Izikiɛ 34 - Bible

Eezuɛ ƃala-mɛi káa-ƃelai

¹ Yâwɛɛ è lòno ḿbɔ ǹyɛɛi,

² “Núu-kpune ǹóŋ, lóno é pîlaŋ Eezuɛ ƃala-mɛi káa-ƃelai dîa. Lóno dípɔ í m̀ɛnii ƃó Ńyãai a Ŋ̀wála-wâla kélee Yâwɛɛi ŋá mò dîai yɛ̂ɛi, ‘Kpalo ƃêlaai kâa káai a Eezuɛ ƃala-mɛi káa-ƃelai. Ka kákpîŋ kɔ̃́nɔŋ kɔ̀ri kɛ́lɛ káfe kpáaŋ-ni m̀ala-ŋai mɛ̂ni ma.

³ Ka kɛ̂ díwulɔ miî. Ká kɛ́ díkɔlɔ kpɛ̂tɛ a seɣe ká mɛni ma. Ká kɛ̂ m̀ala-loŋ lɛ́lɛɛ-ŋai paâi, kɛ́lɛ káfa díkɔnɔŋ kùla.

⁴ Diai dífii kpɛɛ̂i, káfa kpɔŋ mâ tɛ̀ɛ dípɔ. Nyii-ŋai kɔ̂lɛi káfa sále tɛ̀ɛ dí pɔ. Nyii-ŋai díkɔ̃lîŋɔɔi káfa díkɔɔ ma ɣiri. Diai da pûi, káfa díkɔ̀ri ká pá a dîa pôlu. Diai da lâɣiŋ, káfa díkɔ̀ri é lɛ́ɛ lá zu ká díkaa. À kɛ̀ tí, kákɛ dísòŋ a nyɔ́mɔɔ.

⁵ M̀ala-ŋai táa tâai kpɛ́ni fêi dímɛi-káa nuu fé mà. Ǹyaŋ díkaa nâa a lɔɔ-fɛnɛ-sãa kɔ̃́nɔŋ.

⁶ Dítaa taâi ǹyée kpaya-kpaya-ŋai da ǹyée pɛlɛɛ-pɛlɛɛ-ŋai tôŋ su. Ŋá ƃála-ŋai táa taâi ŋ̀éniɛi su gwaa kélee ma núu da fé naa é díkula lɔɔ̂i kɛ́.

⁷ “ ‘M̀ɛni ma, káai a m̀ala-mɛi káa-ƃelai ka ŋ́woo mɛ́ni Ńyãai a Yâwɛɛi.

⁸ Tãi nɔ́ ŋ́gaa la a Ŋ̀wála-wâla kélee Yâwɛɛi, ka káwoli tɔɔ ḿâ. Lɔɔ-fɛnɛ-sãa da ŋaƃála-ŋai sôŋ díkɛ gɛ̀ a dí kɔ̃́nɔŋ, ƃála mɛi-kaa-núu da fé naa é dímɛi káa. Ƃála mɛi-kaa-nuu da fé naa é díkɔri. M̀ala-mɛi káa-ƃelai da díkpîŋ kɔ̃́nɔŋ kɔ̀ri, kɛ́lɛ dífe kpáaŋ ní m̀ala-ŋai mɛ̂ni ma.

⁹ M̀ɛni ma káai a m̀ala-mɛi káa-ƃelai ka káwoli tɔ́ɔ ḿâ.

¹⁰ Ńyãai a Ŋ̀wála-wâla kélee Yâwɛɛi ŋá môi kâa a gɛɛ kákaa a ŋ́gbɔara-ƃela. Ŋa pâi ŋaƃála-ŋai kulâi káyêei. Káfe ŋɔ́nɔ pâi pɔrîi kákpîŋ mɛi kâai. Ŋa pâi ŋaƃála-ŋai kulâi káyêei a gɛɛ dífe ŋɔ́nɔ kɛ̀ a kákɔnɔŋ.’

