Izikiɛ 38 - Bible

Gɔ̂ɔ káa a Ɣâla ŋɔtíi kɛ́ kɔli-sɛŋ

¹ Yâwɛɛ è lòno ḿbɔ ǹyɛɛi,

² “Núu-kpune ǹóŋ, ǹia-woo kpanaŋɔɔi ŋí ƃó Gɔ̂ɔ ma nyii gáa a kâloŋ Misɛɛ da Tuba-ƃelai mɛi nyii-ŋai díkaa Maagɔɔ lɔii sui.

³ M̀ó ma yɛ̂ɛ Ńyãai a Ŋ̀wála-wâla kélee Yâwɛɛ ńyɛ̂ɛi, ‘Gɔ́lɔŋ a gɛɛ ńdɔɔ̂i ya Gɔ̂ɔ yái íkaa a Misɛɛ da Tuba díkâloŋ kɛ́tɛi.

⁴ Ŋa pâi ímaa fálenîi. Ŋa pâi kpawɔ-kao pilîi íkômai ŋá ítinaŋ ka íkɔkuluƃa-ŋai. Íkɔkuluƃa-ŋai nyii-ŋai da kɛ̂ kɔ́kɔ soô-ŋa mɛi, dímaa ɣiriɛ́ɛ a díkɔ-kɔ seɣe-ŋai, dítamaai. Gɔkuluƃa-ŋai ŋí kélee díkpala-ŋa ɣále kɔli-kalaŋ-ŋai kɛ́ ƃò díyeêi é pɛlɛ díƃoa-sɔkpɔ-ŋai tɛi-tɛi.

⁵ Kɔkuluƃa-ŋa dí kùla Pɛsia, Itiopia, da Puti díƃoa-sɔkpɔ-ŋai kɛ́ ƃò díyeêi, díkɔ-kɔ-gbaƃɛlɛ-ŋai kɛ́ ƃò díŋûa nyii-ŋai kɛ̂ a Gɔ̂ɔ ŋɔkɔ-kuluƃa-ŋai dai.

⁶ Gɔkuluƃa-ŋai nyii-ŋai kùla Gomɛ da Bɛɛ-togama nyii gáa yá-ŋua-perei ǹaa-ƃela díkaa ípôlu. Díkaa a ǹûai nyii-ŋai kùla lɔii-ŋuŋ támaa su.

⁷ M̀ó ǹɔii-ŋûŋ-ŋai nyii-ŋai díkaa ká kɔlɛ mai dîa a gɛɛ ka dîa-ni kákɛ a kákpîŋ kpɛtɛɛ a tãi ya mò la dîa a gɛɛ díkɛ a díkpîŋ kpɛtɛɛi.

⁸ Tãi támaa a tɛ̀ɛ, ŋa pâi ítôli ka íkɔkɔ-ƃela-ŋai a gɛɛ ká kɔ́ tóo dîa. Ka pâi kɔ́ pɛlɛ̂i ǹɔii-ŋûŋ-ŋai dîa nyii-ŋai ǹûai díkùla zu nyii-ŋai díkili fé kɔ́kɔ mɛ̂ni mai. Ǹûai ŋí díkùla lɔii-ŋuŋ támaa su dí díŋa tɛ́ mà Eezuɛ yèe-ŋai ma ƃɛ́i núu da fé kɛ́ ní naa a tãi su kôyaai. Kɛ́lɛ nûa da nâa pá naa díkɛ ƃò naa lii sêe su.

⁹ Gɔkuluƃa-ŋai kùla ǹɔii-ŋûŋ-ŋai su nyii-ŋai ka dîa-ni ka pâi, ka pâi pɛlɛ̂i dîa a m̀aa felaa yɛ̂ɛ tuna-ya fãa. Ka pâi dímɛi pɛlɛ̂i yɛ̂ɛ tuna-ya kpini.

¹⁰ “ ‘Ńyãai a Ŋ̀wála-wâla kélee Yâwɛɛi ŋa môi yâ Gɔ̂ɔ yâ, fólo da a pâi serîi, ya pâi mɛni nyɔ́mɔɔ kpɛtɛ̂i íkili ŋá.

¹¹ Ya pâi gbɛtɛ̂i a gɛɛ íli íkɔ pɛ́lɛ ǹûai dîa nyii-ŋai díkaa lii sêe su dí taa-ŋai su nyii siɣaŋ fé tínaŋ ni dîa kpaa máŋ núu da fé naa é dí maa kɔ̃ɔi.

¹² Ya pâi toôi ǹûai dîa nyii-ŋai kɛ̀ daa lêe-ŋai su nyii-ŋai kɛ̀ a bûŋ í díkɔ̃lîŋ kula díyeêi. Ǹûai ŋí díkɛ̀ lɔii da kpɛ́ni-ŋa su. Kɛ́lɛ da nâa pá pôlu díkɔ̃lîŋ kɛ́ ƃò ma é pɛ́lɛ taa-tule ŋa dîa. Díseɛɛ káa ŋ̀éniɛi sâmai.

