Izikiɛ 30 - Bible

Yâwɛɛ a pâi Ize kula maa kɛ̂i

¹ Nya ƃe Yâwɛɛ è lòno ḿbɔ ǹyɛɛi,

² “Núu kpune ǹóŋ, ɣâla-woo ƃó í mɛnii tûŋ too nyii ńyãai a Ŋ̀wála-wâla kélee Yâwɛɛi ŋa pâi môi yâi. M̀ɛni-ŋai ŋí ƃó kpɔ́ a ɣêlei pere. M̀ó yɛ̂ɛ, ‘Mɛni kpɔ̂lu ɣele káa pâi!

³ Ŋ̀elei nyii Yâwɛɛ a pâi tíi kɛ̂i lai a nâa lɛɣɛ. Gáa a mɛni ŋáa téɛɛ da mɛni kpɔ̂lu ǹɔii-ŋûŋ-ŋai mɛ̂ni ma.

⁴ Kɔ́ a pâi têei Ize. Mɔ̃lɛ-laa támaa é pá Itiopia. Ize-ƃela támaa da pâi saâi Da pâi ǹɔii su sãa kélee siɣêi Dí ǹɛɛ a bûŋ.

⁵ “ ‘Gɔ́i tí a pâi gɔ-kuluƃa-ŋai dí dífɛli Itiopia, Lebia, Lada, da Arebia é pɛ́lɛ Kuu da ǹûai nyii-ŋai kùla ŋánûai sámai kélee paâi.’ ”

⁶ Yâwɛɛ è mò ǹyɛɛi, “É síɣe Midɔ é tóo Ãsuwaŋ lɔii mâ, diai kélee kpɔ́ dítɔɔ̂i Ize pôlui, da pâi saâi gɔ́i su. Ŋa pâi Ize kɔkuluƃa su-mɛni kɛ́tɛɛ-ŋai su karâai. Ńyãai a Ŋ̀wála-wâla kélee Yâwɛɛi ńyãa ƃé mò tí.

⁷ Ize lɔii a pâi kɛ̂i a lɔii pûŋ é tɛ́ɛ ǹɔii pûŋ-ŋai kélee dîa ŋ̀éniɛi su. Ǹaa taa-lee-ŋai kélee da pâi kɛ̂i a taa pûŋ é tɛ́ɛ daa lêe-ŋai kélee díkaa a dípûŋ dîa ŋ̀éniɛi su.

⁸ Tãi ŋa pâi ŋɔŋ toôi la Ize, ŋá ŋɔkpɔŋ mâ-ƃelai kélee yée-mɛi ɣâlei, m̀aa tãi ƃé da pâi gɔ̂lɔnii la a gɛɛ ńyãa ƃa Yâwɛɛ.

⁹ “Tãi ŋa pâi Ize su karâai lai, ŋa pâi kéla kɔ́ɔ ma félaa-ŋa tɛɛ̂i yá ŋá keleŋ su a gɛɛ dí pá Itiopia-ƃelai pɔ́naa dí m̀ɛni kpɔ̂lu ɣelei ŋí mɛni ƃó dîa nyii dífe kɛ́ ní a maa mɛ̂ni kɔ́lɔŋɔɔi. À kɛ̀ tí, da pâi yaôi kpɔ́ a ŋánaa, kpɛ́ni fêi, ŋ̀elei tí a pâi pâi.”

¹⁰ Ŋ̀wála-wâla kélee Yâwɛɛi è mò ǹyɛɛi, “Ŋa pâi Babelɔŋ kaloŋ Nɛbukinaza kɛ̂i é Ize ŋɔtɔɔ-laai kpéra.

¹¹ Da ŋɔkɔ-kuluƃa sɔŋ nyɔ́mɔɔ-ŋai da pâi dí Ize lɔii su kara. Da pâi kɔ́ pɛlɛ̂i Ize ma dí ǹaa-ƃela kélee kpɔ́ páa a ƃóa-sɔkpɔ-ŋa, dípoma é ǹɔii láa fɛ́ɛ.

¹² Ŋa pâi Ǹâai Ya-leei kpâlai. Ŋa pâi ǹɔii kɔlɛ̂i ŋwana-lɔɔ-ƃela dîa. Ŋɔyã-ŋa da pâi ǹɔii su gwaa mâ kélee su karaâi. Ńyãa ƃa Yâwɛɛ nyii mò tii.”

¹³ Ŋ̀wála-wâla kélee Yâwɛɛi è mò ǹyɛɛi, “Ŋa pâi Ize-ƃelai díɣâla pɔɔkɔŋ-ŋai da ǹɛɛ-ɣala-ŋai kélee su karaâi nyii-ŋai díkaa Mɛifeei. Núu da fé ŋɔ́nɔ pâi lɛɛ̂i naa é ǹɔii káa Ize lɔii su. Ŋa pâi dí maa yaôi kpɔ́ a ŋánaa.

