Izikiɛ 17 - Bible

Zaŋ bilaŋɔɔi guɛ-ŋai da gbɔmɔi mai

¹ Yâwɛɛ è lono ḿbɔ ǹyɛɛi,

² “Núu-kpune ǹóŋ, ye sáŋ sɔɔ Eezuɛ-ŋai dîa,

³ a gɛɛ m̀ɛnii nyii ńyãai a Ŋ̀wála-wâla kélee Yâwɛɛi ŋa mòi diai. Ŋa mòi dîa, kuɛ kɛ́tɛ tɔnɔ è wɔ́lɔ kɛ naa goôŋ-leɣa lɛlɛɛ kpɔ́ a ŋanaa. Goôŋ è kɛ kpɔ́ a zu-kɛtɛɛ. È kòoŋ é lí Lɛƃanɔŋ è see sîda wurii tôŋ m̀a.

⁴ Nya ƃe è gɔŋ-tɔɔi ɣale é lí la lɔii da su é zí bɔni-tɔɔ ƃelai dítaa-leei su.

⁵ È wuru-sôo kula Eezuɛ lɔii su é lí la é zi lɔii lɛ́lɛɛ m̀a ǹyai kɔlɛ a gɛɛ é ƃɔlɔ a maa félaa yɛ̂ɛ wêloo-wuru.

⁶ Ŋurii è pɔmɔŋ é kɛ́ a kpɔlɔ. Ŋ̀owo è tinâŋ é tɛ́ guɛi pɔ́ naa pere ŋ̀ele su. Zame é lɛ́ɛ nɔ ƃɛɛi è kɛ naai. Gbɔmɔi ŋowo da ǹáa è kɛ m̀a.

⁷ “Kɛ́lɛ guɛi gɛtɛ tɔnɔ è ŋɔ́nɔ kɛ naa gôoŋ su kɛtɛɛ, goôŋ leɣa pɔyɛ̃ɛ támaa zu. Gbɔmɔi same è tinâŋ bɔ naa pere, ŋowo é tinâŋ bɔ naa pere. Kili-kɛ zu è kɛ̀ ǹyeêi a gɛɛ a pâi yá tɛɛ bɔ naa é tɛ́ɛ ǹyai nyii kɛ zuai su ƃɛɛi è kɛ naai mâ.

⁸ Kɛ́lɛ, gbɔmɔi ŋí è kɛ lɔii lɛ́lɛɛ mâ ƃɛɛi a pɔri lɛ́lɛɛi naa é kɛ a ƃâ-kpɔmɔ lɛlɛɛ gɛ ƃai.

⁹ “Ŋ̀wála-wâla kélee Yâwɛɛi è mò ǹyɛɛi, gbɔmɔ sĩi ŋí a pɔri ƃɔlɔi? Kpao, fé pâi ǹɛɛi naa é kɛ́ tí. Guɛi fa pɔri ŋurui yeni é zama kélee da ŋowo tée a gɛɛ ǹaa kélee é kpala? Oei a pɔri gɛi tí. Vé pâi núu wala-walaa siɣei a tãi su koyaa, kpaa máŋ é núu támaa siɣe a tãi su koyaa díkɛ wuyèŋ? Kpao, ŋuyeni fé kpanaŋ ni.

¹⁰ A kɛ̀ da zi pôlu, a pɔri ŋɔ́nɔ lɛ́lɛi? Kpao, va pɔri kɛ̂i tí. Kpao a kɛ vãai a kula voloi kulâi pere a vɛ̀ɛ a pâi sâai. Vé pâi kpâlai ǹɔii mâ ƃɛ́i dí zì naai?” Oei a pɔ̂ri kɛ̂i tí.

Yâwɛɛ è zã́ŋ su-kula

¹¹ Nya ƃe Yâwɛɛ è lòno ḿbɔ ǹyɛɛi,

¹² “Woo-pîli ƃela, ká fé zã́ŋ ŋí su-kulâi kɔ́lɔŋ? Babelɔŋ kaloŋ è wɔ́lɔ pà Zerusâlɛŋ é ǹaa kaloŋ da ŋɔtíi kɛ́-ƃelai síɣe é lí a dia Babelɔŋ.

¹³ È galoŋ ŋɔsuui su ǹúu dɔnɔ siɣe é kpanaŋ-woo kɛ́ ǹyeêi. È gɛ ǹúui tí é voo ǹyeêi a gɛɛ a pâi kɛi ŋ̀óo mu. È ǹɔii mɛi ƃelai sôŋ a kɔ-sôŋ-ŋa.

