Izikiɛ 22 - Bible

Zerusâlɛŋ-ƃelai Dísɔnyɔ̂ŋ-ŋai

¹ Nya ƃe Yâwɛɛ è lono ḿbɔ ǹyɛɛi,

² “Núu-kpune ǹóŋ, yâa í kpîŋ kpɛtɛ a gɛɛ í nuu paa ƃelai dítaa-leei ŋɔmɛnii ŋá tée? Gɛ̀ ní, ŋɔtua-pere nyɔ̂ŋ kélee lɛ́ m̀a.

³ Gɛ̀ m̀ó yɛ̂ɛi, Ŋ̀wála-wâla kélee Yâwɛɛi ǹyɛɛi, ‘Ǹûai nyii da dínûai paa dítaa-leei su díkɛ díkpîŋ maa-tĩa kara a fɛliɛɛi, ŋɔ mɛnii ŋá tée tãi a seri.

⁴ Ǹûai ká dí paai dímaa mɛ̂ni a mɛni lɛ́ɛ kâa. Ŋâla-pɔkɔɔŋ-ŋai ká dí kpɛtɛi da ká maa-tĩa kara. M̀ɛni ma ká mɛni ŋátee tãi a seri. Ká tãi a kpɛɛ. M̀ɛni ma, ŋa kákɛ a ǹɔii-ŋuŋ ŋai díɣɛlɛ maa sɛŋ, díkɛ ƃâa kula kâa.

⁵ Ǹɔii-ŋuŋ ŋai dílɛɣɛ̂ɛi a kaai, da nyii-ŋai dí kɛ̂i koyâai kâai da pâi ɣɛlɛ-maa kulâi kákponoi. Kpɛ́ni fêi, nuui kélee dí kásɔnyɔ̂ŋ da káŋwana-lɔɔ tuai kɔ́lɔŋ.

⁶ Kaai a Eezuɛ m̀ɛi ƃelai, ka kákpɔɔi wala-wala laa siɣe ká kɛ nua paa.

⁷ Káfa ƃaa-kɛ maa tɛ̂ɛ kákaa-ƃela pɔ́. Ka ŋ̀ɔ̃ya-ŋai fîli kátaa-ŋai su. M̀ɛni tɔ̂nɔi ŋí nɔ́ ƃé ká gɛ̀ a dee-lôŋ-ŋai da bɔɔ-nɛyãai.

⁸ Ka ká pôlu tɔɔ ŋa sãa maa waa ŋai dîa, ka ŋá fii-tɔɔ ɣelei maa-tĩa kara.

⁹ Nûa díkaa ká sama nyii ŋai da lɛ́ɛ kɛ a díƃaraai láa a gɛɛ dí dípaa. Ǹúui da ni káa naa da kɛ sâla mii-sɛŋ miî ǹyée ŋai ma. Ǹúui da ni díkɛ díkpîŋ tua-pere ŋa-see kɛ a wulu-wulu kɛ́ɛ.

¹⁰ Ǹúui da ni da lɔ-pɔ̂rɔŋ kɛ a dínâŋ ni dínɛyãai kátaa-leei ŋai su. Da ni díkɛ nɛyãa tèe perei kátaa-lee ŋai su a tãi díyee a kɛ́ la ɣelei.

¹¹ Dí ta-ni da wulu-wulu kɛ a díƃaraai dí nɛyɛɛi. Da ni díkɛ pɛlɛ dílonii-sinaai dínɛyãai dîa, kpaa máŋ dínâŋ-ni dílonii nɛyãa nyii ŋai dílee káa a dakpɛ́nii.

¹² Núu da ni da yèe-pɛlɛ-na sɛŋ kao sòŋ a gɛɛ dí núu paa. Dí ta ni díkɛ geni pɛlɛ dísɛŋ kaoi ŋai dîa tài da kpa pili la diai. Ŋ̀wála-wâla kélee Yâwɛɛi è mò ǹyɛɛ, “Ká-tua-pere-ŋai ŋí a gɛ́ ká nîa mâ Ńyãai ŋgáa a Ŋ̀wála-wâla kélee Ɣâlai ƃé mò tí.”

¹³ “ ‘Ŋa pâi ńyee tôoi kâa ka-woya sãai da ká núu paa mɛni-ŋai mɛ̂ni ma.

¹⁴ Ka lâai la a gɛɛ kákili a pâi kɛ̂i nɔ́ nîi a gulaa, kpaa máŋ ka pâi kɛi nɔ́ a ká wala-walaa a voloi ŋa pâi kpɛɛ̂i la kaai? Ńyãa a Yâwɛɛi ńyãa ƃe mò ti, ǹyaŋ ŋa pâi ŋa-see kɛ̂i.

¹⁵ Ŋa pâi ká taa-taai ǹɔii-ŋuŋ ŋai kélee su ƃelai sama. A kɛ̀ ti, ŋa pâi pâi kátua-pere nyɔmɔɔ-ŋai kélee kpera.

¹⁶ M̀ɛni ma, ǹɔii-ŋuŋ gbeli ŋai da pâi ƃâa kulai kâa ǹyaŋ ka pâi gɔlɔni a gɛɛ ńyãa ƃa Yâwɛɛ.’ ”

Ɣâla ŋɔnúu maa waa fílɛ-ŋɔŋ

¹⁷ Yâwɛɛ è lono ḿbɔ ǹyɛɛi,

¹⁸ “Núu kpune ǹóŋ, Eezuɛ ƃelai dífe ŋɔ́nɔ ŋ̀ɛi a sɛŋ ta. Díkaa nɔ ŋ́ɛi yɛ̂ɛ ƃara, tiŋ, kɔli, foma, da kane kpo nyii ŋai da lɛ́ɛ filɛ-ŋɔŋ sui.