¹⁴ Ŋa pâi Ize lɔii ŋɔséɣai-pere lɛɛ̂i a bûŋ, ŋá ŋɔŋ tóo Zoaŋ taa-leei mâ nyii gáa yá-ŋua perei. Ŋa pâi Tɛƃii taa-lee kɛ́tɛi kula maa kɛ̂i a ŋánaa.

¹⁵ Ŋa pâi ńii ŋwânai Pɛlusiɔŋ taa-leei mâ nyii gáa a Ize ŋɔkili tɔ̂ɔ mai. Ŋa pâi Tɛƃii ŋɔtɔɔ-sãai su karâi.

¹⁶ Ŋa pâi Ize kérenii a ŋɔŋ. Pɛlusiɔŋ a pâi kɛ̂i mɛni kpɔ̂lu su. Ŋa pâi Tɛƃii ŋɔsiaŋ wôloi ǹyá fɛ̂ɛi é tɛ́ naa.

¹⁷ Da pâi Ɛlipoli da Bubasi taa-lee-ŋai su ǹyaŋkpa-ŋai paâi kɔ́ su, dí ǹûai gbéli-ŋai sóŋ a kɔ-sôŋ ŋa.

¹⁸ Tãi ŋa pâi Ize yée mɛi ɣâlei la, ŋá ŋɔwála-wala laai nyii gíli tɔɔ̂i mai kpérai, kpíni a pâi toôi Tapaŋi. Kpíni a pâi Ize mɛi pɛlɛ̂i. À kɛ̀ tí, da pâi ŋɔtaa-lee-ŋai su-ƃelai kélee sonîi a kɔ-sôŋ ŋa.

¹⁹ Bere ƃé ŋa pâi Ize kula maa kɛ̂i la. À kɛ̀ tí, da pâi gɔ̂lɔnii a gɛɛ ńyãa ƃa Yâwɛɛ.”

Ize kaloŋ ŋɔwála-wala laai su a kara

²⁰ Kúkɛɛ gɔ-sôŋ perei su ŋɔkóraŋ buu-kao tɔnɔi, ŋɔŋáloŋ maa-ŋuŋ ŋɔfólo lɔ́ɔlu mɛi feerɛ ɣelei, Yâwɛɛ è lòno ḿbɔ ǹyɛɛi,

²¹ “Núu kpune ǹóŋ, ŋaâ nâa Ize kaloŋ yée mɛi ɣále. Ǹyaŋ núu da fé naa a gɛɛ é dɔɔ ŋ̀á a gɛɛ é kɛ́ a zu kpanaŋɔɔ nyii a pɔ̂ri ƃóa-sɔ̂kpɔ sonîi lai.

²² M̀ɛni ma, Ńyãai a Ŋ̀wála-wâla kélee Yâwɛɛi ŋa mó ńyɛ̃ Ize kaloŋ káa a ŋ́gbɔara nûu. Ŋa pâi ǹyée veerɛŋɔɔ ɣâlei. Ǹyée nyii kɛ̀ a ǹɛ́lɛɛi da nyii ŋá ŋ̀ale a maa-ŋuŋ. À kɛ̀ tí, ŋa pâi gɛ̂i m̀óa-sɔkpɔi é kúla ǹyêei é tóo.

²³ Ŋa pâi Ize-ƃelai kɛ̂i dítaa tâa ǹɔii-ŋûŋ-ŋai sáma, ŋá dítaa tâa ǹɔii-ŋai su gwaa kélee ma.

²⁴ Ŋa pâi ŋáƃoa-sɔkpɔi tɛɛ̂i Babelɔŋ kaloŋ pɔ́ a ŋɔwála-wala-laai. Kɛ́lɛ ŋa pâi Ize kaloŋ yée ɣâlei. À kɛ̀ tí, a pâi nyíɣɛi ŋɔkpɔara-ƃelai ŋɛ́i túɛ yɛ̂ɛ núui saâi sɛŋ sôli maa sûi.

²⁵ Ŋa pâi Ize kaloŋ yée su saâi. Kɛ́lɛ, ŋa pâi Babelɔŋ kaloŋ yée su kpananîi. Tãi ŋa pâi ŋáƃoa-sɔkpɔi lɔ̂i la ǹyêei é ǹɛ́ Ize perei, ǹûai kélee da pâi gɔ̂lɔnii a gɛɛ ńyãa ƃa Yâwɛɛ.

²⁶ Ŋa pâi Ize-ƃelai kélee kpɔ́ táa tâai ǹɔii ŋuŋ-ŋai su. Ŋa pâi dítaa tâai ǹɔii-ŋai su gwaa kélee. À kɛ̀ tí, da pâi gɔ̂lɔni a gɛɛ ńyãa ƃa Yâwɛɛ.”