M̀ala mɛi káa-nuu lɛ́lɛɛi

¹¹ “Ńyãai a Ŋ̀wála-wâla kélee Yâwɛɛi ŋa mò a gɛɛ ńyãa kpîŋ ƃé pâi ŋaƃála-ŋai mɛi kâai. Ŋa pâi díkɔ̂rii ŋá dímɛi káa.

¹² Yɛ̂ɛ berei ƃála-mɛi káa nuu a ŋɔƃála-ŋai mɛi kâa lai, bere ƃé ŋa pâi ŋaƃála-ŋai mɛi kâai la. Ŋa pâi dí ŋáa tɛ̂i díkîe ma. Ŋa pâi díkɔ̂rii ŋá díkula gwaa-ŋai ma ƃɛ́i dí tàa-taa dí lí naa a kpíni a mɛni kpɔ̂lu ɣelei.

¹³ Ŋa pâi díkulâi ǹɔii da kpɛ́ni-ŋai su ŋá pá a dia pôlu Eezuɛ, díkpîŋ lɔii su. Ŋa pâi díkɔnɔŋ kulâi Eezuɛ yèe-ŋai tôŋ su ǹyá-ɣɛli-ŋai kɔlɛ. Ŋa pâi liî a dia ƃɛ́i kala ŋûnu támaa káa naa Eezuɛ lɔii sûi.

¹⁴ Ŋa pâi ǹɛɛ̂i naa dí dílaa míi kala lɛ́lɛɛ ŋá ǹyée-ŋai ma Eezuɛ lɔii su. Da pâi kɛ̂i laa-ni naa díkɛ dílaa mìi kala lɛ́lɛɛ ŋá Eezuɛ yee-ŋai ma.

¹⁵ Ńyãa kpîŋ ƃé pâi kɛ̂i a ŋ́gbîŋ ƃala-mɛi káa-nuui. Ŋa pâi gɛ̂i dí dífii tɔ́ɔ. Ńyãai a Ŋ̀wála-wâla kélee Yâwɛɛi Ńyãa ƃé mò tí.

¹⁶ “Ŋa pâi ŋáƃala láɣaŋɔɔ-ŋai kɔ̂rii, ŋá pá a dia pôlu. Diai díkɔ̃liŋɔɔi, ŋa pâi díkɔɔ ma ɣirîi. Diai dífii kpɛɛ̂i, ŋa pâi kpɔŋ mâ tɛɛ̂i dí pɔ́. Nyii-ŋai díkpaya-kpayai da nyii-ŋai díwala-walaai, ŋa pâi dímɛi kâai. Ŋa pâi dímɛi kâai teniŋ ƃô-laa su.

¹⁷ “À kɛ̀ tí, káai a ŋáƃala-ŋai Ńyãai a Ŋ̀wála-wâla kélee Yâwɛɛi ŋa môi kâa: Ŋa pâi mɛni-ŋa téeɛ kɛ̂i m̀ála lɛ́lɛɛ-ŋai da m̀ála nyɔ́mɔɔ-ŋai loai.

¹⁸ Kálaa miɛɛ gala lɛ́lɛɛi ŋí ŋa fé lɛ́lɛ ní, ǹyaa ka dáŋ-nii a ká kɔ́ɔi? Ká kpeliɛɛ a yá-seɣeŋɔɔ fé lɛ́lɛ-ni ǹyaa ká ǹyái nunûi a kákɔɔ̂i?

¹⁹ Gɛ̀ ní, ŋáƃala-ŋai kpéli-ŋai da pâi galai miî nyii ká daŋ a kákɔɔi, dí díkpele a ǹyái ká ǹunu a kákɔɔi?

²⁰ “M̀ɛni ma Ńyãai a Ŋ̀wála-wâla kélee Yâwɛɛi ŋa môi kâa a gɛɛ ŋa pâi mɛni-sâa ƃôi m̀ála wála-walaa-ŋai da m̀ála fíi-kpɛɛ-ŋai loai.

