Izikiɛ 23 - Bible

Ǹɛnîi da ǹeɣe-nɛnii dísɔnyɔ̂ŋ kɛ̀

¹ Nya ƃe Yâwɛɛ è lòno ḿbɔ ǹyɛɛi,

² “Núu kpune ǹóŋ, nɛyãa feerɛ ƃé wɔ́lɔ kɛ̀ naa, díkɛ̀ a nɛnî tɔnɔ ǹônii.

³ Dí kɛ̀ wulu-wulu kɛ̂i Ize-lɔii su. Ǹaa ƃe dí seɣe ɣîri dîa naa. Sinâa díkɛ̀ pêle kɛ̂i a díŋini.

⁴ Nɛyãi ŋí maa-ŋuŋ láa ƃé kɛ̀ a Óola, ǹêɣe láa ƃé kɛ̀ a Óoliba. Ŋá díkula a nɛnî. Dínîa-pɛlɛɛ maa sɔlɔ ƃó ḿî yɛ̂ɛ berei dílaa káa lai, Óola ƃa Sameria da Óoliba ƃa Zerusâlɛŋ.

⁵ Berei máŋ Óola è kɛ̀ la a ŋánɛnîi, da Asiria-ƃelai díkɛ̀ wulu-wulu kɛ̂i.

⁶ Da-ŋa díkɛ̀ a kɔkuluƃa-ŋa nyii-ŋai kɛ̀ a dí maa ɣiriɛ́ɛ a seɣe kpɔ̂lu mu tɛɣíɛɛ. Díkelee dîkɛ a ǹyaŋkpa lɛ́lɛɛ-ŋa díkɛ ƃò a soo-sia-ƃela.

⁷ Óola da ǹúu láa túɛ-ƃelai díkɛ̀ wulu-wulu kɛ̂i. Ŋɔwulu-wulu kɛ́ɛi è gɛ̀ é gbîŋ maa-tĩa kara kpɛ́ni fêi è kɛ díɣâla-pɔkɔɔŋ-ŋai fɛlîi.

⁸ Vé ǹyée kula ní ŋɔwulu-wulu kɛ́ɛi su nyii è kɛ̀ gɛ̂i Ize lɔii sui. Sinâa dí pêle kɛ̀ a ŋ̀íni é lɛ́ɛ la zu dí seɣe ɣíri ma. Dí díwɛli kɛ́ maai pù ǹíi su.

⁹ M̀ɛni ma, ŋá duãŋ ŋɔwɛ́li-ŋai dîa nyii-ŋai kɛ̀ a Asiria-ƃelai, nyii-ŋai díwɛli è kɛ mà a ŋanaai.

¹⁰ Dí m̀aa kpôloŋ é lɛ́ɛ a gaŋ. Dí ǹônii-sinaai da ǹɛyãai sòŋ ǹyêei. Dí bàa a ƃóa-sɔ̂kpɔ. Ǹɛyãai kɛ̀ kwaa kélee mai díkɛ̀ lônoi é pîlaŋ m̀ɛnii kɛ́ lai mà.

¹¹ “Berei máŋ ǹêɣe Óoliba è m̀ɛni-ŋai ŋí naa kàa lai, è wulu-wulu kɛ é tɛ́ɛ ǹîa ŋɔi mâ.

¹² È Asiria mɛi-ƃelai, gɔkuluƃa-ŋai mɛi-ƃelai da gɔkuluƃa-ŋai nyii-ŋai kɛ̀ a dímaa ɣiriɛɛ kɔ́kɔ mɛni ma, díkɛ ƃò a sinâa lɛ́lɛɛ-ŋai da-ŋa díkɛ soo-ŋa siai maa kili-tee.

¹³ Ŋá gàa a gɛɛ Óoliba da ǹîa-nɛnii dísɔŋ è kɛ̀ nɔ́ tɔnɔɔ.

¹⁴ “E ŋuŋ tôo kpɔ́ wulu-wulu kɛ́ɛ su a ŋanaa. Tãi è Babelɔŋ-ŋai pɔɔkɔŋ kàa la gbɛtɛɛ ziaŋ ma bɔ̃yɛɛ toɔ̂ɔi,

¹⁵ Dí ƃoa-sɔ̂kpɔ ŋai kɛ́ ƃo díleɣe díkelee díkɛ ƃo yɛ̂ɛ Babelɔŋ kɔkuluƃa-ŋa láa tuɛ ƃelai.

