Izikiɛ 29 - Bible

Ŋ̀âla-wooi dɔɔ̂ Ize mai

¹ Dí liɛɛ a kúa ǹuɛ-laai su ŋɔkóraŋ puui, ŋɔɣáloŋ puui ŋɔfólo puu-kao feerɛi su, Yâwɛɛ è lòno ḿbɔ ǹyɛɛi,

² “Núu-kpune ǹóŋ, tínaŋ Ize pere ílono é pîlaŋ gâloŋ ma da ǹaa-ƃela kélee a nyɔ́mɔɔ.

³ M̀ó m̀a yɛ̂ɛ, Ńyãai a Ŋ̀wála-wâla kélee Yâwɛɛi ńyɛ̂ɛi, ‘Íkaa a ŋ́gbɔara nûu, yái íkaa a Yuoi-zele-kali nyii gáa ǹyá lêei kpóŋ mai. Í mò yɛ̂ɛ yá ƃé Ǹâai Ya-leei kpɛ̂tɛ, gáa a ípɔɔ.

⁴ Ŋa pâi kpawɔɔ pilîi ínɛ̂ɣɛŋ kpawu su ŋá gɛ́ ǹyɛ̃ɛ-ŋai díkaa ǹyái sui díkanaŋ íkala mâ. À kɛ̀ tí, ŋa pâi íkulâi Ǹâai Ya-leei su ǹyɛ̃ɛ-ŋai kánaŋɔɔ íkpono mâ.

⁵ Ŋa pâi ka ǹyɛ̃ɛ-ŋai ká pilîi vɛ̃ɛ-kpâlaŋ sâmai. Ǹyaŋ ká poma a pâi lɛɛ̂i naa ká lòo-nuu fé m̀a. Ŋa pâi dɛɛ̂i ǹɔɔ-fɛnɛ sãai da ŋɔni-ŋai díkaa ŋ̀elei sui pɔ́ naa a díkɔnɔŋ.

⁶ À kɛ̀ tí, Ize-ƃelai da pâi gɔ̂lɔnii a gɛɛ ńyãa ƃa Yâwɛɛ.’ ” Yâwɛɛ è mò Ize-ƃelai dîa ǹyɛɛi, “Eezuɛ-ŋai dí díkili tɔ̀ɔ kâa a gɛɛ dá dímɛi káa, kɛ́lɛ ká káa nɔ́ yɛ̂ɛ wúru kpâla.

⁷ Kɛ́lɛ, tãi dí tiîŋ la kâai, ká ɣàle ká dísɔɔ díkpumûŋ, ká dísama kúla ŋ̀á.

⁸ M̀ɛni ma Ńyãai Ŋ̀wála-wâla kélee Yâwɛɛi ńyɛ̃ɛ ŋa pâi pâi a kɔ-kuluƃa-ŋa dí pá dípɛlɛ kâa díka pâa da kátaa tûlɛ-ŋai a ƃóa-sɔkpɔ-ŋa.

⁹ À kɛ̀ tí, Ize a pâi lɛ̂ɛi a lɔii pûŋ. Ǹyaŋ yá pâi gɔ̂lɔnii a gɛɛ Ńyãa ƃa Yâwɛɛ. “Í mò yɛ̂ɛ, yá ƃé Ǹâai Ya-leei kpɛ̂tɛ, gáa a ípɔɔ.

¹⁰ M̀ɛni ma Ŋ́gaa a ka Ǹâai Ya-leei ká kpɔara-nuu. Ŋa pâi Ize lɔii kélee kpɔ́ lɛɛ̂i a bûŋ, é síɣe Midɔ nyii gáa yá-ŋua perei é seri Ãŋsuaŋ nyii gáa séɣai perei, é lɛ́ɛ la zu é seri Itiopia goyaŋ perei mâ.

¹¹ Núu da, kpaa máŋ fɛnɛŋ-sãa da kélee fé pâi siâi m̀a. A pâi kɛ̂i a lɔii pûŋ a kóraŋ buu náaŋ.

¹² Ŋa pâi Ize kɛ̂i a lɔii pûŋ ǹɔii pûŋ-ŋai kélee sáma ŋ̀éniɛi su. Ize-taa lee-ŋai kélee da pâi kɛ̂i da bûŋ kóraŋ buu náaŋ yée mu. Da pâi kɛ̂i a taa pûŋ é tɛ́ɛ taa pûŋ sii kélee ma. Ŋa pâi ká kɛ̂i a kɔ-pu kɛ́-ƃela ŋá dítaa tâa ǹɔii-ŋûŋ-ŋai sáma.”