¹⁹ M̀ɛni ma Ŋ̀wála-wâla kélee Yâwɛɛi è mò ǹyɛɛi, tãi nɔ káfe ŋɔ́nɔ ŋ́ɛi a sɛŋ tá, ŋa pâi ká ŋá tɛ̂i gîe ma Zerusâlɛŋ samai.

²⁰ Yɛ̂ɛ berei da kane, ƃara, kɔli, foma, da tiŋ, ni lɔ la fílɛ-ŋɔŋ mu díkɛ gbɔlui a gɛɛ é seɣeŋ, bere ƃe ŋa pâi ká ŋá tɛi la gîe m̀a a ŋá lii-ŋwanai. Ŋa pâi ǹíi-wãnai kâa ŋá ká seɣeŋ yɛ̂ɛ berei da kɔli seɣeŋ lai.

²¹ Ŋa pâi ká ŋá tɛ̂i gîe m̀a ŋá ŋɔŋ pú kâa ŋá ká seɣeŋ a ŋá lii-wãnai Zerusâlɛŋ daa samai.

²² Berei da kale seɣeŋ la a filɛ-ŋɔŋ, bere ƃe ŋa pâi ká seɣeŋ ni la Zerusâlɛŋ-daa samai a kɛ ti, da pâi gɔlɔni a gɛɛ ńyãai a Yâwɛɛi ńii wãnai kâa.”

Eezuɛ laa-tuɛ ƃelai dísɔnyɔ̂ŋ

²³ Yâwɛɛ è ŋɔ́nɔ lono ḿbɔ ǹyɛɛi,

²⁴ “Núu kpune ǹóŋ, mò Eezuɛ ma yɛ̂ɛi mai, í maa fé waa ni, m̀ɛni ma ŋa pâi ńii wãnâi yâ, ŋá í kula maa kɛ.

²⁵ Eezuɛ laa-tuɛ ƃelai díkaa yɛ̂ɛ yala-sulu ƃe kpeɣei gɛ gɔnɔŋ fala-fala. Da ǹûai dífulu laai su kara. Da dísɛŋ-kaoi da dí kɔ̃lîŋ kélee siɣe. Da nɛnî támaa kɛ́ da lɛɛ a pɔɔ-nɛnî Zerusâlɛŋ.

²⁶ Zâla láa-soŋ-ƃelai da ŋátɔ̂ŋ ŋai kélee kara, da ŋá sãa maa waa ŋai maa tĩa kara. Dífa zãa maa waai da nyii m̀aa fé waa ni loai laa. Dífa téla zãa maa-waai da zãa kpɛtɛɛi loai laa. Da díŋɛi ǹaɣîŋ ŋáfii-tɔɔ ɣelei mɛi. M̀ɛni ma, da m̀aa tĩa kara dísama.

²⁷ Dílaa túɛ-ƃelai díkaa yɛ̂ɛ baníŋ nyii-ŋai dakɛ̂ dí kɔ̃́nɔŋ fala-falai, díkɛ núu pàa, díkɛ ƃò a núu paa-ƃela a gɛɛ díkɛ fili-sãa sɔlɔ ƃô, dítɔɔ a woyâ pere.

²⁸ Díɣâla-woo ƃó-ƃelai da zɔŋyɔ̂ŋ-ŋai ŋí mɛi pɛ̂lɛ yɛ̂ɛ núu a pɛrɛ-kaŋ mɛi pɛ̂lɛ a wée-kole. Díkɛ lɛ́ɛ zĩ̂a-ŋa kàa. Díkɛ lɛ́ɛ worɛɛ-woo-ŋa ƃò dîa díkɛ kɛ̀ dîyɛɛi, ‘Ŋ̀wála-wâla kélee Yâwɛɛi ǹyɛɛi,’ kɛ́lɛ m̀ɛnii da kɛ̂ môi vé a ŋ̀óo.

²⁹ Dɔɔ-ƃelai díkaa ǹɔii sui da ǹûai fîli díkɛ sãâ ŋuma. Da fili tâa kɛ̀ a gôlo-ƃelai díkɛ ŋɔ̃ya-ŋai fîli.

³⁰ Ŋa kɛ̀ ǹúu kɔ̂rii dísama nyii pâi tɔɔ̂i dímaa mɛ̂ni ma é ziaŋ tɔ́ɔ daai mɛi káa mɛni ma, é ǹɔii maa kɔ̃ɔ a tãi ŋá ńii ŋwãna la a gɛɛ ŋá ká su-karai. Kɛ́lɛ ḿve núu da káa ni.

³¹ M̀ɛni m̀a, ŋa pâi ńii ŋwãnai dîa. Ŋa pâi díkereni a ŋá lii-ŋwanai. Ǹyaŋ ŋa pâi díkereni a ŋálii-ŋwãnâi dímɛni nyɔ́mɔɔi mɛ̂ni ma yɛ̂ɛ ŋɔŋ a sɛŋ kêreŋ. Ńyãai a Ŋ̀wála-wâla kélee Yâwɛɛi ńyãa ƃé mò tí.”