¹⁶ Tãi è díkàa lai, ǹíi è kùla dímɛni ma. Nya ƃe è worɛ̂ɛ tɛ̀ɛ dí pɔ́ naa Babelɔŋ.

¹⁷ Babelɔŋ-ŋai dí pà da dîa ni dílɔ-pɔlɔŋ kɛ́. Ǹyaŋ dí m̀aa tĩa kàra. Dí m̀aa tĩa kàra kpɔ́ kɛ̂i fé kɛ́ ní mà. Dí ƃɛlɛ è kpɛ̀ɛ kpɔ́ ŋ́goi.

¹⁸ Tãi è nâa pili la wulu-wulu kɛ́ɛ su é tɛɛ gɛi mai núu kélee dí nâa gɔ́lɔŋ, ḿvîi è nâa kpɛɛ m̀aa mɛ̂ni ma, ŋá tée bôlu yɛ̂ɛ berei ŋá têe la ǹîa pôlui.

¹⁹ Kɛ́lɛ è kɛ̀ nɔ́ wulu-wulu kɛ̂i nɔ́ gɛ́ gíli-ŋa sìa é pîlaŋ gbela tãi ma, a tãi è wɔ́lɔ kɛ̀ wulu-wulu kɛ̂i la Ize-lɔii sui.

²⁰ Wulu-wulu kɛ́ɛ ŋánaa kɛ́ sinaa nyii-ŋai da kâa lɔ-pɔ̂rɔŋ kɛ̀ kpɔ́ yɛ̂ɛ ƃoli sîrɛ, kpaa máŋ yɛ̂ɛ ɣîla-sirɛi maa mɛni è kɛ kpɔ́ ńii su a ŋanaa.

²¹ È kɛ̀ ŋ̀wɛ̂li a gɛɛ é dûaa-pere pɔlɔi nyii è kɛ̀ gɛ̂i Ize a ŋɔkpela tãi é da kɛ́. Tãi ŋí ƃé sinaa da kâa kɛ̀ ŋ̀íni sonii la é lɛ́ɛ la zu díkɛ seɣe ɣîri mà.

Ɣâla è ǹeɣe-nuui ŋɔ mɛnii ŋá tèe

²² “M̀ɛni ma, Óoliƃa, Ńyãa Ŋ̀wála-wâla kélee Yâwɛɛi, ŋa pâi gɛ̂i a gɛɛ íwɛli kɛ́-maa-ƃelai nyii-ŋai í ípôlu tɔ̀ɔ dîai díkula ƃéla kélee ma íƃɛlɛ é kɛ́ɛ díkoi dítɔɔ yâ.

²³ Ǹyakpa lɛ́lɛɛ-ŋai, ǹɔii mɛi-ƃelai, gɔkuluƃa láa túɛ-ƃelai, da gɔkuluƃa-ŋai da kɛ zoo-ŋai siâi da pâi kulâi Babelɔŋ da Kadia, Pikɔ da Soa da Koa, é pɛ́lɛ Asiria-ŋai kélee dîa.

²⁴ Da pâi kulâi yá-ŋua pere dí pá a kɔkuluƃa kpulu kɛ́tɛ da kɔ́ kɔ́-keleŋ támaa, é pɛlɛ kɔ́ kɔ́-sãa támaa ma. Dia kpîŋ da pâi tínaŋ nii yâ díkpala ŋá-ɣale kɔli-kalaŋ kɛ́ ƃò dí yêei, díkɔ kɔ́-gbaƃɛlɛi-ŋai kɛ́ ƃò díŋâa. À kɛ̀ tí, ŋa pâi ítɛɛ̂i dí pɔ́ a gɛɛ dí ímɛnii ŋá tée. Ǹyaŋ, da pâi ímɛnii ŋá têei díkpɔɔi tɔŋ lá-woo ma.

²⁵ Ńii ŋwãnâi yâ, m̀ɛni m̀a ŋá pâi gɛ̂i dí í kula maa kɛ́ a lii-ŋwã̂na. Da pâi ísũa da íwoli têei yâ. Diai kélee pâi lɛɛ̂i ɣele mai, da pâi dí paâi a ƃóa-sɔ̂kpɔ. Da pâi ílônii-sinaai da ílônii-nɛyãai sonîi. Diai pâi lɛɛ̂i ɣele mai da pâi díkereŋ a ŋɔŋ.