¹³ Ŋ̀wála-wâla kélee Yâwɛɛi è mò ǹyɛɛi, “Kóraŋ buu náaŋ a tɛ̀ɛ, ŋa pâi Ize-ƃelai kulâi ǹɔii-ŋûŋ-ŋai su ŋá dítàa-taa naai ŋá pá a dia pôlu.

¹⁴ Ŋa pâi pâi a dia Ize kwára pere ƃɛ́i díwɔlɔ kɛ̀ seêi naa a bɔlɔɔi. Tãi da pâi kɛ̂i la naai, da pâi kɛ̂i a kâloŋ-lɔii fíi kpɛɛ.

¹⁵ Da pâi kɛ̂i a dífii kpɛɛ é tɛɛ ǹɔii-ŋuŋ fíi-kpɛɛ ŋai kélee dîa. Ǹyaŋ dífe ŋɔ́nɔ pâi kɛ̂i lɔii-ŋuŋ da kélee mɛi. Ŋa pâi gɛ̂i pɔri fé pâi kɛ̂i dîɛ a gɛɛ dí gɛ́ lɔii-ŋuŋ da é kɛ́ díwoo mu.

¹⁶ Eezuɛ fé ŋɔ́nɔ pâi gili tɔɔ̂i dîa kpɔŋ mâ mɛni ma. Ize ŋɔmɛni kula maai a pâi kɛ̂i a mɛni kili too-ŋa nyii pâi ǹɛ̂i Eezuɛ ma a gɛɛ gáa a mɛni nyɔ́mɔɔ a gɛɛ é gíli tɔ́ɔ Ize ma kpɔŋ mâ mɛni ma. À kɛ̀ tí, Eezuɛ a pâi gɔ̂lɔnii a gɛɛ ńyãa ƃa Ŋ̀wála-wâla kélee Yâwɛɛi.”

Gâloŋ Nɛbukinaza a pâi Ize sonîi

¹⁷ Eezuɛ-ƃelai kɛ́ɛ gɔ-sôŋ perei su a kóraŋ buu-feerɛ káo lɔ́ɔlu mɛi feerɛi, ŋáloŋ maa-ŋuŋ ŋɔfóloi m̀aa-ŋuŋ, Yâwɛɛ è lòno ḿbɔ ǹyɛɛi,

¹⁸ “Núu kpune ǹóŋ, Babelɔŋ kaloŋ Nɛbukinaza è kɔ́ pɛ̀lɛ Taya, é gɛ́ ŋɔkɔ-kuluƃa-ŋai díkpîri tĩyɛ é lɛ́ɛ la zu kpóraŋ é tóo díŋûa, díkâraŋ-ŋa wolo-woloŋ é ƃó. Kɛ́lɛ gâloŋ da ŋɔkɔ-kuluƃa-ŋai dí kùla naa a díyee fôlo.

¹⁹ M̀ɛni ma Ńyãai a Ŋ̀wála-wâla kélee Yâwɛɛi ŋá mò ńyɛ̃ m̀ɛnii ŋí ƃé ŋa pâi gɛ̂i. Ŋa pâi Ize lɔii tɛɛ̂i Gâloŋ Nɛbukinaza pɔ́. A pâi toôi naa é ǹaa tɔɔ-sãa kélee síɣe a ŋɔkɔ-kuluƃa-ŋai dífela fêi.

²⁰ Ŋa pâi Ize tɛɛ̂i bɔ́ a ŋɔfela-fêi dii è gɛ̀i m̀aa mɛ̂ni ma. Kpɛ́ni fêi ŋɔkɔ-kuluƃa-ŋai dítii kɛ̀ ḿî. Ǹyãai a Ŋ̀wála-wâla kélee Yâwɛɛi ńyãa ƃé mò tí.

²¹ “Tãi nyíŋi a pâi kɛ̂i lai, ŋa pâi gɛ̂i Eezuɛ-ƃelai tɔɔ̂i é kpanaŋ. Ŋa pâi gɛ̂i yá Izikiɛ ílono a gɛɛ ǹûai kélee dí í wóo mɛ́ni a gɛɛ dí gɔ́lɔŋ a gɛɛ ńyãa ƃa Yâwɛɛ.”