɛ́ ƃò a mina tɔnɔ.

^13-14 “Bere-sii ŋí ƃé ká kásama-sãai tɛ́ɛ la: Wîi nyii ka pâi dêei ká kpâlaŋ-ŋai, ŋuŋ tɔnɔ ŋákɔlɛ gîei buu lɔ́ɔlu mɛi-da í gbulu tɔ̂nɔ tɛɛ ḿbɔ. Bâlei nyii ka pâi dêei ká kpâlaŋ-ŋai, ŋuŋ tɔnɔ ŋákɔlɛ gîei buu lɔ́ɔlu mɛi-da í gbulu tɔ̂nɔ tɛɛ ḿbɔ. Ɔle-wulɔi nyii ká pâi gulâi ká ɔle-wurui ŋái, ŋáa kɔ́lɛ gîei ŋuŋ tɔ̂nɔ (100) í zeêi tɔnɔ tɛɛ ḿbɔ. Zãâi ŋí kɔ̂ɔŋ ífai da bâle su. Bâle puu káa a omɛ tɔnɔ kpaa máŋ kɔ̂ɔ tɔnɔ.

¹⁵ Ƃála ŋuŋ-feerɛ kélee dɔnɔ káa a ḿbɔɔ. Gáa a sɛŋ ká pá a mii-sɛŋ m̀ii-sɛŋ salai kula mɛ̂ni ma. Ká pá a taa-tulɛ-ŋa nyii-ŋai ka pâi díkerenîi a dípomai, ká pá a taa-tulɛ nyii ka pâi gérenîi a laoi-laa sama-sɛŋ a gɛɛ ká sɔnyɔ̂ŋ su mɛ̂ni é lɛ́ɛ. Ńyãai ŋ́gaa a Ŋ̀wála-wâla kélee Yâwɛɛ ńyãa ƃé mò tí.

¹⁶ Eezuɛ-ƃelai kélee dí pá a zâla-sãai ŋí da Eezuɛ láa-tuɛ nuui dí zâlai ŋí kúla gîe ma.

¹⁷ Eezuɛ láa-tuɛ nuui ƃé pâi pâi a daa-tulɛi géreŋ-salai mɛ̂ni ma, m̀ii-sɛŋ, mii-sɛŋ-salai kula sɛŋ, da gbele sɛŋ, gbele-sɛŋ-salai kula mɛ̂ni ma ǹûai kélee mɛ̂ni ma. Da pâi kɛ̂i zãâi ŋí tɛɛ̂i ŋ̀áloŋ-ninai da Vii-tɔɔ-ɣelei é pɛ́lɛ gúu-ŋai kélee díkaa Eezuɛi dí mɛni ma. Gáa a sɛŋ é zɔnyɔ̂ŋ-salai, m̀ii-sɛŋ-salai, géreŋ-salai, da ǹii-see-salai kula sãa tɛɛ ńyãa kwa Eezuɛ-ŋai kúloai kpɛ̂tɛ mɛ̂ni ma.”

Gúu-ŋai

¹⁸ Ŋ̀wála-wâla kélee Yâwɛɛ è mò ǹyɛɛi, “Ŋ̀áloŋ m̀aa-ŋuŋ ŋɔfólo m̀aa-ŋuŋ ɣele, ka niŋa sîrɛ-loŋ nyii kpɔlɔ̂ŋ fé mai síɣe ká sâla kula la Ŋ̀âla-pɛrɛ Kɛ́tɛi maa-waa mɛ̂ni ma.

¹⁹ Gáa a sɛŋ zâla láa-soŋ-nuui é zɔnyɔ̂ŋ salai ŋãa da siɣe é zia Ŋ̀âla-pɛrɛ Kɛ́tɛi ŋɔkpôŋ-soŋ wûru-ŋai dîa, é da sia ŋ̀âla-teƃelei ŋɔsônoŋ ǹaaŋɔɔ ma, é ŋɔ́nɔ da sia ziɣãŋ su-pere siɣaŋ láƃelei kpoŋ soŋ-wuru-ŋai dîa.

²⁰ Ka m̀ɛni tɔnɔi ŋí kɛ́ a ŋ̀áloŋ tɔ̂nɔ tí ŋɔfóloi lɔ́ɔlu mɛi feerɛ ɣele máŋ diai kélee sɔnyɔ̂ŋ kɛ̀ kpaa máŋ dí pɔara mɛni mâ da kɛ̀ dítɛ̂i perei maa mɛ̂ni ma. Ka nyíŋi kɛ́ a gɛɛ ká Ŋáɣâla-pɛrɛ Kɛ́tɛi maa wáa.

²¹ “Ka Dɛɛ-mɛi Kûui kúla a ŋ̀áloŋ m̀aa-ŋuŋ ŋɔfólo púu-kao náaŋ ɣele. Ka kpólo nyii tɛ́-sɛŋ fé zui míi a fólo lɔ́ɔlu mɛi feerɛ.

²² Gâloŋ nyii gáa ǹûai láa-tuɛi ƃé é pá a niŋa sîrɛ-loŋ a gúui ŋɔfóloi maa-ŋuŋ da ǹûai dímɛni ma a sɔnyɔ̂ŋ sala kula sɛ̂ŋ.

²³ Ǹyaŋ gáa a sɛŋ a gɛɛ gâloŋ é niŋa sîrɛ lɔ́ɔlu mɛi feerɛ da ƃála sîrɛ lɔ́ɔlu mɛi feerɛ nyii kpɔlɔ̂ŋ fé dîai tɛ́ɛ a kéreŋ-sala sãa Ńyãa Yâwɛɛ ḿɛni ma da ƃoli sîrɛ tɔnɔ sɔnyɔ̂ŋ sala kula mɛ̂ni ma. É zãai ŋí tɛ́ɛ a vólo lɔ́ɔlu mɛi feerɛi tí kélee é lɛ́ɛ la zu vóloi ǹɔ́ɔlu mɛi feerɛ ɣelei é seri.

²⁴ Gâloŋ é fêlaƃa ŋɔpâŋ buu feerɛ tɛ́ɛ niŋa sîrɛi dɔnɔ mɛni ma da m̀ála sîrɛi dɔnɔ mɛni ma tɛi-tɛi. É ɔle-wulɔ sane saaƃa tɛ́ɛ fêlaƃa pãŋ buu feerɛi mɛni ma tɛi-tɛi.

²⁵ “É ŋɔ́nɔ m̀ɛni tɔnɔi ŋí kɛ́ a ŋ̀áloŋ ǹɔ́ɔlu mɛi feerɛi ŋɔfólo púu-kao lɔ́ɔlu ɣele zɔnyɔ̂ŋ-salai, géreŋ-salai, m̀ii-sɛŋ-salai, da ŋ̀úlɔ-salai mɛni ma. É nyíŋi kɛ́ vólo kûu lɔ́ɔlu mɛi-feerɛi yée mu tãi da pâi kɛ̂i m̀ii-saai ŋáa tɛ́-ma kuui kɛ̂i lai.”