Izikiɛ 33 - Bible

Ɣâla è Izikiɛ sèe a sɛŋ-mɛi-kaa nuu

¹ Yâwɛɛ è lòno ḿbɔ ǹyɛɛi,

² “Núu-kpune ǹóŋ, lóno ínûai pɔ́ yɛ̂ dâa à kɛ̀ ŋa kɔ́ pɛ̀lɛ lɔii da mà, ǹaa-ƃela da núu da sìɣe dí gɛ́ a dí kwaa mâ mɛi káa nuu.

³ À kɛ̀ a kɔ́ kàa pâi, a dúrii fɛ̀ɛ a gɛɛ é mó ǹûai dîa kɔ́ a pâi,

⁴ À kɛ̀ núu da a dúrii wóo mɛ̀ni, vé ŋ̀óli tɔɔ ní ǹia-wooi ma, gɔ́i a pà a bàa, gɛ̀ ní ǹúui tí ŋɔsaai maa mɛ̂ni káa gbîŋ ma.

⁵ Ŋɔsaai maa mɛ̂ni káa gbîŋ mà, kpɛ́ni fêi vé ŋ̀óli tɔɔ ní m̀ɛnii mâ dí mò mai. Kpɛ́ni fêi eê kɛ̀ é ŋ̀óli tɔ́ɔ dúru-wooi mâ veêi pɔri saâi.

⁶ Kɛ́lɛ à kɛ̀ gwaa mâ mɛi káa nuui è kɔ́ kàa pâi vé dúrui fɛ́ɛ ní a gɛɛ é mó ǹûai dîa kɔ́ a pâi, gɔ́i a pâi dí ta-ni paâi dísɔnyɔ̂ŋ su. Kɛ́lɛ dí maa mɛ̂ni a pâi lɛɛ̂i gwaa mâ mɛi-kaa nuui mâ.

⁷ “M̀ɛni m̀a, núu-kpune ǹóŋ, ŋa íkɛ a kwaa mâ mɛi-kaa nûu Eezuɛ-ŋai mɛ̂ni ma. Tãi kélee nɔ́ ya mɛni da mɛ̀ni la ńai mó mî dîa.

⁸ À kɛ̀ ŋa mò ŋwana lɔ̂ɔ nuu mà, ‘Óo ŋwana lɔ̂ɔ nuu, ya pâi saa tí-ti ƃôi’ ǹyaŋ ífe mó ní mà a gɛɛ é bôlu tɔɔ ŋɔsɔnyɔ̂ŋ ma, zɔŋyɔ̂ŋ-nuui tí a pâi saâi ŋɔsɔnyɔ̂ŋ su. Kɛ́lɛ ŋɔsaa mɛ̂nii a pâi kɛ̂i íŋûa.

⁹ Kɛ́lɛ à kɛ̀ yà ŋwana lɔ̂ɔ nuui lia-woo ƃò a gɛɛ é bôlu tɔɔ ŋɔsɔnyɔ̂ŋ ma vé ŋ̀óli tɔɔ ní yâ, a pâi saâi ŋɔsɔnyɔ̂ŋ su. Kɛ́lɛ ífe pâi saâi.”

Núu kpîŋ mɛni

¹⁰ Yâwɛɛ è lòno ḿbɔ ǹyɛɛi, “Núu-kpune ǹóŋ, mó Eezuɛ-ŋai dîa, ‘Kú pɔara mɛni mai da kúsɔnyɔ̂ŋ káa kúkpîŋ ŋûa. Kúsu káa karâi. Kwa pɔ̂ri ŋɔ́nɔ kúkɛ̀ ɣéniɛi kɛ́ pere kɛ̂i léŋ?’

¹¹ Mó Eezuɛ-ƃelai dîa Ńyãai a Ŋ̀wála-wâla kélee Yâwɛɛi ńyɛ̃ɛ m̀ɛnii ŋí ƃé ŋá mò kâa, ‘Tɔ̃yâ ma tãi nɔ́ ŋ́gaa la ɣele mai, ńii fa nɛ̃ɛ sɔnyɔ̂ŋ nuu ŋɔsɔnyɔ̂ŋ mɛ̂ni ma. M̀ɛnii a níi nɛ̃ɛi ƃa sɔnyɔ̂ŋ-nuu é ǹíi maa fáleŋ é lɛ́ɛ ɣele ma. Eezuɛ-ƃela, ka kpera sɔnyɔ̂ŋ kɛ̂i. Lé mɛni ƃé ka pâi saâi lai?’