¹³ Siƃa, Dedaŋ da Sipîŋ pɔni tɔɔ-ƃelai dí mò dîyɛɛi, “Í pà a gɛɛ íkɔ pɛ́lɛ ǹûai ŋí dîa a gɛɛ í díkɔ̃lîŋ kula díyêei? Ka íkɔkuluƃa-ŋai ká pà a gɛɛ ká kɔ́ pɛ́lɛ dîa ká díkanei da gôo, é pɛ́lɛ dítaa-tuɛ-ŋai da díkɔ̃lîŋ-ŋai kélee síɣe ká lí a dia?” ’ ”

¹⁴ Nya ƃe Ŋ̀wála-wâla kélee Yâwɛɛi è mò ḿâ a gɛɛ ŋá lí ŋá mó Gɔ̂ɔ ma ńyɛ̃ɛ mai, “Ya pâi íkpîŋ kpɛtɛ̂i a gɛɛ íli a tãi ŋá ǹûai Eezuɛ-ŋai díkɛ̀ la lii sêe sui.

¹⁵ Ka ínuu-kpulu kɛ́tɛi ká kùla ípɔi taai yá-ŋua-pere póŋ-poŋ, da soo-sia-ƃela támaa, díkɛ ƃò a kɔkuluƃa kpulu kɛ́tɛ wála-walaa nyii-ŋai kùla lɔii-ŋuŋ támaa sui.

¹⁶ Ya pâi pâi ŋánûai Eezuɛ mɛi yɛ̂ɛ Tuna-ya-kpini a ǹɔii mɛi pɛ̂lɛ. Ǹaa a kɛ̀ tí, ŋa pâi pâi a yá íkɔ pɛ́lɛ ŋálɔii ma a gɛɛ ŋ̀éniɛi su lɔii-ŋuŋ-ŋai dí gɔ́lɔŋ ǹúui ńyãai a Yâwɛɛ ŋ́gaa lai. Ŋa pâi ŋá maa wâa laai lɛ̂i a m̀ɛnii ŋa pâi gɛ̂i yá Gɔ̂ɔ ísarâi.

¹⁷ Yá ƃe íkaa a ǹúui nyii ŋa kɛ̀ lônoi é pîlaŋ ma a tãi su kôyaa ńyee mu-ƃelai nyii-ŋai díkaa a ŋálono kɛ́-ƃelai Eezuɛi sârai. Ŋa mò dîa a gɛɛ núu da káa pâi pâi nyii pâi kɔ́ pɛlɛ̂i kâai. Ńyãai ŋ́gaa a Ŋ̀wála-wâla kélee Yâwɛɛi ńyãa ƃé mò tí.”

Ɣâla è Gɔ̂ɔ ŋɔmɛnii ŋá tèe

¹⁸ Ŋ̀wála-wâla kélee Yâwɛɛ è mò ǹyɛɛi, “Tãi Gɔ̂ɔ a pâi kɔ́ pɛlɛ̂i la Eezuɛ mai, ŋa pâi ńii ŋwânai ma.

¹⁹ Ŋá mò a gɛɛ maa ɣêlei tí ŋa pâi ńii ŋwânai ŋá Eezuɛ lɔii kɛ́ é pú zu.

²⁰ Ǹyɛ̃ɛ-ŋai, ŋɔni-ŋai, vɛnɛ-sãai, da dɔara-sãai, é pɛ́lɛ ǹûai kélee díkaa ǹɔii sui, díkelee da pâi kpɛ̃lînii a tãi da pâi ŋá kɛ̀ naa laai kâai lai. Ǹyée kpaya-kpayai da pâi wôloi dítoo ǹɔii ma dí táa tâa. Bɛ́rɛ kâŋ-ŋai máŋ da pâi wôloi dí táa tâa ǹɔii ma.

²¹ Ńyãai a Ŋ̀wála-wâla kélee Yâwɛɛi ŋa pâi Gɔ̂ɔ maa yaôi a mɛni kpɔ̂lu támaa. Ǹûai kélee da pâi kɔ̂i díkîe ní pɔ́ a díƃoa sɔkpɔ-ŋai.

²² Ŋa pâi da ŋɔkɔ-kuluƃa-ŋai dímɛnii ŋa têei a kɔlɔ-fela nyɔ́mɔɔ ŋá dí páa kɔ́ su. Tuna kɛ́tɛ da sãɔ é pɛ́lɛ sãɔ-vãa laɣi da sɔfɔ fãa ma da pâi díkɔkuluƃa-ŋai su karâi da dínûai.

²³ M̀ɛni ma, ŋa pâi ŋá kɛ́tɛ-laai da ŋá maa wâa-laai lɛ̂i dîa. À kɛ̀ tí, ŋa pâi ŋ́gbîŋ lɛ̂i lɔii-ŋuŋ támaa ma. Gɛ̀ ní, da pâi gɔ̂lɔnii a gɛɛ ńyãa ƃa Yâwɛɛ.”