Izikiɛ 24 - Bible

Gbɛ̃ɛ lêɣii

¹ Ǹûai kɛ́ɛ gɔ-soŋ perei sui, góraŋ lɔ́ɔlu mɛi náaŋ ŋɔɣáloŋ buui ŋɔfólo puu ɣelei, Yâwɛɛ è lòno ḿbɔ ǹyɛɛi,

² “Núu kpune ǹóŋ, ye vólo kûui ŋí láa pɔ̃yɛɛ. Kpɛ́ni fêi vóloi ŋí ƃé Babelɔŋ kaloŋ da ŋɔkɔ-kuluƃa-ŋai dí tìnaŋ la Zerusâlɛŋ ma.

³ Mó ŋátɔɔ mâ-ƃelai dîa yɛ̂ Ŋ̀wála-wâla kélee Yâwɛɛi ǹyɛɛ ŋá záŋ ŋí sɔ́ɔ kâa: ‘Ka ǹeɣii tɔ́ɔ ŋɔŋ-ŋa, ká yá pú zu.

⁴ Ye sua kpûa-kpua lɛ́lɛɛ pú zu. Dí kɛ́ a zuai ǹyee da ŋ̀wɛ́rɛ é pɛ́lɛ gáo lɛ́lɛɛ-ŋai dîa.

⁵ Zuai ŋí é kɛ́ a m̀ala-lɛ́lɛɛ-ŋai da sua. Kɔi pú mù. Ǹɛɛ naa é nɛ́ŋ. Zua-kaoi da ǹuu ɣíli.’ ”

⁶ M̀ɛni ma, Ŋ̀wála-wâla kélee Yâwɛɛi è mò ǹyɛɛi, “Kpalo ƃêlai ǹúu paa taa-leei ŋí ma. Gáa yɛ̂ɛ kpɛ̃ɛ lêɣi nyii maa fé waa nii. Da pâi zua kpua-kpua-ŋai kulâi zu tɛi-tɛi é lɛ́ɛ la zu é kpɛ́ɛ ǹeɣii su nyii va pɔ̂ri gberâi.

⁷ Ǹúui è bàa daai sui ŋ̀ãa káa nîi naa gɔnii ma. Kpɛ́ni fêi vé bu ní ǹɔii mâ a gɛɛ é mɛi pɛ́lɛ a muluŋ.

⁸ Ŋá ŋ̀ãai lɛɛ naa é ǹíi ŋwána, a gɛɛ ŋá gba kula. Ŋãai è bùi, ŋá ǹɛɛ gɔnii mâ a gɛɛ dífe m̀ɛi pɛ̂lɛ.”

⁹ M̀ɛni ma Ŋ̀wála-wâla kélee Yâwɛɛi è mò ǹyɛɛi, “Kpalo ƃêlai ǹúu paa taa-leei ŋí ma. Ńyãa kpîŋ ŋa pâi ǹeɣi mu kɔi ŋá tɛ̂i gîe ma a gɛ́tɛ.

¹⁰ Ŋɔŋ ŋáa tɛ́ a ŋánaa. Ŋɔŋ ŋáa fɛ́ɛ. Zuai ɣíli a ǹɛ́lɛɛ ízu pene ímaa pɔri. Ǹɛɛ naa zua-kaoi é kéreŋ.

¹¹ Gɛ̀ ní, mara-leɣi foloi sée ŋɔŋ têŋai ŋá, a gɛɛ é fãa é kpɔlu. À kɛ̀ tí, ǹeɣii lɛ́ɛ ŋɔŋ ŋá a gɛɛ m̀arai é kéreŋ mà.

¹² Kɛ́lɛ, ŋá ŋ́gbîŋ mɔ̃lɛ nɔ́, kpɛ́ni fêi ǹeɣii maa kéreŋɔɔ fa pɔ̂ri gbɛ̃ɛi kulâi mà.

¹³ Ŋɔkpɛ̃ɛi káa yɛ̂ɛ ŋɔwulu-wulu kɛ́ɛ maa liƃiɛɛi. Kpɛ́ni fêi, ŋá ká maa waa, kɛ́lɛ ká maa fé waa ní. Ká maa fé ŋɔ́nɔ paî waâi é lɛ́ɛ la zu ŋá ŋálii-ŋwanai ŋ̀aa see kɛ́ a káa.

¹⁴ Ńyãa Yâwɛɛ ƃé mò tí. Ǹyaŋ ŋàa see a pâi kɛ̂i. Ŋa pâi gɛ́i tí. Ḿve pâi koyɛ̃nii perêi. Ḿve pâi í malôŋ kâai. Ḿve pâi ǹíi penei. Ŋa pâi íkula maa kɛ̂i yɛ̂ɛ berei ítâa-pere káa lai. Ńyãa Yâwɛɛ ńyãa ƃé mò tí.”