¹² “Núu-kpune ǹóŋ, mó ínûai dîa à kɛ̀ sɔŋ lɛ̂lɛ-nuu a sɔnyɔ̂ŋ kɛ̀, ŋɔsɔŋ lɛ̂lɛi è gɛ̀ a maa-ŋuŋ fé pâi ŋuŋ-ma ƃôi. À kɛ̀ sɔnyɔ̂ŋ nuu a bôlu tɔ̀ɔ ŋɔsɔnyɔ̂ŋ ma, vé pâi saâi ŋɔsɔnyɔ̂ŋ pɔ̂lɔi mɛ̂ni ma.

¹³ Berei máŋ ŋa mò la a gɛɛ zɔŋ lɛ̂lɛ-nuui fé pâi saâi, kɛ́lɛ a kɛ̀ a gíli tɔ̀ɔ ŋɔsɔŋ lɛlɛ̂i ma a sɔnyɔ̂ŋ kɛ̀, ŋɔtua pere lɛlɛ̂i kíli fé pâi lɛɛ̂i ŋ́a. Kɛ́lɛ a pâi saâi zɔnyɔ̂ŋ è gɛ̀i mɛ̂ni ma.

¹⁴ Berei máŋ ŋá mò la a gɛɛ zɔnyɔ̂ŋ nuui a pâi saâi ŋɔsɔnyɔ̂ŋ mɛ̂ni mai, a kɛ̀ a bôlu tɔ̀ɔ ŋɔsɔnyɔ̂ŋ ma a sɔŋ lɛ̂lɛ kɛ̀,

¹⁵ a kɛ̀ a ŋɔkpâi têe yɛ̂ɛ berei è góno-tèe lai, kpaa máŋ a kɛ̀ zɛŋ è ŋumai a bɔɔŋa-too tɛ̀ɛ pôlu, vé pâi saâi. À kɛ̀ a ŋátɔ̂ŋ-ŋai mɛi kâa, vé pâi saâi.

¹⁶ Tãi nɔ́ a bôlu fé la ŋɔsɔnyɔ̂ŋ mai, ŋɔsɔnyɔ̂ŋ kíli fé pâi lɛɛ̂i ŋ́a, ǹyaŋ gɛ̀ ní a pâi lɛɛ̂i ɣele ma.

¹⁷ “Ǹyaŋ ká ǹûai da mò dîyɛɛi, Yâwɛɛ tûa-pere fé lɛ́lɛ ní. Kɛ́lɛ ńdûa pere lɛ̂lɛɛi. Día ƃé dítûa pere fé lɛ́lɛ ní.

¹⁸ À kɛ̀ zɔŋ lɛ̂lɛ-nuui a kpera sɔŋ lɛ̂lɛ kɛ̂i é pɛ́lɛ sɔnyɔ̂ŋ kɛ̂i, a pâi saâi ŋɔsɔnyɔ̂ŋ mɛ̂ni ma.

¹⁹ À kɛ̀ zɔnyɔ̂ŋ nuui a kpera sɔnyɔ̂ŋ kɛ̂i a sɔŋ lɛ̂lɛ kɛ̀, vé pâi saâi ŋɔsɔnyɔ̂ŋ pɔ̂lɔi mɛ̂ni ma. Kɛ́lɛ, a pâi lɛɛ̂i ɣele ma.

²⁰ Kɛ́lɛ Eezuɛ-ƃelai dí mò a gɛɛ ńdûa-pere fé lɛ́lɛ ní, m̀ɛni ma, ŋa pâi dí mɛnii ŋá têei yɛ̂ɛ berei dí tûa pere káa lai.”

Zerusâlɛŋ taai yée-mɛi ɣále mɛni maa tuŋ

²¹ Kú kɛ́ɛ gɔsôŋ perei sui ŋɔkóraŋ puu-kao feerɛi ŋɔɣáloŋ buui ŋɔfóloi ǹɔ́ɔlu ɣelei, núu tɔ̂nɔ è pù é kúla Zerusâlɛŋ é pá é mó ḿâ ǹyɛɛi, “Daa lêei a too kúkpɔara-ƃelai yêei.”

²² Nalôŋ ŋí é lɛ́ɛ pâi a m̀aa ɣêle-wulii tí, Yâwɛɛ ŋɔmɔ̂leŋ è pa ḿɛi é ńa fúloŋ a gɛɛ ŋá pɔri lônoi ŋɔ́nɔ. Tãi ɣele è ƃɔ̀ lai, Yâwɛɛ è ńa fùloŋ a m̀aa ɣêle walai tí.

