Izikiɛ 27 - Bible

Taya saa maa wɔ̂lɔ-wooi

¹ Yâwɛɛ è lòno ḿbɔ ǹyɛɛi,

² “Núu kpune ǹóŋ, ye Taya mãa wɔ̂lɔ kɛ́.

³ M̀ó Taya ma nyii gáa a daa-leei nyii gáa tɔ̂ɔi ǹyuoi mai, nyii a pɔni tɔ̂ɔ ǹûai dîa da kûla ǹyá ƃêlai veerɛ ma perei, yɛ̂ɛ Ŋ̀wála-wâla kélee Yâwɛɛi ǹyɛɛi, ‘Óo Taya, ya siɛ-woo tée ílɛlɛ mɛ̂ni ma.

⁴ Íkɛi ƃa ǹyuoi sâmai. Íkpɛtɛ-nuui è íkpɛ̀tɛ yɛ̂ɛ yá-ŋa kèleŋ lɛ́lɛ.

⁵ Dí íkpɛtɛ-wuru-ƃelai kùla fiɣɛ wurii su nyii gáa Ɛmɔŋ yee kɛ́tɛi mai. Ŋ̀úrii nyii íteniŋ-tɔɔ seɣe káa mai dí gbɛ̀tɛ a sîda nyii kùla Lɛƃanɔŋ-lɔii su.

⁶ Dí íƃeyai kpɛ̂tɛ a Oô-wuru nyii dí gùla Basãŋ-lɔii su, dí íŋa-pu wuru-ƃelai kúla pãa-wuru su nyii kùla Sapɔrɔ-lɔii sui. Dí bɔ̃yɛ tôo a séle-nyiŋ.

⁷ Dí ísia seɣei kpɛ̂tɛ a seɣe nɛnɛ-fɛfɛ paláa, nyii dí gbɛ̀tɛ Ize-lɔii su a gɛɛ nûa da íkàa dí íkɔlɔŋ a maa félaa ya kɛ̀ kwaa kôyaa ma. Dí ímɛi pɛlɛ-sɛŋ kpɛ̀tɛ a seɣe lɛ́lɛɛ. Dí gbɛ̀tɛ a seɣe kpɔ̂lu-mu tɛɣiɛɛ da bûluŋ kɛ́ɛ nyii kùla dîŋ su Saipɔlɔ-lɔii sui.

⁸ Ka yá-ŋa-keleŋ kɛ́-ƃelai díkùla Sidɔŋ da Avada. Ka kpîŋ ya ŋá-keleŋ kɛ́-ƃelai díkɛ̀ a ǹyá ŋá-keleŋ sia-ƃelai téniŋ tɔɔ ƃêla.

⁹ Yá-ŋa keleŋ kpɛtɛ-ƃela Lɛ́lɛɛ-ŋa nyii-ŋai kùla Babulo, Dí kɛ̀ naa díkɛ íƃɔi pɛŋ-pɛlɛ. Yá-ŋa keleŋ-sia ƃela nyii ŋai kula yá-ŋa keleŋ ŋa sui, Dí pá díkɛ pɔni tɔ̂ɔ í pɔni-tɔɔ kwaa ŋai mâ.

¹⁰ “ ‘Kɔkuluƃa-ŋa dí kùla Pɛsia, Ladia, da Lebia díkɛ tíi kɛ̀ a í kɔ-kûluƃa-ŋai. Dí díkpala ŋá ɣále kɔli-kalaŋ-ŋai da díkɔli gbâƃɛlɛ-ŋai sɛ̂lɛŋ ípɛrɛ-kaŋ ma. Ǹûa-ŋai dítii è pà a laa maa tɛ̂ ípɔ.

¹¹ Kɔkuluƃa-ŋa díkùla Avada díkɛ í siaŋ mɛi kâa. Da-ni díkùla Gamaa díkɛ í yeŋkêŋ-ŋai mɛi kâa. Dí díkpala ŋá ɣále kɔli-kalaŋ-ŋai sɛ̂lɛŋ í siaŋ ma dí ílɛlɛ-laai láa kúla.

¹² “ ‘Ka Sipîŋ ká pɔni tɔ̂ɔ é tɔɔ-sãa kɛ́ɛ yɛ̂ɛ káne, kɔli, pâne-kalaŋ da fomâ maa fâleŋ a dípɔni-sãai.

¹³ Ka Gurii, Tuba, da Misɛi ká pɔni tɔɔ gîe ma. Dí luɛ-ŋa da ƃara-sãa maa fâleŋ a ká pɔni-sãai.

¹⁴ Ka Bɛɛ Togama ká ká-pɔni-sãai maa fâleŋ a dítii-kɛ soo-ŋai, díkɔkɔ-soo-ŋai da dísoo-fáleŋ-ŋai.

¹⁵ Ǹûai kùla Lôoi ka dîa ni ká pɔni tɔ̂ɔ. Ǹûai nyii-ŋai kùla ǹyá-leei koo mai, dí ká sãai yâ a séle-nyiŋ támaa da kpanâŋ.

¹⁶ Ǹûai kùla Siriai, dí kápɔni-sãai da ká sãâi dámaa yà. Díka pɔni-sãai maa fâleŋ a kɔni-sɔ̃ɔ kpanaŋɔɔ-ŋa, seɣe kpɔ̂lu mu tɛiɣiɛɛ, seɣe palaa, seɣe nɛnɛ-fɛfɛ, é pɛ́lɛ kɔni sɔ̃ɔ kpanaŋɔɔ nyii da kɛ̂ ma ɛmɔlɔɔ.