²⁶ Da pâi íseɣe-ŋai kulâi yâ dí íkɔyɛ̂ŋ lɛ́lɛɛ-ŋai kélee sóŋ íyêei.

²⁷ M̀ɛni ma, ŋa pâi íkperai íwulu-wulu tua-ŋai kélee ma íkula la Izei. Ŋa pâi gɛ̂i tí a gɛɛ ífa pɔ̂ri íŋuŋ mu siɣêi í Ize-ƃelai káa, kpaa máŋ díkili é lɛ́ɛ í ŋá.”

²⁸ Ŋ̀wála-wâla kélee Yâwɛɛi è mò Óoliƃa mà ǹyɛɛi, “Ŋa pâi ítɛɛ̂i í kpɔara-ƃelai pɔ́ nyii-ŋai díƃɛlɛ fé íkoi.

²⁹ À kɛ̀ tí, da pâi tûai a yá a ƃɛlɛ-kpɛɛ goi pere. Da pâi zãai í maa tîi kɛ̀i, kélee sonîi íyêei dí ímaa kpôloŋ ílɛɛ a íyee fôlo. À kɛ̀ tí, íwulu-wulu kɛ́ɛi maa-tuŋ a pâi toôi. Í sɛŋ wɛ̂lii da íwulu-wulu kɛ́ɛi,

³⁰ ƃé pà a m̀ɛnii ŋí yâ. Ka ǹɔii-ŋûŋ-ŋai ŋí ká wulu-wulu kɛ ítela íkpîŋ maa-tĩa kara a díɣâla-pɔkɔɔŋ-ŋai.

³¹ Ítùa nɔ́ yɛ̂ɛ ílîa-nɛnîi. M̀ɛni ma ŋa pâi íkula maa kɛ̂i yɛ̂ɛ berei ŋá gula maa kɛ̂ lai.”

³² Ŋ̀wála-wâla kélee Yâwɛɛi è mò ǹyɛɛi, “Ya pâi ílîa-nɛnii ŋɔmɛni kula maa kɛ́ɛi da sɔlɔ ƃôi, nyii gɛ̂tɛi é tɛ́ɛ íwɔ̂i mai. Núu támaa da pâi ɣɛ́lɛ-maa kulâi íkponôi, dí ƃâa kula yâ, kpɛ́ni fêi ímɛni kula maai su kɛ̂tɛi.

³³ A pâi kɛ̂i yɛ̂ lɔɔ ŋɔnúu kɛ́ɛ da maloŋ tôo maa mɛ̂ni. A pâi kɛ̂i a mɛni kula maa nyii pâi pâi a yao da su kâra, nyii gáa a ílîa-nɛnii Sameria ŋɔmɛni kula maai.

³⁴ Ya pâi m̀ɛni kula maai ŋí kélee kpɔ́ sɔlɔ ƃôi da fa lɛ̂ɛ pôlu. Ya pâi íŋuŋ-leɣa wêenii, Í íŋini su tée-tèe. Ńyãa ƃa Ŋ̀wála-wâla kélee Yâwɛɛi, ńyãa ƃé mò tí.”

³⁵ “Tãi yà nâa nia la ḿâ, ya ńdũaŋ ípôlu-perei, yà pâi ísurɔ̂ŋ wɛli lii ŋánaai da íwulu-wulu kɛ́ɛi maa mɔ̃lɛ-laa kɛ̂i.”

Ɣâla è dífeerɛŋɔɔ díkula maa kɛ

³⁶ Yâwɛɛ è ŋɔ́nɔ mò ḿâ ǹyɛɛi, “Núu kpune ǹóŋ, íkpîŋ kpɛtɛ̂ɛi a gɛɛ í Óola da Óoliƃa dímɛnii ŋá tée? Gɛ̀ ní dítu-pere nyɔ̂ŋ lɛ́ ŋaŋ dîa.

³⁷ Da wulu-wulu támaa kɛ́. Da núu páa. Da ɣâla-pɔkɔɔŋ ŋa fɛli. Da kúlônii-sinaai kúla a sâla ŋ̀âla-pɔɔkɔŋ-ŋai dîa.