Ǹûai dísɔnyɔ̂ŋ:

²³ Yâwɛɛ è lòno ḿbɔ ǹyɛɛi,

²⁴ “Núu-kpune ǹóŋ, diai díkaa daa pîleŋ ŋá Eezuɛ lɔii sui, díkaa nɔ́ m̀ôi dîyɛɛ, ‘Berei máŋ Eberaɣɛ̃ɛ è kɛ̀ la a núu tɔnɔi, ǹyaa ƃé dí ǹɔii ŋí kélee tɛ̀ɛ bɔ́. Kɛ́lɛ kútâmaai. M̀ɛni ma, ǹɔii káa a kú pɔ́ɔ a tɔ̃yâ.’

²⁵ “M̀ɛni mà ye mó dîa Ŋ̀wála-wâla kélee Yâwɛɛi ǹyɛɛi, ‘Ká sua mîi nyii ŋàa káa nîi zui. Ká káɣâla-pɔkɔɔŋ-ŋa fɛ̀li, kákɛ núu paa. Gɛ̀ ní ǹɔii a pɔ̂ri kɛ̂i a ká pɔ́ɔ?

²⁶ Kákili tɔɔ̂i ƃóa-sɔ̂kpɔ ma. Kátûa-pere nyɔ̂mɔi. Kákɛ lɔ̀ pɔ̂rɔŋ kɛ̀ a ká ƃarâai dínɛyâai. Ǹɔii a pɔ̂ri kɛ̂i a ká pɔ́ɔ?

²⁷ “Mó dîa Ŋ̀wála-wâla kélee Yâwɛɛi ǹyɛɛi, ‘Tãi nɔ́ ŋ́gaa la ɣele mai, diai díkaa daa pîleŋ-ŋai ŋái da pâi lɛɛ̂i ƃóa-sɔkpɔ-ŋa mu. Diai pâi kɛ̂i ǹɔɔi sui, ŋa pâi dítɛ̂ɛi ǹɔɔ-fɛnɛ-sãai pɔ dí dípaa. À kɛ̀ tí, diai pâi kɛ̂i gɔni wôlo-ŋai sui da diai pâi kɛ̂i daa-ŋai su ƃɛ́i kɔkuluƃa támaa káa naai, ŋa pâi dípaai a kɔlɔ-fela nyɔ́mɔ.

²⁸ Ŋa pâi ǹɔii kɛ̂i a lɔii pûŋ nyii núu da fé pâi kɛ̂i naa. À kɛ̀ ti, ŋ̀wála-wala laai díkili è kɛ̀ a dɔ̀ɔ mà díkɛ ŋɛi-tɛ kɛ̀i a pâi kperâi. Ǹyée-ŋai díkaa Eezuɛi díkelee da pâi lɛɛ̂i a dípûŋ núu da fa pɔ̂ri tɛɛ̂i zu.

²⁹ Nyíŋi a kɛ̀, gɛ̀ ní da pâi gɔ́lɔnîi a gɛɛ ńyãa Yâwɛɛ ƃé ǹɔii lɛ̂ɛ a bûŋ, m̀ɛni nyɔ́mɔɔi dí gɛ̀i mɛ̂ni ma.’ ”

Ɣâla ŋɔlóno-kɛ-nuui ŋɔworɛ̂-wooi ŋa-see kɛɛi

³⁰ Yâwɛɛ è mò ǹyɛɛi, “Núu-kpune ǹóŋ, ínûai da kɔ̃yɛŋ daai kɔlɛ mâ ziɣãŋ mâ da dípɛrɛ-ŋai láƃerei da kɛ̂ lônoi é pîlaŋ yâ. Da kɛ̂ môi díkîe-ni dîa dîyɛɛi, ‘Pá í mɛnii Yâwɛɛ è mòi í mɛni.’

³¹ À kɛ̀ tí, da pâ yɛ̂ɛ ŋá nûa dí sée díkɛ ŋ̀óoi mɛ̀ni nyii ya kɛ̂ môi dîai. Kɛ́lɛ dífe pâi m̀ɛnii kɛ̂i ya mò dîai. Kpɛ́ni fei, da ŋ́wɛ̂li nɔ́ a díla-gbɔ, kɛ́lɛ díkili tɔɔ̂i nɔ́ nîi dísɛŋ wɛ̂lii ma.

³² Íkaa nɔ́ dí ŋɛ́i yɛ̂ɛ pêle-kɛ-nuu ƃé wɛli-kɛ-maa wule toôi gɛ́ ɣale-sɛŋ-woo nɛ̃ɛ ɣàle. Kpɛ́ni fêi da m̀ɛnii mɛ̂ni ya mò dîai, kɛ́lɛ dífa ŋàa sèe kɛ̀.

³³ Kɛ́lɛ, tãi íwoo ŋàa-see a pâi kɛ̂i lai, da pâi gɔ̂lɔni a gɛɛ Ɣâla ŋɔlóno kɛ́-nuu káa dísama.”