¹⁴ È gɛ tí a gɛɛ galoŋ-laa fé ŋɔ́nɔ kɛ naa, kɛ́lɛ, ŋɔkpanaŋ-wooi é lɛɛ dɔɔ̂i.

¹⁵ Kɛ́lɛ, Zuda kaloŋ è tɔɔ m̀a é ǹyée-mu ǹuu tɛɛ Ize a gɛɛ dí kɔ́kɔ-soo támaa da kɔkuluƃa támaa tɛɛ m̀i. Ǹyee a pâi pɔri Babelɔŋ kaloŋ ma? Ǹúu-sîi nyii a m̀ɛni saŋ ŋí kɛi a pɔri pûi? A pɔri gbanaŋ-wooi pilii dífa gula maa kɛi?

¹⁶ “Tɔ̃yâ m̀a tãi nɔ ŋ́gaa la ɣele mai, gâloŋ tí a pâi lɛɛ̂i Babelɔŋ ƃɛ́i dí gɛ̀ naa a kâloŋ é lɛ́ɛ la zu é sáa. Kpɛ́ni fêi è gbanaŋ-wôoi ŋɔtɔ̂ŋ kara.

¹⁷ Ize kaloŋ da ŋɔkɔ-kuluƃa wála-walaa ŋai dífe pâi gula yêei kɛ̂i gɔi su. Da pâi pɔrɔ kane ŋa tɔɔ̂i ziaŋ ma a gɛɛ dí tɛ la dípili ziaŋ su a gɛɛ dí nuu támaa paa.

¹⁸ Ǹyaŋ vé pâi pûi kpɛ́ni fêi vé ŋɔfóo-wooi ŋa-see kɛ ni, kpaa máŋ, vé ŋɔkpanaŋ-wooi mɛi káa ni. Kpɛ́ni fêi è ǹyée see m̀ɛni-ŋai ŋí mu kɛ́lɛ gɛ m̀ɛni-sîi ŋai ŋí kɛ.”

¹⁹ Ŋ̀wála-wâla kélee Ɣâlai è mò ǹyɛɛi, “Tãi nɔ́ ŋ́gaa nîi la ɣele mai, tãi è voo la ńyêei vé ŋaa-see kɛ́ níi, da ŋákpanaŋ-wooi nyii è gàrai, ŋa pâi gula-maa kɛ̂i m̀aa mɛ̂ni ma.

²⁰ Ŋa pâi ŋá deɣãŋ pɛlɛ̂i m̀ɛi. Ǹyaŋ a pâi kɔi a ŋa ƃarei. Ŋa pá la Babelɔŋ ŋá gula-maa kɛ kpɛ́ni fêi vé tua ni a ńyãa a teniŋ ƃo pere.

²¹ Ŋɔ kɔkuluƃai ǹɛ́lɛɛ-ŋai da pâi lɛɛ̂i kɔ́ su. Diai pâi pui da pâi taa-tâai dí-ŋuŋ-ma. A kɛ tí, ka pâi gɔlɔni a gɛɛ ńyãai ǹuu-namui ńyãa ƃe mò tí.”

Ɣâla è kili-kɛ-zu maa kono-tee kɛ

²² Ŋ̀wála-wâla kélee Yâwɛɛ è mò ǹyɛɛi, “Ŋa pâi sîda wurii tôŋ sonîi ŋa ɣâle, ŋa pâi zîi ǹyée kɛ́tɛi tôŋ su,

²³ Eezuɛ yèe kpaya-kpaya-ŋai tôŋsu. Ŋ̀owo a pâi kulâi m̀a é ƃa a pâi kɛ̂i a sîda wuru sirɛ kɛ́tɛ. Ŋɔni-sĩi kélee a pâi kɛ̂i zu, dí dítaa tɔ́ɔ ǹinîŋ mu.

²⁴ Ŋ̀úru-ŋai kélee da pâi gɔlɔni a gɛɛ ńyãa ƃa nuu-namui. Ŋa ŋuru koyaa-koyâai pɔŋ ŋá ŋuru pɛlɛɛ-pɛlɛɛi kɛ́ dí ƃɔlɔ dí koyaa. Ŋa ŋuru-ŋunu ŋai kɛ́ díkpala ŋá ŋuru-kpala ŋai kɛ díkɛ a dí ŋunu. Ńyãai a Yâwɛɛi, ńyãa ƃe mò tí. Ŋa pâi m̀ɛnii ŋá mòi ŋ̀aa sèe kɛ̂i.”