Ɣâla ŋɔlóno kɛ-nuui ŋɔnɛnîi saa mɛ̂ni

¹⁵ Nya ƃe Yâwɛɛ è ŋɔ́nɔ lòno ḿbɔ ǹyɛɛi,

¹⁶ “Núu kpune ǹóŋ, ŋa pâi í wɛli-kɛ maa nuui siɣêi íyêei a ńyee sãai tɔnɔ. Kɛ́lɛ ífe pâi wɔ̂lɔi kpaa máŋ í malôŋ sèe ƃó, kpaa máŋ íŋɛi ya é pú.

¹⁷ Wɔ́lɔ, kɛ́lɛ ífe ǹɛɛ naa núu da é íwɔlɔ woo mɛni zaa mɛnii mâ. Í ƃɔrɔ lɔ́ íŋûa é ǹɛ́ a gɛɛ ífe malôŋ sèe ƃôi. Ífe sìa a íkɔɔ-ŋa fòlo. Ífe íŋuŋ-mɛi pɛ̂lɛ, kpaa máŋ í m̀alôŋ-see ƃó ƃelai dímii-sãai da mii.”

¹⁸ Nya ƃe ŋá lòno ǹûai pɔ́ a Ŋ̀ele-wâlai tí. Ŋ̀ele-wûlii tãi kɛ́ɛ a serii, ŋánɛnîi è sàa. Bôlu ma ɣele ƃɔ́ɔi, ŋá m̀ɛnii kɛ́ dí mò ḿâi.

¹⁹ Ǹûai dímarê kɛ̀ dîyɛɛi, “Ífe pâi m̀ɛni sãŋ ŋí sukulâi kûɛ?”

²⁰ Nya ƃe ŋá mò dîa ńyɛɛi, “Ŋ̀wála-wâla kélee Yâwɛɛi è mò ḿâ ǹyɛɛi,

²¹ ‘Ŋá worɛ̂ɛ-wooi ŋí ƃó Eezuɛ-ƃelai dîa. Ŋa pâi ŋá ɣâla-pɛrɛ kɛ́tɛi nyii ka kɛ̀ ŋɔwála-walai laai maa yôŋka têei maa-tĩa karâi. Ka ŋ̀wɛ̂lii ká ŋ̀âla-pɛrɛi ŋí káa, ká lí mu. Ǹyaŋ ká lônii-sinaai da kálônii-nɛyãai nyii-ŋai pâi lɛɛ̂i ká pôlu ká taai sui da pâi lɛ̂ɛi ƃóa-sɔ̂kpɔ mù.

²² À kɛ̀ tí, ká pâi m̀ɛnii kɛ̂i Izikiɛ è gɛ̀i. Káfe pâi ká lá mɛi pɛlɛ̂i, kpaa máŋ kámii-sɛŋ da mii yɛ̂ɛ malôŋ-see ƃó nûu.

²³ Káƃɔrɔi a pâi kɛ̂i káŋûa. Kákpaŋ-kpalii kɛ́ ƃò kákɔɔ ŋá. Káfe pâi malôŋ-see ƃôi kpaa máŋ káwɔlɔ. Kɛ́lɛ ka pâi kɛ̂i sia sîai kákɛ wɔ̀lɔ, kányiŋɛ kásɔnyɔ̂ŋ mu tɛi-tɛi.

²⁴ M̀ɛni-ŋai nyii kélee Izikiɛ è gɛ̀i káa a ŋɛi-kɛ-maa ká mɛ̂ni ma. Ka pâi m̀ɛni-ŋai è gɛ̀i kélee kpɔ́ da kɛ̂i. Tãi m̀ɛni-ŋai ŋí da pâi kɛ̂i lai, ka pâi gɔlɔnîi a gɛɛ ńyãa ƃa Ŋ̀wála-wâla kélee Yâwɛɛi.’ ”

²⁵ Yâwɛɛ è mò ǹyɛɛi, “Núu kpune ǹóŋ, ŋa pâi díkili-tɔɔ maa kwaa-ŋai ma sonîi díyêei, nyii-ŋai díkaa a díkili-tɔɔ maa kwaa-ŋai ma da ƃɛ́i da dílaa maa tɛ̂-ŋai sɔlɔ ƃô naai da ƃɛ́i-ŋai da kɛ ǹaa kâai, díkili kɛ́ ƃò ǹaai. Ŋa pâi ŋɔ́nɔ dílônii-nɛyãai da dílônii-sinaai sonii díyêei.

²⁶ M̀aa tãi tí ma, ǹúui nyii pâi pûi ƃé pâi pâi é m̀aa tûŋ too yɛ̂ɛ.

²⁷ Tãi tɔnɔi tí yée-mu, ya pâi lônoi bɔ́. Ífe ŋɔ́nɔ pâi kɛ̂i a ítiniŋɔɔ yɛ̂ɛ berei í kɛ̀ la a bɔlɔɔi. À kɛ̀ tí, ya pâi kɛ̂i a ŋɛi-kɛ-maa dímaa mɛ̂ni ma. Ǹyaŋ da pâi gɔlɔnîi a gɛɛ ńyãa ƃa Yâwɛɛ.”