Izikiɛ 25 - Bible

Amɔŋ ŋɔmɛni-ŋa-teɛɛi maa Ɣâla-wooi

¹ Nya ƃe Yâwɛɛ è lòno ḿbɔ ǹyɛɛi,

² “Núu-kpune ǹóŋ, íŋɛi tínaŋ Amɔŋ-ŋai pɔ́ naa pere í ɣâla-woo ƃó é pîlaŋ dîa. M̀ó dîa yɛ̂ɛi,

³ ‘Ŋ̀wála-wâla kélee Yâwɛɛi ǹyɛɛ ká káwoli tɔ́ɔ ḿâ. Kálii è nɛ̃ɛ a tãi ká gàa la da ŋápɛrɛ maa-waai maa tĩa kara lai, da tãi dí Eezuɛ-lɔii su kàra la, da tãi dí lì la a Zuda-ƃelai a kɔ-soŋ-ŋai.

⁴ M̀aa mɛ̂ni ma, ŋa pâi ká tɛɛ̂i ǹûai pɔ́ kùla vóloi kulâi perei a díyee mu-ƃela. Da pâi díƃûu-ŋai tɔɔ̂i ká sama dísee naa. Da pâi kɛ̂i ká wúru-ƃa-ŋai miî díkɛ niŋa-ŋini-yai kpêle m̀aa nɛ̃ɛ̂i ká gbelei.

⁵ Ŋa pâi Laba taa-leei kɛ̂i a soo-fáleŋ-ŋa láa miî. Ŋa pâi ǹɔii m̀éla kpéli kɛ̂i a ƃála-ŋa láa miî. À kɛ̀ tí, ka pâi gɔlɔnîi a gɛɛ ńyãa ƃa Yâwɛɛ.

⁶ “ ‘Ńyãa Yâwɛɛ ƃé m̀ɛnii ŋí ƃò. Ká káyee-ŋa lókwa, ká píli ɣelêi ká pîlaŋ ká kɛ́ lii-nɛ̃ɛ kùla kpɛ́ni fêi, Eezuɛ ƃɛlɛ kpɛɛ̂i kákoi.

⁷ Tãi nɔ́ ká gɛ̀ tí lai, ŋa pâi ká tɛ̂ɛi lɔii-ŋuŋ da kpɛ́ni ŋa pɔ́ a gɛɛ díka-sãai kula ká yêei. Ŋa pâi ká paâi ká kúla ǹɔii-ŋûŋ-ŋai sáma. Ŋa pâi gɛ̂i ká sáa kálaa é láŋ ǹɔii-ŋûŋ-ŋai sáma. À kɛ̀ tí ká pâi gɔlɔnîi a gɛɛ ńyãa ƃa Yâwɛɛ.’ ”

Môa ŋɔmɛni ŋa-teɛɛi maa Ɣâla-wooi

⁸ Ŋ̀wála-wâla kélee Yâwɛɛi è mò ǹyɛɛi, “Kpɛ́ni fêi Môa è mò ǹyɛɛ Zuda káa nɔ́ yɛ̂ɛ ǹɔii-ŋûŋ-ŋai dai,

⁹ Ŋa pâi ŋɔgoyɛŋ pere-ŋai mâ láa ƃôi díkpɔara-ƃelai dîɛ. Díkpɔara-ƃelai da pâi dítaa-lêe lɛ́lɛɛ-ŋa kɛ́ɛ yɛ̂ɛ Bɛzɛsimɔ, Baamoaŋ da Kiliatiaŋ sonîi díyêei.

¹⁰ Ŋa pâi da Amɔŋ-ŋai tɛɛ̂i vóloi kulâi pere-ƃelai pɔ́ a díluɛ-ŋa. Ǹyaŋ dífe pâi ŋɔ́nɔ kɛ̂i ɣele mâ a lɔii-ŋuŋ.

¹¹ Ŋa pâi Môa ŋɔmɛnii ŋáa têei a bere sîi ŋí é gɔ́lɔŋ a gɛɛ ńyãa ƃa Yâwɛɛ.”

Idɔŋ ŋɔmɛni ŋá-teɛɛi maa Ɣâla-wooi

¹² Ŋ̀wála-wâla kélee Yâwɛɛi è mò ǹyɛɛi, “Idɔŋ-ƃelai dí mɛni kpa kùla Zuda-ƃelai dîa a ŋwana-lɔ̂ɔ pere. M̀ɛni ma, m̀ɛni-kpa kuláai tí a pá a sɔnyɔ̂ŋ Idɔŋ mà.

¹³ M̀ɛni ma ŋa duŋ too a gɛɛ ŋa pâi Idɔŋ kula maa kɛ̂i, ŋá ǹaa-ƃela kélee da daa-tulɛ-ŋai kélee páa. Ŋa pâi ǹaa lɛɛ̂i a bûŋ é síɣe Temaŋ taa-leei mâ é seri Dedaŋ taa-leei ma. Da pâi ǹaa-ƃela kélee paâi kɔ́ su.

¹⁴ Ŋa ǹûai nyii-ŋai kùla Eezuɛi ƃe pâi mɛni kpa kulâi Idɔŋ-ŋai dîa ḿî. Da pâi gɛ̂i Idɔŋ-ŋai díŋa lii-ŋwanai kíli kɔ́lɔŋ. Idɔŋ-ŋai da pâi ŋámɛni kpa kuláa kɔlɔnîi. Ńyãai a Ŋ̀wála-wâla kélee Yâwɛɛi ƃé mò tí.”

Felesia ŋɔmɛni ŋá-teɛɛi maa Ɣâla-wooi

¹⁵ Ŋ̀wála-wâla kélee Yâwɛɛi è mò ǹyɛɛi, “Felesia-ŋai dí mɛni kpa kùla díkpɔara-ƃela pɔlɔ-pɔlɔ-ŋai dîa a ŋwana-lɔ̂ɔ pere a gɛɛ dí dípaa.

¹⁶ M̀ɛni ma, ŋá doôi a lolo a gɛɛ ŋa pâi dí paâi a dísuu. Ŋa pâi Felesia-ŋai díkaa Yúo koo-ma lɔii sui kélee su karâi.

¹⁷ Ŋa pâi díkula maa kɛ̂i kpɔ́ a ŋa ŋánaa a ŋá mɛni kpâ kulaai. Ǹyaŋ da pâi ŋálii-ŋwanai kɔlɔnîi. À kɛ̀ tí, da pâi gɔlɔnîi a gɛɛ ńyãa ƃa Yâwɛɛ.”