³⁸ Ǹaa pôlu ma tãi tɔnɔi tí nɔ́ ƃé da ŋáfii tɔ̂ɔ ɣelei maa tĩa kara la da ŋápɛrɛi.

³⁹ Kpɛ́ni fêi, tãi tɔnɔi nɔ́ dí dínîa-pɛlɛɛi kùla la a sâlai, m̀aa tãi tɔnɔi tí nɔ́ ƃé dí pà la dí ŋápɛrɛi maa tĩa kara. Ǹyaŋ m̀ɛnii dí gɛ̀ a ŋápɛrɛi ká tí.

⁴⁰ “Díworɛ̂ tɛ̀ɛ kpɔ́o sinâa da kpɛ́ni-ŋa pɔ́ naa díkula lɔii da kpɛ́ni su dí pá. Dífeerɛ dí díwàa dí díŋɛi gonoŋ pôlu tée dí kɔyɛ̂ŋ sɔ̃ɔ kpanaŋɔɔ tóo dîa. Dí nyíŋi kɛ̀ zinâai ŋí mɛni ma.

⁴¹ Dísèe see-sɛŋ lɛ́lɛɛ-ŋa ŋá. Teƃele kɛ́ ƃò dí ŋɛ́i túɛ ǹáa fɛ́ɛ a kéreŋ-sɛŋ kuŋ nɛ̃ɛ da ɔle-wulɔi ŋá dɛ̀ɛ dí pɔi.

⁴² Núu kpulu nyii vé kpáaŋ níi tíŋ è tɛ̀ dí kɔlɛ, é pɛ́lɛ lɔɔ-kpele-ƃela dîa nyii-ŋai kùla vɛ̃ɛ-kpâlaŋ sui. Zinâai ŋí díyee ma kɔli tòo nɛyâai yée ma, díkâloŋ ƃɔrɔ sèe díŋâa a tɛ̀ɛ ŋa.

⁴³ Ŋá lòno ŋ́gbîŋ pɔ ńyɛ lé mɛni ƃé zinâai ŋí da ŋ̀wɛ̂lii dí wulu-wulu kɛ́ a ǹɛyâai nyii-ŋai wulu-wulu kɛ́ɛ a kɔlɔ kpɛ́ɛ dîai?.

⁴⁴ Kpɛ́ni fêi da lí bɔ́ naa yɛ̂ɛ berei surɔ̂ŋ a lɔ̂ la wulu-wulu kɛ́ nɛni ŋɔpɛ́rɛ mui. Dí lì Óola da Óoliƃa-ni pɔ́ naa nyii-ŋai díkaa a wulu-wulu kɛ́ nɛyãai.

⁴⁵ Teniŋ ƃô nua da pâi dímɛnii ŋá têei a wulu-wulu kɛ́-ƃela da núu paa-ƃela. Kpɛ́ni fêi, díkaa a wulu-wulu kɛ́ nɛyaa da núu paa-ƃela.”

⁴⁶ Ŋ̀wála-wâla kélee Yâwɛɛi è mò ǹyɛɛi, “Pá a núu-kpulu a gɛɛ é mɛni kpɔ̂lu láa dîa, é ŋúma kɛ́ dîa.

⁴⁷ À kɛ̀ tí, ǹúu-kpului a pâi dísɔ̂ɔi a kɔni é dí páa a ƃóa-sɔ̂kpɔ, é dínîa-pɛlɛɛ-ŋai paa, é dípɛrɛ-ŋai kéreŋ.

⁴⁸ Ŋa pâi wulu-wulu kɛ́ mɛ̂ni kperâi ǹɔii su. A pâi kɛ̂i a lia-woo ǹɛnî-ŋai maa mɛ̂ni ma a gɛɛ dífe ŋɔ́nɔ wulu-wulu kɛ̀ yɛ̂ɛ berei dí gɛ̀ lai.

⁴⁹ Ŋa pâi dífeerɛŋɔɔ díkula maa kɛ̂i dí wulu-wulu kɛ́ mɛnii da dí ɣâla-pɔɔkɔŋ-ŋai fɛli mɛnii ma. À kɛ̀ tí, ka pâi gɔ́lɔnîi a gɛɛ ńyãa ƃa Ŋ̀wála-wâla kélee Yâwɛɛi.”