²¹ Kpɛ́ni fêi ka m̀ála fii-kpɛɛ-ŋai lòkwa ká kɛ́ dítũaŋ a kámĩla é lɛ́ɛ la zu díkelee díkɛ tàa-taa.

²² Ŋa pâi ŋáƃala-kpului mɛi kâai. Ḿve pâi ǹɛɛ̂i naa núu da é tûa a dia a nyɔ́mɔɔ. Ŋa pâi mɛni ŋatêei m̀ála lɛ́lɛɛ-ŋai da m̀ála nyɔ́mɔɔ-ŋai loai.

²³ Ǹyaŋ ŋa pâi ƃála-mɛi káa-nuu tɔnɔ seêi dímɛi nyii pâi kɛ̂i a ńyee mu-nuui Deeƃé ŋɔsuui su nuui da nyii pâi dí ŋáa kɔnîi. A pâi dímɛi kâai.

²⁴ Ńyãai a Yâwɛɛi Ńyãa ƃé pâi kɛ̂i a Díɣâlai. Ńyee-mu-nuui Deeƃé ŋɔsuui su nuu da kɛ́ ƃò a díkâloŋ. Ńyãa Yâwɛɛ ńyãa ƃé mò tí.

²⁵ Ŋa pâi lii sêe kpanaŋ-woo kɛ̂i díyêei é dímɛi káa. Ŋa pâi díkulâi ǹɔɔ-fɛnɛ-sãa ŋwana-lɔ̂ɔ-ŋai yêei. Da pâi kɛ̂i ǹɔii su a lii-see. Da pâi kɛ̂i nyîi ǹɔɔi su sɛŋ da fa dí kɛ̀.

²⁶ “Ŋa pâi lûwa tôoi dîa dí kɛ́ ƃò ŋáyee maa-waai kɔlɛ. Tãi da pâi kɛ̂i la naai, ŋa pâi gɛ̂i tuna é pú nyíi pâi kɛ̂i a lûwa dímɛni mai.

²⁷ À kɛ̀ tí ŋ̀úru-ŋai díkaa ǹɔɔi sui da pâi ƃâi. Ǹɔii a pâi gɛ̂i mii-sɛŋ é lɛ́lɛ. Da pâi kɛ̂i dílɔii su a lii-see pere. Tãi ŋa pâi díkula yêei kɛ̂i la díkpɔara-ƃelai yêei nyii díkɛ̀ a luɛ-ŋai, maa tãi ƃé da pâi gɔ̂lɔnii la a gɛɛ Ńyãa ƃa Yâwɛɛ.

²⁸ Lɔii-ŋuŋ da kélee fé ŋɔ́nɔ pâi pɛlɛ̂i dîa, kpaa máŋ fɛnɛ-sɛŋ da é ŋɔ́nɔ dí tá paa. Da pâi kɛ̂i a díŋuŋ ma ƃóɔɔ núu da fa ŋɔ́nɔ dí maa yâo.

²⁹ Ŋa pâi lɔii lɛ́lɛɛ tɛɛ̂i dí pɔ́. Ŋa pâi puru kperâi dí lɔii su. Ǹyaŋ lɔii-ŋuŋ da fé ŋɔ́nɔ pâi ɣɛ́lɛ-maa kulâi díkpônoi.

³⁰ À kɛ̀ tí, da pâi gɔɔ̂lɔnii a gɛɛ Ńyãa ƃa Díɣâlai. Ńyãa ƃé ŋ́gaa Eezuɛ mɛi kâai. Ńyãai a Ŋ̀wála-wâla kélee Yâwɛɛi Ńyãa ƃé mò tí.

³¹ Ká káa a ŋánûa, ńyaŋ ŋ́gɛ ƃò a Káɣâla. Ńyãai a Ŋ̀wála-wâla kélee Yâwɛɛi Ńyãa ƃé mò tí.”