¹⁷ Ka Zuda da Eezuɛ-ni ká pɔni tɔɔ. Dí ká pɔni-sãai maa fâleŋ a wîi, kɔ̃́iŋ-wulɔ, ɔle-wurɔ da kúŋ-sãa.

¹⁸ Ka Dɛmɛika-ƃelai ká pɔni tɔ̂ɔ. Dí ká pɔni-sãai maa fâleŋ a ŋwã̂ai nyii kùla Ɛɛbulɔŋ da ƃála-leɣa nyii kula Saâi.

¹⁹ Dí pà a kɔli da kúŋ-sãa dí ká pɔni-sãai maa fáleŋ la.

²⁰ Diai kùla Dedaŋ ka dîa-ni ká soo-mɛi see-sãa mu seɣe-ŋa maa fâleŋ a ká pɔni sãai.

²¹ Arebia da Kedɛi láa túɛ-ƃelai díkɛ̀ a ká pɔni-tɔɔ-ƃelai gɛ́tɛi. Dí pà a ƃála lônii, ƃála sîrɛ-ŋa da ƃoli-ŋa ka dîa-ni ká pɔni tɔ́ɔ la.

²² Ka Siƃa da Laama-ƃelai ká pɔni tɔ̂ɔ. Díka pɔni-sãai maa fâleŋ a kúŋ-sãa lɛ́lɛɛ, kɔni-sɔ̃ɔ kpanaŋɔɔ-ŋa, da gôo.

²³ Ka Araŋ-taa-leei, Kanɛ-taa-leei, da Idɛŋ-taa-leei é pɛlɛ Siƃa pɔni-tɔɔ-ƃelai dîa ká pɔni tɔ̂ɔ. Asɔɔ-taa-leei da Seema-taa-leei su-ƃelai dí pɔni tɔ̂ɔ ká yêei.

²⁴ Bɔni-tɔɔ-ƃelai ŋí dí seɣe lɛ́lɛɛ-ŋa, seɣe kpɔ̂lu mu tɛiɣiɛɛ, seɣe-palaa-ŋa, da pɛ́rɛ-mu seɣe pɔyɛ̃ɛ-toɔɔ lɛ́lɛɛ da ɣɛli-pɔ̃lɔɔ nyii dí zɔlɔ la a ǹɛ́lɛɛi.

²⁵ Kpiri-siɣe ya ŋá-keleŋ kpulu kɛ́tɛ ƃé lì a ká pɔni-sãai. Ká kɛ̀ yɛ̂ɛ yá-ŋa keleŋ a kɛ̀ yá ŋá Ǹáa fɛ́ɛ a kpîri támaa.

²⁶ Tãi géleŋ kɛ́-ƃelai dí pà la a káa ǹyái sâmai, Vãai nyii kùla vóloi kulâi perei è gɛ̀ ká pú.

²⁷ Ká tɔɔ pɔni-sãai kélee, Ká kéleŋ kɛ́-ƃelai da díi kɛ-ƃelai, Ká kéleŋ kpɛtɛ-ƃelai da ká pɔni tɔɔ-ƃelai, Gɔkuluƃa-ŋai kɛ́ géleŋ sui díkelee, Díkelee kpɛ́ dí lɛ̀ɛ ǹyái su, A tãi géleŋ è pù lai.

²⁸ Ǹyá ŋá keleŋ kɛ́-ƃelai wɔ́lɔ wôo È sèri zîŋ ŋá.

²⁹ “ ‘Ǹûai kélee dí nâa kùla géleŋ-ŋai kélee su, Ǹyá ŋá keleŋ sia-ƃelai kpéli-ŋai kélee da nâa tɛ́ ziŋ ŋa.

³⁰ Díkelee díkaa nâa wɔ̂lɔi a zu kɛ́tɛ ká maa mɛ̂ni ma. Díkɛ muluŋ pû díŋûa díkɛ kìliŋ nuui su.

³¹ Díkɛ̀ díŋuŋ ƃôi ká maa mɛ̂ni ma. Díkɛ maloŋ tôo-maa sêɣe tòo dîa. Dílii è tòo pôlu díkɛ wɔ̀lɔ

³² Díkɛ zamaŋ wule tòo ká maa mɛ̂ni ma. “Gbɛ̂ɛ ƃé kwa pɔ̂ri gɔ̂ɔnii Taya ma, Taya nyii mɛi saâi ǹyuoi sui?

³³ Tãi ka kâa pà la a ká-pɔni sãai, Ka kâa ǹɔii-ŋuŋ ŋai kélee líi làa. Ka kâa gâloŋ-ŋai kɛ̀ dítɔɔ A ká pɔni-sãai tɔɔ sãai.

³⁴ Ǹyaŋ ka nâa lɛɛ ǹyái su. Ka yeŋ kpɔ́ ǹyá lêei kpóŋ ma. Ká pɔni-sãai da diai kélee da tíi kɛ̀ kâai Da yeŋ ǹyá lêei kpóŋ ma.”

³⁵ “ ‘Diai kélee díkaa ǹyá lêei kɔlɛi da yao a m̀ɛnii lâa kâai. Dí kâloŋ-ŋai da yao kpɔ́ núu kɛ́ gàa díŋɛi ma.

³⁶ Ká kɛ ɣéniɛi a kpɛɛ kpɔ́ a malôŋ-pere wɔ́lɔ-wɔlɔ da wɔlɔ-wɔlɔ bɔni tɔ̂ɔ-ƃelai díkɛ yào a m̀aa tûŋ. Da yao kpɔ́ a gɛɛ dí m̀aa tûŋ táa tâa.’ ”